Ibbaibbele Lisalala ndibbuku lijisi makani aazwa kuli Leza aakalembelwa ndiswe toonse. Tweelede kuliiya kutegwa tumuzyibe Sikulyaanza. (Johane 17:3; 2 Timoteyo 3:16) Mu Bbaibbele, Jehova Leza ulayubununa makanze ngajisi kujatikizya bantu alimwi amunzi wabo waanyika.—Matalikilo 3:15; Ciyubunuzyo 21:3, 4.

Kunyina bbuku limbi libajatikizya boobu bantu mubuumi. Ibbaibbele litukulwaizya kuzinzibala kuyeeya bube bwa Jehova bwaluyando, luse, alimwi alubomba. Lilapa bulangizi akugwasya bantu kuliyumya nomuba mubukkale bukatazya kapati. Alimwi lilayubununa zintu zyamunyika eeyi iziteendelani akuyanda kwa Leza kulondokede.—Intembauzyo 119:105; Bahebrayo 4:12; 1 Johane 2:15-17.

Ikusaanguna lyakalembedwe mu Chihebrayo, mu Chiaramu alimwi amu Chigiriki. Lino Bbaibbele lyasandululwa lyoonse naa cibeela buyo mumyaambo iinda ku 3,000. Ndebbuku ilyasandululwa akumwaigwa kapati kwiinda mabbuku oonse munyika. Oobu mboceelede kuba. Businsimi bwamu Bbaibbele bwaamba kuti: “Makani mabotu aa Bwami aaya [nkokuti mulumbe uujanika mu Bbaibbele] ayookambaukwa munyika yoonse kuti bukabe bumboni kumasi oonse, mpoonya mamanino ayoosika.”—Matayo 24:14.

Akaambo kakuzyiba mbouyandika mulumbe wamu Bbaibbele, makanze eesu taali buyo aakumwaya Bbaibbele lyeendelana amalembe aakusaanguna, pele akuti kalilimvwisya alimwi kalitakatazyi kubala. Zibalo izili mu Makani Aayungizyidwe izijisi mitwe yakuti “Nzila Zigwasya Mukusandulula Bbaibbele,” “Mbolibambidwe Bbaibbele Eeli,” alimwi a “Mbotwakaba aa Bbaibbele” zilapandulula nzila zimwi zyabusanduluzi izyakatobelwa alimwi abupanduluzi bwazibeela zimwi zyamu Bbaibbele eeli.

Aabo bamuyanda Jehova Leza alimwi akumukomba bayanda busanduluzi bwa Jwi lya Leza ibuluzi alimwi bulimvwisya. (1 Timoteyo 2:4) Akaambo kaceeci, Bbaibbele eeli lyakasandululwa mu Chitonga kweelana amakanze eesu aakusandulula Bbaibbele lya Busanduluzi Bwanyika Mpya mumyaambo minji. Tusyoma kuti busanduluzi oobu bwa Magwalo Aasalala buyoomugwasya kapati nobasikubala nomusoleka ‘kuyandaula Leza . . . akumujana ncobeni.’—Milimo 17:27.