Kuti Leza katali nguwe weeta mapenzi, ngwani uupa kuti kube nzala, kufwaba, nkondo, malwazi amapenzi aalichitikila? Jwi lyaLeza Bbayibbele litondeezya twaambo tutatu tupa kuti mapenzi avule munyika:

1. Kutabaandaba Abantu, Butangazu Akutayanda Bamwi. “Muntu naendelezya muntunyina kukumubisizya [naakuti munzila imweetela mapenzi].” (Mukambausi 8:9) Chipa kuti bantu bafwabe nchakuti beendelezegwa abantu balaachibi, batakwe ndaba abamwi alubo basilunya.

2. Ziindi Zyalufu Azyamapenzi. Tuswaana mapenzi nkaambo “bantu boonse buyo balasikilwa ziindi zyalufu azyamapenzi.” (Mukambausi 9:11) Chiindi bantu nibali aabusena butali kabotu aachiindi chiteelede, mapenzi azimwi zintu zibi zilakonzya kubachitikila.

3. Nyika Iliikweendelezegwa Amuntu Mubi. Bbayibbele litondeezya chintu chipa kuti tuswaane mapenzi. Lyaamba kuti: “Tulizi kuti tuli ba-Leza anyika yoonse iikede muzibi [naakuti ilikweendelezegwa amubi].” (1 Johane 5:19) ‘Mweendelezi mubi’ nguSaatani Dyabbulosi mungelo wakakachilwa ‘kukkala mubwini.’ (Johane 8:44) Bamwi bangelo bakasala kuba kulubazu lwaSaatani kwiinda mukupapila Leza kuchitila kuti bazuzikizye nzibayanda mpawo bakaba madimoni. (Matalikilo 6:1-5) Saatani amadimoni aakwe nibakapapila, bakapa kuti bantu balimunyika bachite zintu zibi. Bantu biingi mazubaano balikuchita zintu zibi. Lino Dyabbulosi ulinyemede alubo ‘ulikweena bantu boonse baansi.’ Eezi zyapa kuti bantu boonse babe “mumapenzi.” (Ciyubunuzyo 12:9, 12) Saatani mweendelezi ulaalunya. Ulabotelwa chiindi bantu nibali mumapenzi. Nkinkaako, Saatani nguwe weeta mapenzi kutali Leza.

LIBUZYE KUTI: Tazili antanganana na kuti muntu ulaalunya, uuyanda bubi nguwe uukonzya kupa kuti bantu batakwe mulandu babe mumapenzi? Kusiyana azeezi, Bbayibbele lyaamba kuti: “Leza nduluyando.” (1 Johane 4:8) Kweendelana abube bwaLeza, Bbayibbele litii, “kacili kule a-Leza kuti acite bubi, akuli-Singuzuzyoonse kuti alubizye.”—Jobu 34:10.

Nikuba boobo, ulakonzya kulibuzya kuti, ‘Leza Singuzuzyoonse ulazumizya Saatani kuti ayendelezye kusikila lili?’ Twabona kuti Leza tabuyandi pe bubi alubo zilamuchisa nabona bantu kabali mumapenzi. Kuyungizya waawo, Bbayibbele litubuzya kuti: “Makataazyo aanu oonse amwaasowele kumaanza aakwe, nkaambo nguumucebuka lyoonse.” (1 Petro 5:7) Leza ulatuyanda alubo ulaamanguzu aakugwisya mapenzi akutalulamisya koonse. Chiiyo chitobela chiyootondeezya kuti uyoozichita biyeni. *