Pambula kuswera yapa, Khoti la Leninskiy lo le Muchigaŵa cha Kirov liperekengi cheruzgu chaki pa mulandu wa mubali Aleksandr Shamov, Andrey Shchepin, ndi Yevgeniy Udintsev. a

Aleksandr Shamov

• Chaka cho Wakuwiya: 1960 (ku Komarovo, Muchigaŵa cha Kirov)

• Mo Wakukuliya: Mubanja mwawu mwe ŵana 6. Apapi ŵaki akutayika iyu weche munamana. Wangwamba kugwira ntchitu yakulima ku munda wa banja lawu we ndi vyaka 6. Wati wamaliza masambiru ngaki pakoleji yinyaki, wangwamba kunozga ma TV. Wakutorana ndi Nadezhda mu 1986. Ŵe ndi mwana mura munthukazi. Wakwamba kulonde ndalama za penshoni wati wachira nthenda ya mtima yo watamanga kweniso wati wapangika opaleshoni ya mtima. Aleksandr ndi Nadezhda angwamba kusambira Bayibolu ndi Akaboni aku Yehova cha mu ma 1990. Aleksandr wakubatizika mu 2000

Andrey Shchepin

• Chaka cho Wakuwiya: 1991 (ku Korolev, Muchigaŵa cha Moscow)

• Mo Wakukuliya: Apapi ŵaki ndiwu akumusambiza uneneska. Wakutorana ndi Ksenia mu 2015. Wagwira ntchitu ya uyinjiniya. Wakubatizika mu 2010

Yevgeniy Udintsev

• Chaka cho Wakuwiya: 1949 (ku Kirov)

• Mo Wakukuliya: Weche mwana wangutama ukongwa nthenda ya mtima. Wagwira ntchitu yauyinjiniya ndipuso yakupanga visulu. Wakutorana ndi Elizaveta mu 1970. Wosi akusambira uneneska mu 1991 kutuliya kwa mubali waki waku Elizaveta. Kwanja Yehova ndiku kungumuwovya kuti waleki kukweŵa foja ndipuso kumwa moŵa. Wakubatizika mu 1996

Pa 26 March 2019, Apolisi ku Russia angufufuza nyumba 12 za Akaboni aku Yehova ku Kirov. Ŵati afufuza kweniso kusaniya maukaboni ngo apenjanga, ofesi ya loya wa boma yingumujuliya mulandu Mubali Aleksandr, Andrey, ndi Yevgeniy. Andrey angumujaliya mujeri kwa mazuŵa ngaŵi. Loya wa boma wangukamba kuti vinthu vakukwaskana ndi kusopa vo abali yaŵa achitanga “vakofya.” Abali yaŵa atiŵamba mulandu wakuti aŵerenga Bayibolu ndipuso kumba sumu.

Abali yaŵa atimuthemba ukongwa Yehova, gulu laki ndipuso Bayibolu ndipu venivi vitiŵawovya kuti akunthiyepu kutombozgeka kwenuku. Mwakuyeruzgiyapu, Aleksandr wasaniya nthazi kutuliya ku chakuwoniyapu cha “mtambu ukulu wa akaboni” wo uzumbulika pa Aheberi chaputala 12. Iyu wangukamba kuti: “Ateŵeti aku Chiuta akali aziŵanga kuti munthu wangalongo kuti we ndi chivwanu asani wachita vinthu mwachiganga ndipuso wakunthiyapu. Mwaviyo, asani vinthu veumampha cha, nditesesa kuŵanaŵaniya chakuwoniyapu chawu. Yiwu angukunthiyapu masuzgu ngakulu ndipuso vinthu vambula urunji. Venivi vitindiwovya kuti ndilutirizgi kufwiyapu kuti ndivikiliyi chivwanu.’”—Yuda 3.

Andrey wachiskika ukongwa ndi nkhani zo zikonkhoska mbiri ya umoyu wa ŵanthu, za Akaboni akugomezgeka wo ŵengaku mu nyengu ya chipani cha Nazi ku Germany ndipuso mu nyengu ya ulamuliru wa Soviet Union. Iyu wangukamba kuti: “Ndikhumbira kuti nani mphanyi nani ndenga ndi chiganga nge yiwu.” Kweniso iyu wanguchiskika ndi mo Yehova wamukiyanga mapempheru ngawu kweniso mo waŵatumbikiyanga chifukwa cha kugomezgeka kwawu. Venivi vingumuchitiska kuti asani wapemphera, wakambiyengi Yehova, vinthu chayivu vo wakhumba. Iyu wangukamba kuti: “Ndingupemphera kuti ndije ndi chiganga, chiganga, ndipuso chiganga . . . Tiziŵa kuti tija munyengu yapade ukongwa. Venivi vititipaska mwaŵi wapade wakuti tiwovyi anyidu, tilongo vakuwoniyapu vamampha ndipuso kuti timuthembengi ukongwa Yehova.”

Titiŵapemphere abali ŵidu atatu ndi mabanja ngawu. Tiziŵa kuti Yehova walutirizgengi kuŵapembuzga ndipuso kuŵawovya kuti aje ‘akukho, kuti nyengu zosi achitengi ndi kulongoro vinthu vamampha.’—2 Atesalonika 2:17.