1 Samuele 1:1-28
1 Lino kwakali mwaalumi umwi waku Ramatayimu-zofimu*+ mumalundu aa Efraimu,+ izina lyakwe wakali Elikana,+ mwana wa Jerohamu, mwana wa Elihu, mwana wa Tohu, mwana wa Zufi, imuna Efraimu.
2 Wakajisi bamakaintu bobilo; umwi wakali Hana eelyo uumbi wakali Penina. Lino Penina wakalijisi bana, pele Hana tanaakajisi bana pe.
3 Mwaka amwaka mwaalumi ooyu wakali kuzwa mumunzi wakwe akuunka kuyookomba* akutuula zipaizyo kuli Jehova wamakamu ku Silo.+ Ooko bana basankwa bobilo iba Eli, Hofeni a Finehasi+ nkobakali kubeleka kabali bapaizi ba Jehova.+
4 Buzuba bumwi Elikana naakatuula cipaizyo, wakapa mukaintu wakwe Penina abana bakwe boonse basankwa abasimbi+ zyaabilo zyacipaizyo eeco,
5 pele Hana wakamupa caabilo cilibedelede, nkaambo Hana ngonguwe ngwaakali kuyandisya; pele Jehova tanaakamupede bana.*
6 Kunze lyaboobo awalo mukazinyina wakali kumusampaula cakutaleka kutegwa ause akaambo kakuti Jehova tanaakamupede bana.
7 Oobo Penina mbwaakali kucita mwaka amwaka; kufwumbwa ciindi Hana naakali kuunka kuŋanda ya Jehova,+ mukazinyina wakali kumusampaula kapati cakuti wakali kulila akutalya.
8 Pele Elikana mulumaakwe wakati kulinguwe: “Hana, ino ncinzi ncolila, nkaambo nzi ncotalyi alimwi nkaambo nzi ncouside kapati?* Sena tandiyandiki kulinduwe kwiinda bana basankwa bali kkumi?”
9 Mpoonya Hana wakanyamuka nobakamana kulya akunywa ku Silo. Aciindi eeco, Eli mupaizi wakalikkede acuuno mumbali aamunsende watempele*+ lya Jehova.
10 Hana wakaluuside kapati,* aboobo wakatalika kupaila kuli Jehova+ kumwi kalila citaambiki.
11 Kumane wakapanga cikonke eeci: “O Jehova wamakamu, ikuti naa undigwasye mumapenzi aangu akundiyeeya ndemubelesi wako, alimwi kuti utandilubi ndemubelesi wako akuti undipe mwana musankwa+ ndemubelesi wako, ndiyoomupa kuli Jehova mazuba oonse aabuumi bwakwe alimwi masusu aakwe taakwe naayoogelwa pe.”+
12 Lino naakali kupaila kwaciindi cilamfwu kubusyu bwa Jehova, Eli wakali kulanga mulomo wakwe.
13 Hana wakali kwaambaula mumoyo wakwe, milomo yakwe ilikke njiyakali kuputauka, pele jwi lyakwe tiilyakali kulimvwisya. Aboobo Eli wakali kuyeeya kuti wakolwa.
14 Eli wakati kulinguwe: “Ino unookoledwe kwaciindi cilamfwu buti? Koleka kunywa waini.”
15 Amvwe boobo Hana wakati: “Peepe simalelaangu! Ndili mukaintu uuside kapati mumoyo;* alimwi nsinywide waini naa cakunywa cili coonse cikola pe, pele ndaamba buyo zili mumoyo wangu kubusyu bwa Jehova.+
16 Utandiboni kuba mukaintu wabuyo ndemubelesi wako, ndaambaula kusikila lino akaambo kakuusa kwangu kupati alimwi amapenzi aangu.”
17 Mpoonya Eli wakavwiila ulaamba: “Koya muluumuno, alimwi Leza wa Israyeli akupe cintu ncoomulomba.”+
18 Aboobo Hana wakati: “Kondifwida luzyalo ndemubelesi wako.” Eelyo mukaintu ooyu wakaunka akuyoolya, tanaakacuuside alimwi pe.
19 Mpoonya bakabuka mafwumofwumo akuvwuntama ansi kubusyu bwa Jehova, kuzwa waawo bakapiluka kuŋanda yabo ku Rama.+ Lino Elikana wakaswaangana amukaintu wakwe Hana, eelyo Jehova wakamucebuka.*+
20 Mumwaka ngoonya ooyo* Hana wakamita alimwi wakazyala mwana musankwa, eelyo wakamuulika+ zina lya Samuele,* nkaambo wakati, “ndakamulomba buya kuli Jehova.”
21 Mukuya kwaciindi, Elikana wakaunka amukwasyi wakwe woonse kuyootuulila Jehova+ cipaizyo camwaka amwaka alimwi akupa cituuzyo cakwe cacikonke.
22 Pele Hana tanaakaunka pe,+ nkaambo wakati kumulumaakwe: “Aakuleka buyo kunyonka mwana ooyu, ndiyoomuleta; mpoonya uyoolibonya kubusyu bwa Jehova akuzumanana kukkala ooko.”+
23 Mpoonya Elikana mulumaakwe wakati kulinguwe: “Kocita kufwumbwa ncoyeeya kuti cili kabotu.* Kkala aŋanda kusikila ukamulesye. Jehova aazuzikizye majwi ngowaamba.” Aboobo Hana wakasyaala aŋanda akulela mwanaakwe kusikila naakamulesya.
24 Aboobo mbwaakamulesyela buyo, wakamutola ku Silo, akutolelezya amupoho wamyaka yotatwe, efa* yomwe yafulaulu ansazi yomwe mpati yawaini+ akunjila anguwe muŋanda ya Jehova ku Silo.+
25 Mpoonya mupoho bakamujaya akuleta mulombe kuli Eli.
26 Kumane Hana wakati: “Kondijatila simalelaangu! Mbubonya mboli muumi,* mebo ndendime mukaintu uulya ngookaimvwi limwi mubusena obuno kandipaila kuli Jehova.+
27 Ooyu ngomulombe ngondakalomba eliya nindakali kupaila, Jehova wakakwiingula kulomba kwangu.+
28 Lino mebo ndamupa* kuli Jehova. Mazuba oonse aabuumi bwakwe, wapegwa kuli Jehova.”
Mpoonya walo* wakavwuntama ansi kuli Jehova.
Bupanduluzi buyungizyidwe
^ Naa “waku Rama, muna Zofi.”
^ Naa “kuyookotama.”
^ Mu Chihebrayo, “wakajalide zyalilo lyakwe.”
^ Naa “nkaambo nzi ncolimvwide bubi mumoyo?”
^ Nkokuti, tente lyakubunganina.
^ Naa “wakalipengede kapati mumoyo.”
^ Naa “mukaintu uupengede kapati mumoyo.”
^ Mu Chihebrayo, “wakamuyeeya.”
^ Naa ambweni, “Mukuya kwaciindi.”
^ Nkokwaamba kuti “Zina lya Leza.”
^ Mu Chihebrayo, “ncibotu mumeso aako.”
^ Efa yakaleelene amalita aali 22. Amubone Makani Aayungizyidwe B14.
^ Naa “Ndakonkezya buumi bwako.”
^ Mu Chihebrayo, “ndamukweletesya.”
^ Kulangilwa kuti iwaambwa aawa ngu Elikana.
