Mibuzyo Yabasikubala
Ngwani “mukaintu” waambidwe muli Isaya 60:1, alubo ‘ubuka’ biyeni ‘akumwesya mumuni’?
Isaya 60:1 yaamba kuti: “Buka, yebo omukaintu, komwesya mumuni, nkaambo mumuni wako wasika. Bulemu bwa Jehova bwakumunika.” Majwi aamulugwalo oolu atondeezya kuti mwanakazi wakali wamumuunzi waZiyoni naakuti waJerusalema, nkuukwaamba chisi chipati chaJuda chamuchiindi eecho. a (Is. 60:14; 62:1, 2) Jerusalema yiiminina chisi cha-Israyeli choonse. Majwi aa-Isaya apa kuti tube aamibuzyo iibili: Wakusaanguna, ndiilili Jerusalema ‘naakabuka’ alubo wakawumwesya biyeni mumuni? Wachibili, majwi aakaambwa aa-Isaya alikuzuzikizigwa chakumaninina na muchiindi eechino nchitulikupona?
Ndiilili Jerusalema ‘naakabuka’ alubo wakawumwesya biyeni mumuni? Jerusalema atempele lyayo teezyakachili muchiimo chilikabotu pe chiindi maJuda nibakali mubuzike kuBbabbiloni kwaminyaka iili 70. Pesi chiindi Bbabbiloni naakazundwa amaMediya aPesiya, ma-Israyeli bakali kukkala mumabazu aasiyene-siyene bakali kweendelezegwa aamwaami wakuBbabbiloni bakajana chilongezyo chakubweeda kulimbabo akuti bakaakubusilizye bukombi busalala. (Ezr. 1:1-4) Kuzwa mu537 B.C.E., kabunga kabantu basyomeka bazwa kumisyobo yoonse iili 12 yama-Israyeli bakachita oobo. (Is. 60:4) Bakasaanguna kupa zipayizyo kuli Jehova, kusekelela mapobwe akuyakulula tempele. (Ezr. 3:1-4, 7-11; 6:16-22) Alubo bulemu bwaJehova bwakasaanguna kumweka muJerusalema, nkuukwaamba bantu baLeza bakali babweeda. Akaambo kazeezi, bakaba kasawu kamumuni muzisi zisiyene-siyene zyakali mumudima.
Nikuba oobo, bupolofita bwa-Isaya teebwakazuzikizigwa chakumaninina pe aachiindi eecho. Ma-Israyeli lwabo taakwe nibakayinkilila kunembo pe kumuswiilila Leza. (Neh. 13:27; Malk. 1:6-8; 2:13, 14; Mt. 15:7-9) Mukuya kwachiindi, nikuba lwakwe Mesiya, Jesu Kkristu bakazoomukaka. (Mt. 27:1, 2) Mu70 C.E., Jerusalema atempele lyayo zyakanyonyoonwa kachibili.
Jehova wakaamba kuti eezi zyakali kuzoochitika. (Dan. 9:24-27) Zilaantanganana kuti taakali makanze aaLeza pe kuti Jerusalema yaanyika izuzikizye bupolofita boonse buli atala akubweedezegwa kwama-Israyeli kwaambidwe muli Isaya chaandaano 60.
Majwi aakaambwa aa-Isaya alikuzuzikizigwa chakumaninina na muchiindi eechino? Iyi, pesi eezi zilikuchitikila kumwanakazi uumbi wakukozyanisya, nkuukwaamba “Jerusalema wakujulu.” Mwaapostoli Pawulu wakaamba kuti: “Mbiibaama.” (Gal. 4:26) Jerusalema wakujulu nchipanzi chakujulu chambunga yaLeza chili aazilenge zyamuuya zisyomeka. “Bana” bakwe baswaanizya Jesu amaKkristu bananikidwe bali 144 000 bali aabulangilizi bwakuzoopona kujulu mbuli Pawulu. MaKkristu bananikidwe bapanga “chisi chisalala,” nkuukwaamba “Israyeli waLeza.”—1 Pet. 2:9; Gal. 6:16.
Jerusalema wakujulu ‘wakabuka’ biyeni alubo ‘wakuumwesya biyeni mumuni’? Wakachita oobo, kwiinda mubana bakwe bananikidwe bali aanyika. Yezyanisya zyakabachitikila azyakapolofitwa aa-Isaya muli Isaya chaandaano 60 mbuzyeendelana.
MaKkristu bananikidwe bakeelede ‘kubuka’ nkaambo bakali baba mumudima munzila yakukozyanisya chiindi basiluleyo nibakavula, baapostoli nibakafwa. (Mt. 13:37-43) Aachiindi eecho, bakali baba bazike baBbabbiloni Mupati, nkuukwaamba chikombelo chakubeja chanyika yoonse. Bananike bakakkala kabali mubuzike kusikila ‘kumamanino aabwiime bwazintu.’ ‘Mamanino aabwiime bwazintu’ akasaanguna mu1914. (Mt. 13:39, 40) Kuzwa waawo, mu1919 bakaangununwa alubo chakufwambaana bakasaanguna kumwesya mumuni kwiinda mukubeleka changuzu mumulimu wakukambawuka. b Kwaminyaka myiingi, bantu bazwa muzisi zyoonse bakasikilwa mumuni kuswaanizya abaabo bakasyeede ba-Israyeli waLeza, nkuukwaamba “baami” baambidwe muli Isaya 60:3.—Chi. 5:9, 10.
Muchiindi chili kunembo, maKkristu bananikidwe bazoosisya mumuni uuzwa kuli Jehova kubantu munzila mpati kwiinda mbubakali kuchita chiindi. Zizoochitika biyeni? Nibazoomaninsya mulimu wabo waanyika, bazooba chipanzi ‘chaJerusalema Mpya,’ naakuti nabwiinga waKkristu wabali 144 000, nkuukwaamba baaminyina abapayizi.—Chi. 14:1; 21:1, 2, 24; 22:3-5.
Jerusalema Mpya izooba chipanzi chipati chiyandikana chakuzuzikizya majwi aali muli Isaya 60:1. (Yezyanisya Isaya 60:1, 3, 5, 11, 19, 20 a Chiyubunuzyo 21:2, 9-11, 22-26.) Mbuli Jerusalema yaanyika mbuyakali mfulumende yaakati ka-Israyeli yachiindi, Jerusalema Mpya aKkristu izooba mfulumende yabweende bwazintu bupya. Muunzilaanzi Jerusalema Mpya ‘mwiiseluka kuzwa kujulu kuli Leza’? Kwiinda mukubweza ntaamu atala azintu zijatikizya nyika. Bantu bayoowa Leza bazwa muzisi zyoonse bazooyenda “mumumuni wawo.” Bazoowangununwa kuchibi akulufu. (Chi. 21:3, 4, 24) Kuzooba mpindu “zyakubweedezegwa kwazintu zyoonse,” mbuli mbubwakaamba bupolofita bwa-Isaya abumwi. (Mil. 3:21) Kubweedezegwa kwazintu kupati kwakasaanguna chiindi Kkristu naakaba Mwaami alubo kuzoomana kumamanino aaBweendelezi Bwakwe Bwaminyaka Iili 1 000.
a Muli Isaya 60:1, muBbayibbili lyaBusanduluzi bwaNyika Mpya kubelesedwe bbala lyakuti “mukaintu” kutali kuti “Ziyoni,” naakuti “Jerusalema,” nkaambo mabala aachiHebberu aakuti “buka” aati “komwesya mumuni” atondeezya kuti muntu wakali kwaambwa aawa mwanakazi.
b Kubweedezegwa kwabukombi bwakasimpe kwakachitika mu1919 kulipandulwide lubo muli Ezekieli 37:1-14 amuli Chiyubunuzyo 11:7-12. Ezekkiyele wakapolofita atala akubweedezegwa kwabukombi bwakasimpe kwamaKkristu boonse bananikidwe kabali bazwa mubuzike kwachiindi chilamfu. Bupolofita buli muli Chiyubunuzyo bwaamba kuzyalwa bupya kwakukozyanisya kwakabunga kaniini kabakwesu bananikidwe bakali kuzulwida bakombi baLeza chiindi nibakakachilwa kubelekela Jehova kwachiindi chifwiifwi akaambo kakuti bakali mujele kabatakwe mulandu. Mu1919, bakasalwa kuti babe “muzike uusyomeka alubo uuchenjede.”—Mt. 24:45; langa bbuku litegwa Bukombi Busalala—Bwabukulusyigwa!, p. 118.
