Munyika zyoonse kuli kupya zyiindilide kwiinda minyaka yakiinda alubo kuli kuba amapenzi alichitikila akaambo kakuchincha-chincha kwabwiime bwakunze. Amubone malipoti atobela:

•   “Mwezi waJune wakapya loko kwiinda minyaka yoonse kuzwa chiindi bantu nibakasanguna kurekkoda bwiime bwakunze minyaka ili 174 yakiinda. ”—National Oceanic and Atmospheric Administration, U.S. Department of Commerce, July 13, 2023.

•   “Ku-Italy, Spain, France, Germany aku-Poland kulangililwa kupya zyiindilide izyakuti kuyeeyelwa kuti ma-temperature ankuko alakonzya kusika ku 48°C kapati mutusuwa twaku-Sicily aku-Sardinia. Kulakonzyeka kuti aaka kanooli kakusaanguna kuti kupye zyiindilide oobo mu-Europe.”—European Space Agency, July 13, 2023.

•   “Bwiime bwakunze nibuyinkilila kubija, kulangililwa kuti kuzoowa mvula mpati alubo izoopa kuti kube mazambangulwe anyonyoona.”—Stefan, director of hydrology, water and cryosphere at the World Meteorological Organization, July 17, 2023.

 Zilakukkataza na kumvwa atala bwiime bwakunze? Atumvwe nzilyaamba Bbayibbili atala nkani eeyi.

 Iiyi. Kupya zyiindilide abumwi bwiime bwakunze bwiindilide bweendelana azintu zyakaambwa muBbayibbili kuti ziyoochitika muchiindi eechino. Muchikozyano, Jesu wakapolofita kuti twakali kuzoobona “zintu ziyoosya,” naakuti “zintu zigambya alubo ziyoosya.” (Lukka 21:11; Good News Translation) Kupya zyiindilide kwamunyika zisiyene-siyene kwapa kuti biingi bayoowe kuti bantu bazoonyoonyona nyika.

 Peepe. Leza wakalenga nyika kuti ibe muunzi wesu kukabe kutamani; takoozumizya pe bantu kuti banyonyoone nyika. (Intembauzyo 115:16; Mukambausi 1:4) Leza uusyomezya kuti ‘uyoonyonyoona aabo balikunyonyoona nyika.’—Chiyubunuzyo 11:18.

 Bbayibbili litondeezya kuti Leza ngunguwe uukonzya kukwabilila nyika kuti itanyonyoonwi akaambo kabwiime bwakunze.

•   “[Leza] ulabatamika guwo pati; mayuwe aamulwizi alaumuna wi.” (Intembauzyo 107:29) Leza uulaanguzu zyakweendelezya bwiime bwakunze.Leza ulakonzya kubambulula bwiinze bwakunze bulikweeta mapenzi mubantu.

•   “Yebo ulailanganya nyika, wiipa kuti izyale micelo minji kapati alimwi akuti ibote kapati.” (Intembauzyo 65:9) Leza uyoolongezya nyika kuti ibe Paradaiso.

 Kuti uzibe zyiingi atala zisyomezyo zyamuBbayibbili zilachakuchita akubambululwa kwabwiime bwakunze, bala chiiyo chiti “Ino Nguni Uyakwiifwutula Nyika?”