Baefeso 3:1-21
3 Akaambo kaceeci, mebo nde Paulo, imwaange+ wa Kristo Jesu akaambo kandinywe, nobantu bamasi—
2 ikuti naa mubwini mwakamvwa makani aabubanzi+ bwaluzyalo lwa Leza mbondakapegwa akaambo kandinywe,
3 kuti kwiinda muciyubunuzyo ndakazyibisyigwa maseseke aa Leza, mbubonya mbundakamulembela musyule mubufwaafwi buyo.
4 Aboobo nomubala makani aaya, mulakonzya kubona mbundaamvwisya maseseke aa Kristo.+
5 Mumazyalani aambi, maseseke aaya tanaakayubununwa kubantu mbuli mbwaayubununwa lino kwiinda mumuuya kubaapostolo alimwi akubasinsimi bakwe ibasalala,+
6 ikuti kwiinda mukukamantana a Kristo Jesu alimwi akwiinda mumakani mabotu bantu bamasi beelede kuba basikukonanyina azizonyina zyamubili omwe+ alimwi ibajatikizyidwe antoomwe andiswe mucisyomezyo.
7 Ndakaba mubelesi waceeci kweelana acipego citabbadelwi caluzyalo lwa Leza ncondakapegwa kwiinda mumulimo uucitwa anguzu zyakwe.+
8 Mebo ndemuntu muniini ikwiinda musyoonto akati kabasalali boonse,+ ndime ndakapegwa luzyalo+ lwa Leza oolu kuti ndaambilizye makani mabotu aajatikizya lubono lwa Kristo luteeli kuli bamasi,
9 alimwi akugwasya bantu boonse kubona mbwaayendelezyegwa maseseke aa Leza+ aayo kuzwa lili alili aakasisidwe muli Leza, ooyo wakalenga zintu zyoonse.
10 Eeci cakaba boobo kutegwa lino mfwulumende abeendelezi bali mumasena aakujulu bakonzye kuzyiba kwiinda mumbungano+ busongo bwa Leza bwamisyobo-misyobo,+
11 ikweelana amakanze aatamani aayo ngaakabamba kwiinda muli Kristo+ Jesu Mwami wesu.
12 Kwiinda mulinguwe tulijisi coolwe eeci cakwaamba cakutayoowa akumusikila cakwaanguluka+ akaambo kalusyomo ndotujisi mulinguwe.
13 Aboobo ndimulomba kuti mutatyompwi pe akaambo kamapenzi ngondipengela ndinywe, nkaambo mapenzi aaya mbulemu kulindinywe.+
14 Aboobo ndafwugama kuli Taata,
15 kuli yooyo mukwasyi uuli woonse kujulu alimwi aanyika, nkowakatambula zina lyanguwo.
16 Ndipailila kuti kwiinda mubulemu bwakwe butalikomeneni, amupe kuba anguzu mumyoyo yanu+ kwiinda munguzu zyamuuya wakwe,
17 alimwi akuti kwiinda mulusyomo lwanu Kristo akkale mumyoyo yanu muluyando.+ Amusimpe miyanda+ alimwi akuzyata* antalisyo,+
18 kutegwa antoomwe abasalali boonse mukonzye kubuzyiba cakumaninina bwamba, bulamfwu, bulamfwu bwakuya mujulu alimwi abulamfwu bwakuyaansi bwakasimpe,
19 alimwi akuzyiba luyando lwa Kristo+ lupati kwiinda luzyibo, kutegwa mukonzye kuzuzyigwa azintu zyoonse zikkwene nzyapa Leza.
20 Lino kuli yooyo uukonzya kucita zintu zinji kapati kwiinda aali zyeezyo nzyotumulomba naa nzyotuyeeyela,+ kweelana anguzu zyakwe zibeleka mulindiswe,+
21 kulinguwe akube bulemu kwiinda mumbungano alimwi akwiinda muli Kristo Jesu kumazyalani oonse mane kukabe kutamani. Ameni.
Bupanduluzi buyungizyidwe
^ Bamwi baamba kuti “kuzyamya.”
