Leza Ujanika Koonse-koonse Na?
Nsandulo iizwa muBbayibbele
Leza ulakonzya kubona zintu zyoonse akuchita kufumbwa nzyayanda. (Tusimpi 15:3; Bahebrayo 4:13) Nikuba boobo, Bbayibbele taliyiisyi kuti Leza ulajanika koonse-koonse naakuti muzintu zyoonse. Pesi litondeezya kuti Leza muntu ulaandawu njakkala.
Mbabede Leza: Leza muuya. (Johane 4:24) Bantu tabakonzyi pe kumubona. (Johane 1:18) Makani aalembedwe muBbayibbele atondeezya kuti Leza ulaandawu njakkala kutali kuti uli koonse-koonse.—Isaya 6:1, 2; Ciyubunuzyo 4:2, 3, 8.
Nkwakkala Leza: Leza ukkala kujulu nkututakonzyi kubona. Bbayibbele litondeezya kuti Leza uli ‘aabusena bwakwe mbwakkala kujulu.’ (1 Bami 8:30) Alubo litubuzya atala achiindi bangelo “nibakaboola kuzikwiima kumbele lya Jehova.” a Eezi zitondeezya kuti Leza uli aabusena mbwakkala.—Jobu 1:6.
Kuti Leza katajaniki koonse-koonse, zilachita na kuti abe aandaba andime?
Iiyi zilachita. Leza ulaandaba amuntu umwi awumwi. Nikuba kuti Leza ukkala kujulu pesi ulababona bantu bakkala aanyika bachita zintu zimubotezya alubo ulabagwasya. (1 Bami 8:39;2 Makani 16:9) Bona zintu zitondeezya kuti Jehova ulaandaba abakombi bakwe basyomeka:
Chiindi nukomba: Jehova ulakonzya kumvwa nzulikwaambuula mpawawo chiindi nukomba.—2 Makani 18:31.
Chiindi nukataazikene: “Jehova ulaafwaafwi abaabo batyompedwe mumoyo; aabo bapengede mumizeezo ulabafwutula.”—Intembauzyo 34:18.
Chiindi nuyanda kusala zyakuchita: Jehova ‘uyookululamika akukuyiisya,’ kabelesya Jwi lyakwe Bbayibbele.—Intembauzyo 32:8.
Njiisyo zitali nzizyo atala akuti Leza ulajanika koonse-koonse
Njiisyo iitali njiyo: Leza ulajanika muzintu zyoonse nzyaakalenga.
Kasimpe: Leza takkali aanyika pe naakuti muzintu nzyaakalenga. (1 Bami 8:27) Nichoonzyo kuti nyenyeezi azimwi zintu nzyaakalenga ‘zyaambilizya bulemu bwakwe.’ (Intembauzyo 19:1) Nikuba boobo, Leza takkali muzintu nzyaakalenga pe mbuli muntu uudilowa mbatakkali muzintu nzyaadilowa. Pesi zintu nzyaadilowa zilakonzya kutondeezya kuti muntu ooyo uli aaluzibo. Munzila iikozyenie, zintu nzyaakalenga Leza zitondeezya “bube bwakwe butalibonyi” buswaanizya nguzu, busongo aluyando.—Baroma 1:20.
Njiisyo iitali njiyo: Kuti Leza akonzye kuziba zintu zyoonse akuti aambwe kuti uli aanguzu weelede kujanika koonse-koonse.
Kasimpe: Muuya uusalala ninguzu Leza nzyabelesya. Leza ulakonzya kubelesya muuya uusalala kuti achite kufumbwa chintu, kufumbwa chiindi akundawu nkwayanda nikuba katawo kundawu eeyo.—Intembauzyo 139:7.
Njiisyo iitali njiyo: Intembauzyo 139:8 iyiisya kuti Leza ulajanika koonse-koonse nkaambo yaamba kuti: “Kuti naa ndatanta kujulu, unooliko ooko, alimwi kuti ndayala bulo bwangu mu Cuumbwe, bona akwalo ooko unooliko.”
Kasimpe: Lugwalo oolu talulikwaambuula atala ankwakkala Leza. Pesi lutondeezya kuti Leza ulakonzya kutugwasya kufumbwa nkutubede.
a Jehova ndizina lyaLeza lijanika muBbayibbele.
You May Also Like
NSANDULO ZYAMIBUZYO YAMUBBAYIBBELE
Muuya Uusalala Niinzi?
Bbayibbele lyaamba muuya uusalala kuti ‘maanza’ aaLeza.
ATALA ANDISWE
Kumbila Kuswayigwa
Mwaambuule atala amubuzyo wamuBbayibbili, naakuti yiya zyiingi atala aBakamboni baJehova.