Munthu weyosi we ndi zina. Kumbi mphakuvwika kuti Chiuta nayu waje ndi zina? Kuja ndi zina ndi kuligwiriskiya ntchitu nkhwakukhumbika ukongwa chifukwa kutovya kuti ubwezi waku isi taŵanthu uyendengi umampha. Mwaviyo, kuti tije pa ubwezi wamampha ndi Chiuta tikhumbika so kuziŵa zina laki?

 M’Bayibolu, Chiuta wakamba kuti: “Ndini Yehova, lenili ndilu zina langu.” (Yesaya 42:8) Chinanga kuti iyu we ndi mazina nganandi nga udindu nge ngakuti “Chiuta wanthazi zosi,” “Ambuya Fumu Yikulu” kweniso “Mlengi,” kweni wakhumba kuti ŵanthu wosi wo atimusopa amusopengi mwakugwiriskiya ntchitu zina laki.—Chiyambo 17:1; Machitidu 4:24; 1 Peturo 4:19.

 Ma Bayibolu nganandi ngo akufwatuliya nge ndi zina laku Chiuta lo lisanirika pa Chituwa 6:3. Nkhani iyi yikamba kuti: “Ndinguwoneke kwaku Abrahamu, kwaku Yisaki, ndi kwaku Yakobe, nge Chiuta Wanthazizosi, kweni ndinguŵaziŵiska cha zina langu lakuti Yehova.”

 Mu Chitonga zina laku Chiuta ndi Yehova ndipu laja lichigwiriskikiya ntchitu kwa vyaka vinandi. Chinanga kuti akaswiri anandi akamba kuti zina laku Chiuta likhumbika kulembeka kuti “Yahweh,”kweni ŵanthu anandi aziŵa kuti zina laku Chiuta ndi Yehova. Chigaŵa chakwamba cha Bayibolu, chikulembeka mu Chingelezi cha kweni m’Chiheberi. Vilembu va Chiheberi viŵerengeka kutuliya kumazge kuluta kumaryi. Mu chineneru chenichi, zina laku Chiuta likulembeka ndi vilembu vinayi ivi,‏.יהוה ‏ Vilembu vinayi venivi YHWH vimiya zina laku Chiuta asani avifwatuliya, ndipu viziŵika kuti ve mugulu la Tetragrammaton.