CHIIYO 40
LWIIMBO 30 Ngu Taata, ngu Leza Wangu, Mweenzuma
Jehova “Ulabaponya Aabo Batyompedwe Mumoyo”
“Ulabaponya aabo batyompedwe mumoyo; alimwi ulaanga zilonda zyabo.”—INT. 147:3
NZITUTAYIYE
Jehova ulaandaba abantu bakataazikana mumoyo. Muchiiyo eechi, tulabona Jehova mbatuumbulizya chiindi nitukataazikene ambatugwasya kuti tukonzye kuumbulizya bamwi.
1. Jehova ubabona biyeni bakombi bakwe?
JEHOVA ulazibona zintu zyoonse nzibaswaana bakombi bakwe. Ulatubona chiindi nituboteledwe anituuside. (Int. 37:18) Chiindi natubona katuchita zyoonse nzitukonzya kuti tumubelekele nikuba katukataazikene, ulabotelwa. Kwiinda zyoonse, ulaachiyandisyo chakutugwasya akutuumbulizya.
2. Jehova ubagwasya biyeni bantu bakataazikene mumoyo alubo niinzi nzitweelede kuchita kuti tugwasigwe aalugwasyo lwakwe?
2 Intembauzyo 147:3 yaamba kuti, Jehova ‘ulaazyaanga zilonda zyabaabo’ bakatazikene. Magwalo apandulula Jehova mbagwasya aabo bakataazikene. Niinzi nzitweelede kuchita kuti tugwasigwe aalugwasyo ndwatupa Jehova? Atuzibikke muchikozyano eechi. Dokotela ulaaluzibo ulakonzya kuchita zyoonse nzyakonzya kuti agwasye muntu uulichiside kuti apone. Muntu ooyo uulichiside, weelede kuswiilila malayilile aadokotela kuchitila kuti apone. Muchiiyo eechi, tulabona Jehova nzyaamba muJwi lyakwe zigwasya aabo bakataazikene mumoyo alubo tulabona mbutukonzya kubelesya malayilile aakwe aaluyando.
JEHOVA UTUBONA KATUYANDIKANA
3. Niinzi chipa kuti bamwi balimvwe kabatagwasyi?
3 Tupona munyika iitakwe luyando, bantu biingi mazubaano tababayandi pe bamwi. Akaambo kazeezi, balakonzya kutabajata kabotu alubo balakonzya kuchita zintu zipa kuti bantu aabo balimvwe kabatagwasyi. Muchizi uutegwa Helen a wakaamba kuti: “Bazyali bangu teebakalikwe luyando pe. Ndeende wakali aalunya alubo buzuba abuzuba wakali kundibuzya kuti tandigwasyi pe.” Amwi anduwe wakajatwa munzila iitali kabotu, ukkala kutukilwa naakuti kuchitilwa zintu zipa kuti ulimvwe kutachigwasyi. Kuti kazili zyakakuchitikila eezi, kulakonzya kukuyumina kuti usyome kuti umwi muntu ulaandaba anduwe.
4. Kweendelana alugwalo lwa Intembauzyo 34:18, Jehova utusyomezyaanzi?
4 Nikuba kuti bamwi teebakujata kabotu, ulakonzya kuba aachoonzyo chakuti Jehova ulakuyanda alubo ukubona kuyandikana. Jehova “ulaafwaafwi abaabo batyompedwe mumoyo.” (Bala Intembauzyo 34:18.) Kuti walimvwa kutagwasyi, yeeya kuti Jehova wakabona zintu zibotu mulinduwe alubo wakakukwelela kulinguwe. (Joh. 6:44) Chiindi choonse, ulilibambilide kukugwasya akaambo kakuti ulakuyanda kapati.
5. Twiiyaanzi kunzila Jesu njaakali kubajataayo bantu bakali kulangilwaansi?
5 Tulakonzya kuziba nzila Jehova njalimvwaayo kwiinda mukulanga-langa chikozyano chaJesu. Chiindi naakali aanyika, Jesu wakali aaluzyalo kubantu bakali kulangilwaansi alubo wakabajata munzila iilikabotu. (Mt. 9:9-12) Chiindi mwanakazi wakali kuchiswa bulwazi bubi naakajata chigogo chakwe chaajulu kali aalusyomo lwakuti ulapona, Jesu wakamuumbulizya alubo wakamulumbayizya akaambo kalusyomo lwakwe. (Mk. 5:25-34) Jesu utobelezya chikozyano chawisi munzila iimaninide. (Joh. 14:9) Tulakonzya kuba aachoonzyo chakuti Jehova utubona katuyandikana alubo ulabubona buntu bubotu mbutulaabo buswaanizya lusyomo akumuyanda.
6. Niinzi nzukonzya kuchita kuti walimvwa kutagwasyi?
6 Niinzi nzukonzya kuchita kuti kulimvwa kutagwasyi? Bala mavesi aamuBbayibbili aatondeezya kuti Jehova ukubona kuyandikana alubo uyeeyesesye atala angawo. b (Int. 94:19) Kuti wakachilwa kuzuzikizya chipekeezyo chako naakuti wamana manguzu akaambo kakuti tulikuchita zyiingi mbuli bamwi, utalyeezyanisyi aabamwi pe. Jehova talangilili kuti uchite zintu nzutakonzyi pe. (Int. 103:13, 14) Kuti kuli wakajatwa munzila iitali kabotu, utalipi mulandu pe atala azintu zitali kabotu nzwaakachitilwa. Tutalubi kuti Jehova uzoobabeteka aabo batabajati kabotu bamwi pesi ulabagwasya aabo batajatwi kabotu. (1 Pet. 3:12) Sandra wakajatwa chalunya kachili muniini, wakaamba kuti, “Ndikkala kandibuzya Jehova kuti andigwasye kuti ndibone buntu bubotu mbwabona mulindime.”
7. Zintu zyakatuchitikila chiindi, zitugwasya biyeni kuti tuzwidilile mumulimu wakukambawuka?
7 Utazumbuuzyi pe kuti Jehova ulakonzya kukubelesya kuti ugwasye bamwi. Wakakupa chilongezyo chakuti ube mubelesinyina mumulimu wakukambawuka. (1 Kor. 3:9) Zintu zyakakuchitikila mubuumi zilakonzya kukugwasya kuti umvwisisisye aabo balikukataazikana. Ulakonzya kuchita zyiingi kuti ubagwasye. Helen waambwa musule wakazumina kugwasigwa aaJehova abakombinyina alubo lino ulikugwasya bamwi. Wakaamba kuti: “Jehova wakapa kuti muntu ‘wakatali kugwasya’ ayandwe akuti abelesegwe kukugwasya bamwi.” Lino Helen ngupayona wachiindi choonse.
JEHOVA UYANDA KUTI TUZUMINE KUTI ULATULEKELELA
8. Jehova utubuzyaanzi muli Isaya 1:18?
8 Bamwi bakombi baJehova bachilipa mulandu akaambo kazibi nzibakachita kabatanabbabbatizigwa naakuti kabali babbabbatizigwa. Pesi tweelede kuyeeya kuti Jehova ulatuyanda kapati alubo wakatupa chinunuzyo kuchitila kuti tulekelelwe zibi zyesu. Tulaachoonzyo chakuti Jehova uyanda kuti tuchitambule chipo eechi. Jehova utusyomezya kuti “tubambe twaambo” c anguwe kuchitila kuti atulekelele zibi zyesu chakumaninina. (Bala Isaya 1:18.) Tumulumba loko Tateesu, siluyando Jehova akaambo kakuti ulatulekelela zibi zyesu alubo tazilubi zintu zibotu nzitwakamuchitila.—Int. 103:9, 12; Heb. 6:10.
9. Nkamboonzi nituteelede kukkala katuyeeya zintu zibi nzitwakabisya chiindi?
9 Kuti kulikulipa mulandu azintu nzwaakachita chiindi, yeeya atala azintu nzulikuchita lino anzuzoochita muchiindi chilikunembo. Atulange chikozyano chamwaapostoli Pawulu. Wakalisola akaambo kakuti wakabapenzya loko maKkristu pesi wakalizi kuti Jehova wakali wamulekelela. (1 Tim. 1:12-15) Wakakkala kayeeya zibi nzyaakachita chiindi na? Inee taakakkala kachita oobo pe, mbuli mbaakatakkala kayeeya zintu nzyaakachita kuti abe muFarisi uulemekwa. (Flp. 3:4-8, 13-15) Pesi Pawulu wakaba musungu mumulimu wakukambawuka alubo wakalangila kuzintu nzyaakali kuzoochita kunembo. Mbuli Pawulu, tukonzyi kuchincha zintu zyakachitika chiindi pesi ulakonzya kutembawula Jehova akumubotezya lino. Alubo, ulakonzya kuyeeya atala azintu zibotu Jehova nzyaakusyomezya.
10. Niinzi nzitukonzya kuchita kuti zintu nzitwakachita chiindi kazili zyakabachisa bamwi?
10 Tulakonzya kukataazikana akaambo kazintu nzitwakachita chiindi zyakachisa bamwi. Niinzi zikonzya kutugwasya? Tulakonzya kuchita zyoonse nzitukonzya kuti tubambulule kwiinda mukukumbila lulekelelo akutondeezya kuti tulikulisola azintu nzitwakachita. (2 Kor. 7:11) Kumbila Jehova kuti abagwasye aabo bantu mbwaakabisizya. Jehova ulakonzya kumugwasya moonse kuti mulisimye akuti mwiinkilile kunembo kumubelekela kamulaamwi muluumuno.
11. Twiiyaanzi kuchikozyano chamupolofita Jona? (Langa chifanikisyo chili aachivumbyo.)
11 Yiya kuzintu zibi nzwaakachita chiindi alubo uzumizye Jehova kuti akubelesye kufumbwa nkwayanda kukubelesya. Atubone chikozyano chamupolofita Jona. Leza wakabuzya Jona kuti ayinke kuNiniva, pesi Jona wakachija kaya kuTashishi. Jehova wakamululamika Jona alubo Jona wakayiya kukulubizya kwakwe (Jon. 1:1-4, 15-17; 2:7-10) Jehova taakamukaka pe Jona kuti abe mupolofita wakwe. Leza wakamupa mweenya uumbi wakuti ayinke kuNiniva alubo Jona wakaswiilila katawayi-wayi. Jona taakazumizya kulubizya kwakwe kuti kumukachizye kuzumina kubelesegwa aaJehova.—Jon. 3:1-3.
Mupolofita Jona naakafutuka mwida lyamuswi mupati, Jehova wakamutuma lubo kuNiniva kuti akaambilizye mulumbe wakwe (Langa fuka 11)
JEHOVA ULATUUMBULIZYA KABELESYA MUUYA UUSALALA
12. Niinzi nzitweelede kuchita kuti tujane luumuno lwaLeza chiindi nitwachitikilwa zintu zichisa loko? (Bafilipi 4:6, 7)
12 Kabelesya muuya wakwe uusalala, Jehova ulatuumbulizya chiindi nitwaswaana zyiimo ziyumu. Atubone zyakachitikila Ron aCarol. Mwana wabo ulaaminyaka iili 39 wakalijeya. Bakaamba kuti: “Twakaswaanana aazintu zyiingi ziyumu loko, pesi kulijeya kwamwana wesu kwakatuchisa loko. Chiindi chiingi nitwakali kubaachilabila, twakali kukomba kuli Jehova alubo twakaba aaluumuno lupandulwidwe muli Bafilipi 4:6, 7.” (Bala.) Kuti kuli wakachitikilwa zintu zichisa loko, ulakonzya kukomba kuli Jehova kufumbwa chiindi kulikumubuzya zili aansi aamoyo. Alubo ulakonzya kuchita oobo kufumbwa chiindi nwaalimvwa kuyanda kuchita oobo. (Int. 86:3; 88:1) Kkala kukumbila Jehova kuti akupe muuya wakwe uusalala. Jehova unookugwasya.—Lk. 11:9-13.
13. Muuya uusalala utugwasya biyeni kuti twiinkilile kunembo katukomba Jehova chakusyomeka? (Ba-efeso 3:16)
13 Kuli buyumu-yumu na mbwaakaswaana bwakapa kuti umane manguzu? Muuya uusalala ulakonzya kukupa manguzu aakuti wiinkilile kunembo kukomba Jehova chakusyomeka. (Bala Ba-efeso 3:16.) Atulange zyakachitikila muchizi uutegwa Flora. Flora amulumaakwe bakali mamishinali. Chiindi mulumaakwe naakachita bwaamu, bakalekana. Flora wakaamba kuti: “Ndakawusa akaambo kakutasyomeka kwakwe alubo ndakamaninwa zyakuti ndakabula kuti ndisaangunine aali. Ndakakomba kuli Jehova kuti andipe muuya uusalala kuchitila kuti ndilisimye. Jehova wakandipa zintu nzindakali kuyandikana kuti ndipone aachiindi eecho alubo wakapa kuti ndizunde penzi lyakali kubonekaanga talizundiki pe.” Flora wakabona Leza mbaakamugwasya kuti ayungizye kumusyoma alubo wakaba aachoonzyo chakuti unoomugwasya chiindi choonse. Wakayungizya kuti: “Majwi aali muli Intembauzyo 119:32 apandulula Jehova mbaakandigwasya. Vesi eeyi yaamba kuti: ‘Caluyandisisyo ndinootobela nzila yamilawo yako nkaambo yebo waibambila busena mumoyo wangu.’”
14. Niinzi nzitweelede kuchita kuti tuzumizye muuya uusalala kuti utugwasye?
14 Nwaazwa aakukumbila muuya uusalala waJehova, niinzi nzweelede kuchita? Chita zintu zikonzya kukugwasya kuti ujane muuya uusalala buzuba abuzuba. Zintu eezi ziswaanizya kunjila miswaangano akukambawukila bamwi. Bala Jwi lyaJehova buzuba abuzuba. Eezi zilakugwasya kuti uyeeyesesye atala amizeezo yaJehova. (Flp. 4:8, 9) Chiindi nwaanoobala Bbayibbili, bikkila maanu kuzikozyano zyabantu bali muBbayibbili bakaswaana penzi lili mbuli lyako alubo uyeeyesesye atala aJehova mbaakabagwasya kuti balisimye. Sandra waambwa musule wakaswaanana aamapenzi aasiyene-siyene mubuumi bwakwe. Wakaamba kuti: “Chikozyano chaJosefa chakandisungwazya loko. Taakazumizya mapenzi ngaakali kuswaana akutajatwa kabotu kuti kupe kuti aleke kubelekela Jehova.”—Matl. 39:21-23.
JEHOVA ULATUUMBULIZYA KABELESYA BAKOMBIMA
15. Mbaani bakonzya kutuumbulizya alubo batugwasya biyeni? (Langa chifanikisyo.)
15 Chiindi nituli mubuyumu-yumu, bakombima balakonzya ‘kutuumbulizya loko.’ (Kol. 4:11) Jehova wakatondeezya mbatuyanda kwiinda mukutupa bakombima. Bakombima balakonzya kutuumbulizya kwiinda mukujana chiindi chakuba aamwi andiswe akutuswiilila chiindi nitubabuzya mbutulimvwa. Balakonzya kutusungwaazya aalugwalo lwamuBbayibbili naakuti kukomba aamwi andiswe. d (Rom. 15:4) Chimwi chiindi, mukwesu naakuti muchizi ulakonzya kutuyeezya maboneno ngalaawo Jehova atala andiswe akutugwasya kuti andiswe tube aamaboneno aayo. Alubo bakombima balakonzya kutugwasya munzila zisiyene-siyene, mbuli kutupa chakulya chiindi nitulikukataazikana kuchitila kuti tutakataazikani loko pe.
Beenzuma basimide mubukombi alubo basyomeka balakonzya kutuumbulizya akutugwasya (Langa fuka 15)
16. Niinzi nzitweelede kuchita kuti bamwi batugwasye?
16 Kuti bamwi batugwasye, tweelede kubakumbila. Bakwesu abachizi balatuyanda alubo balayanda kutugwasya. (Tus. 17:17) Pesi balakonzya kutaziba mbutulimvwa naakuti kutaziba nzituyandikana. (Tus. 14:10) Kuti kulikukataazikana, ulakonzya kwaambuula aabeenzinyokwe basimide mubukombi. Babuzye zintu zikonzya kukugwasya. Ulakonzya kwaambuula aamwaalu uumwi naakuti babili mbumvwananaabo. Bamwi bachizi bakabona kuti zilagwasya kwaambuula aawumwi muchizi uusimide mubukombi.
17. Mbuubuli bumwi buyumu-yumu bukonzya kutukachizya kuti bamwi batugwasye alubo kujana twabuzunda biyeni?
17 Tantamuka kulyaanzaanisya aabamwi. Akaambo kakuti kuli zintu zilikukuchisa mumoyo, ulakonzya kulimvwa kutayandi kubaamwi abamwi. Chimwi chiindi, bakwesu abachizi balakonzya kutakumvwisisisya pe naakuti kwaamba zintu zikutoneka. (Jak. 3:2) Utazumizyi zintu zili boobo kuti zikukachizye kugwasigwa aabakombinyokwe. Jehova ubelesya mbabo kuti bakugwasye. Mwaalu uutegwa Gavin ulaapenzi lyakukataazikana mumizeezo waamba kuti: “Chiindi chiingi tandiyandi pe kwaambuula naakuti kujana chiindi chakubaamwi abakombima,” pesi Gavin ubeleka changuzu kuti ajane chiindi chakubaamwi abakombinyina. Alubo eezi ngazyapa kuti alimvwe kali mbubo-mbubo. Muchizi uutegwa Amy wakaamba kuti: “Akaambo kazintu zyakandichitikila musule, kulandiyumina kusyoma bamwi. Pesi ndilikwiiya kubayanda akubasyoma bakombima mbuli Jehova mbachita. Ndilizi kuti kuchita zintu eezi kupa kuti Jehova abotelwe alubo kupa kuti andime ndibotelwe.”
WUMBULIZIGWA AAZISYOMEZYO ZYAJEHOVA
18. Niinzi nzitulangilila muchiindi chilikunembo alubo niinzi nzitweelede kuchita lino?
18 Lino-lino, Jehova uzoozigwisya zintu zyoonse zipa kuti tukataazikane azipa kuti tumvwe kuchisa. (Chi. 21:3, 4) Muchiindi chilikunembo, zintu zichisa zyakatuchitikila, ‘tazikozooyeeyegwa mumoyo.’ (Is. 65:17) Mbuli mbutwabona, Jehova ‘ulazyaanga zilonda zyesu’ nikuba lino. Jehova wakatupa zintu zyiingi zituumbulizya azitugwasya. Tweelede kuzumina kugwasigwa aanguwe. Tatweelede kuzumbuuzya pe kuti Jehova “ulaandaba andiswe.”—1 Pet. 5:7.
LWIIMBO 7 Jehova Onguzu Zyesu
a Mazina akachinchwa.
b Langa kabbokesi kati, “ Jehova ulaandaba anduwe.”
c Kuti “tubambe twaambo” aJehova, tweelede kusanduka kuzibi zyesu nzitubisya, tukumbile Jehova kuti atulekelele kwiinda mukuchincha maponeno eesu. Kuti twachita chibi chipati, tweelede kukumbila kugwasigwa aabaalu bamumbungano.—Jak. 5:14, 15.
d Muchikozyano, langa magwalo aali aansi aamutwe wamakani utii, “Kukataazikana” awuti, “Kuumbulizya” mukabbuku kati, Magwalo Aagwasya MaKkristu Mubuumi.
