Buzuba bumwi notwakali kulwana mfwaindi azibbakela amweenzuma, ndakamucisa kandiyeeya kuti mpasyoonto anu walicisa kapati. Ndakamuuma cibbakela, pele mukubula coolwe ndakamuuma ampemo. Ndakalimvwa bubi kapati akutalika kuyeeya kuti ambweni ndicileke buyo kulwana mfwaindi azibbakela. Nkaambo nzi cakacitika eeci ncocakandipa kuyeeya kuti ndicileke cisobano ncondakali kukkomanina kwamyaka minji kapati? Kusaanguna, andimwaambile cakandipa kutalika cisobano eeci.

 Ndakakomenena kufwaafwi a Buffalo, New York, mu U.S.A., mumukwasyi uukkomene alimwi toonse twakali ba Katolika basungu. Kunze lyaboobo, ndakali kuunka kuzikolo zyaba Katolika alimwi ndakali kugwasyilizya mupaizi muzintu zicitwa mucikombelo. Bazyali bangu bakali kuyanda kuti mebo amupati wangu musimbi tukazwidilile mubuumi. Aboobo, bakandizumizya kucita zisobano naa kubeleka mulimo uubelekwa mawoola masyoonto, pele tiizyakeelede kundinyonganya kucikolo. Eeci cakandipa kusima kandicili mwana.

 Nondakakkwanya myaka iili 17, ndakatalika kwiiya kulwana mfwaindi azibbakela. Kwamyaka minji, ndakali kuliyiisya kwamawoola otatwe mazuba aali 6 munsondo. Alimwi nsondo ansondo, ndakali kutola ciindi cilamfwu kweebelela mavidiyo akweezyeezya mbondikonzya kuyungizya luzyibo lwangu. Ndakali kukukkomanina kwiiya kulwana kumwi kandilivwumbide kumeso noliba leelyo nondakali kubelesya zilwanyo. Mfwaindi yangu yomwe buyo yakali kwaandula matina amapulanga. Aboobo ndakazwidilila kapati mucisobano eeci akuwina nkapu zinji mumizundano. Kulwana mfwaindi azibbakela cakaba ncecintu ncondakali kuyandisya mubuumi bwangu.

 Mpuwo njondakaba anjiyo yakandipa kuyeeya kuti ndazwidilila mubuumi. Nondakamana cikolo kuyunivesiti akupasa kapati, ndakalembwa mulimo mukkampani iimwi mpati mwalo mondakali kubeleka mulimo wamakkompyuta. Ndakalijisi ŋanda, ndakalisyabide, alimwi kumulimo ndakali kupegwa ma bonus. Nokuba kuti ndakali kulibonya mbuli kuti ndilibukkede, ndakali amibuzyo minji kujatikizya buumi.

 Kutegwa ndijane bwiinguzi kumibuzyo yangu, ndakatalika kuunka kucikombelo mazuba obilo mumvwiki akupaila kuli Leza kuti andigwasye. Kumane, buzuba bumwi mubandi ngotwakajisi amweenzuma wakacinca buumi bwangu. Ndakamubuzya kuti, “Sena kuli nookalibuzyide kuti buumi bujisi mpindu nzi?” Kumane ndakayungizya kuti: “Kayi kuli mapenzi manji alimwi akutalulama!” Wakandaambila kuti awalo wakali kulibuzya mibuzyo iikozyenye ayangu akuti wakajana bwiinguzi bukatalusya mu Bbaibbele. Wakandipa bbuku yakajisi mutwe wakuti Mulakonzya Kupona Kukabe Kutamani mu-Paradaiso Anyika. a Aboobo, wakandaambila kuti wakali kwiiya Bbaibbele a Bakamboni ba Jehova. Kumatalikilo, ndakawaya-waya nkaambo ndakali kuyeeya kuti tiindakeelede kubala mabbuku akucikombelo cimbi. Nokuba boobo, kuyanda kuzyiba bwiinguzi bwamibuzyo yangu, kwakandipa kuyanda kubona naa Bakamboni bayiisya kasimpe.

 Ndakagambwa kapati nondakazyiba Bbaibbele ncoliyiisya. Ndakaiya kuti makanze aa Leza aakusaanguna akali aakuti bantu kabapona kukabe kutamani muparadaiso anyika, akuti makanze aayo taacincide. (Matalikilo 1:28) Alimwi ndakagambwa kulibona izina lya Leza lyakuti Jehova, mu Bbaibbele lyangu lya King James version akwiiya kuti eeli ndezina ndyondakali kupailila nondakali kwiinduluka Mupailo wa Mwami. (Intembauzyo 83:18; Matayo 6:9) Alimwi, ndakamvwisya kaambo Leza ncalekede kupenga kuli munyika kwakaindi kasyoonto. Zyoonse nzyondakaiya zyakandigwasya kapati! Ndakakkomana citaambiki.

 Tandikalubi mbondakalimvwide nondakajanika kumiswaangano ya Bakamboni ba Jehova ciindi cakusaanguna. Bantu boonse bakali kumweta-mweta alimwi bakali kuyanda kuzyiba izina lyangu. Kumuswaangano wakusaanguna ngondakajanika, kwakapegwa makani aa Bbaibbele aalubazu aakali kwaamba mipailo njaswiilila Leza. Makani aaya akandikkomanisya mbwaanga ndakali kupaila kuli Leza kuti andigwasye. Kumane, ndakajanika ku Ciibalusyo calufwu lwa Jesu. Kumiswaangano eeyi, ndakagambwa kubona abana basyoonto kabatobelezya mu Bbaibbele lyabo ciindi magwalo naakali kubalwa. Kumatalikilo, tiindakazyi mbwaajanwa magwalo, pele Bakamboni bakandiyiisya mbolibelesyegwa Bbaibbele.

 Kuzwa waawo, ndakatalika kuzikkomanina kapati nzyobakali kuyiisya Bakamboni akaambo kakuti zyakalisumpukide, aboobo tiindakali kulovwa pe kumiswaangano. Lyoonse ndakali kwiiya zinji, mpoonya yamana miswaangano ndakali kumvwa kukulwaizyigwa akukatalusyigwa. Kumane Bakamboni bakandibuzya ikuti naa ndilayanda kwiiya Bbaibbele.

 Zintu nzyondakabona ku Bakamboni ba Jehova zyakaliindene kapati azintu nzyondakali kubona kucikombelo cangu. Ndakabona kuti balikamantene alimwi bajisi makanze mabotu aakuyanda kusolekesya kusikila mpobagolela kukkomanisya Leza. Alimwi ndakasinizya kuti batondezya bube mbobajisi Banakristo beni-beni, nkokuti luyando akati kabo.—Johane 13:35.

 Mbondakali kuyaabwiiya Bbaibbele, ndakacinca mumbazu zinji kutegwa kandipona kweelana azyeelelo zyamu Bbaibbele. Nokuba boobo, ndakali kulimvwa kuti tandikonzyi kucileka kulwana mfwaindi azibbakela. Kuliyiisya akutola lubazu mumizundano kwakali kundikkomanisya kapati. Nondakamwaambila makani aaya Kamboni wakali kundiyiisya Bbaibbele, wakandikulwaizya kuti, “Kozumanana buyo kwiiya, ndilizyi kuti uyoocikonzya kusala ciluzi.” Aayo ngamajwi ngondakali kuyanda kumvwa. Zintu nzyondakali kwiiya, zyakandikulwaizya kuyanda kumukkomanisya Jehova Leza.

 Cintu cakandipa kuleka cisobano eeci, nkaambo nkondaambide kumatalikilo, ciindi nondakamuuma cibbakela ampemo mweenzuma ngotwakali kusobana limwi. Cakandipa kukkala ansi akuyeeyesya naa kuzumanana kulwana mfwaindi azibbakela kulakonzya kundipa kuba sikutobela Kristo siluumuno. Kulugwalo lwa Isaya 2:3, 4 ndakayiide kuti aabo batobela malailile aa Jehova “tabakaiyi limbi nkondo pe.” Alimwi Jesu wakayiisya bantu kuba basiluumuno noliba leelyo nobacitilwa cakutalulama. (Matayo 26:52) Aboobo, ndakacileka cisobano ncondakali kuyanda kapati.

 Kuzwa waawo, ndakatobela lulayo lwamu Bbaibbele lwakuti, “koliyiisya omwini kojisi makanze aakubelekela Leza cakulyaaba.” (1 Timoteyo 4:7) Ciindi coonse anguzu nzyondakali kubelesya mukulwana mfwaindi azibbakela, lino ndicibelesya kucita zintu zyakumuuya. Musimbi ngotwakasyabene limwi tanaakazizumina zintu nzyondakali kwiiya mu Bbaibbele, aboobo twakacimana cisyabo. Ndakabbapatizyigwa kandili umwi wa Bakamboni ba Jehova mu January 24, 1987. Tiilyakalampa, ndakaba mukambausi waciindi coonse, akwaaba ciindi cangu kuyiisya bantu bamwi Bbaibbele. Kuzwa leelyo ndakazumanana mumulimo waciindi coonse, akubeleka kwaciindi cili mbocibede kumaofesi mapati aa Bakamboni ba Jehova ku New York, U.S.A.

 Lino mbwaanga ndilikazyi kasimpe kajatikizya Leza, ndacijana cintu ncondakabulide mubuumi bwangu. Tandicilimvwi kuusa pe. Muciindi caboobo, buumi bwangu lino bulaampindu kapati, ndili abulangizi bubotu bwakumbele alimwi ndilimvwa kukkomana ncobeni. Ndicikukkomanina kunyanyaasya mubili bunji bwaziindi, pele mazuba aano tacili ncecintu ncondiyandisya kapati. Lino ncondibikkila maano kapati nkubelekela Jehova Leza.

 Nondakacili kulwana mfwaindi azibbakela, lyoonse ndakali kupakamana kujatikizya bantu bakandizingulukide akuyeeya nzila mbondikonzya kulikwabilila ikuti umwi wandilwana cakutayeeyela. Amazuba aano ndilapakamana, kutali kuti ndilikwabilile, pele kuti ndibagwasye bantu. Bbaibbele lyandigwasya kuba mwaabi alimwi amulumi uuli kabotu kubakaintu bangu ba Brenda.

 Kulwana mfwaindi azibbakela ndakali kukukkomanina kapati. Pele mazuba aano ndicita cintu ciinda kukkomanisya. Bbaibbele lilacaamba kabotu noliti: “Kunyanyaasya mubili kugwasya buyo asyoonto, pele kubelekela Leza cakulyaaba kulagwasya muzintu zyoonse, nkaambo kujisi cisyomezyo cabuumi bwalino aboobo bulangilwa kumbele.”—1 Timoteyo 4:8.