Baroma 11:1-36
11 Aboobo ndibuzya kuti, Sena Leza wakabakaka bantu bakwe?+ Peepe! Nkaambo andime ndili muna Israyeli uuzwa mulunyungu lwa Abrahamu alimwi amumukowa wa Benjamini.
2 Leza kunyina naakabakaka bantu bakwe pe aabo mbaakasaanguna kubikkila maano.+ Sena tamuzyi ncolwaamba lugwalo kujatikizya Elija, nakombelezya Leza kuti abasubule bana Israyeli?
3 Wakati: “O Jehova,* bantu aaba bajaya basinsimi bako, bazinyonyoona zipaililo zyako alimwi mebo endikke ndime ndasyaala, eelyo lino balandiyandaula kuti bandijaye.”+
4 Pele ino Leza wakamwiingula buti? Wakati: “Ndicijisi baalumi bali 7,000 aabo ibatakamufwugamina Baala.”+
5 Aboobo munzila eeyi, kwaciindi cino alimwi nkobali basyeede+ aabo bakasalwa kwiinda muluzyalo lwa Leza.
6 Lino ikuti naa bakasalwa akaambo kaluzyalo lwa Leza,+ ikusala ooku takucili akaambo kamilimo pe;+ nokwali boobo, luzyalo lwa Leza nilwatacili luzyalo pe.
7 Aboobo ino twaambe nzi? Cintu eeco ncobayandaulisya bana Israyeli tiibakacijana pe, pele aabo bakasalwa bakacijana.+ Aaba bamwi boonse bakaba basicinguni,+
8 mbubonya mbokulembedwe kuti: “Leza wabapa muuya wakoona ŋonzi zyalufwu,+ meso aataboni alimwi amatwi aatamvwi kusikila buzuba buno.”+
9 Awalo Davida waamba kuti: “Tebulu lyabo alibabede kakole, kooze, cilebyo alimwi acisubulo.
10 Meso aabo aasiye mbi kutegwa bataboni, alimwi lyoonse kaboongomene misana.”+
11 Aboobo andibuzye kuti, Sena bakalebwa akuwida limwi? Peepe! Pele kuwa kwabo kwakabapa lufwutuko bantu bamasi kutegwa babape kuba amunyono.+
12 Lino ikuti naa kuwa kwabo caamba zilongezyo kunyika, alimwi ikuceya kwabo caamba zilongezyo kubantu bamasi,+ eelo kaka kuyooba zilongezyo zinji akaambo kamweelwe wabo uukkwene!
13 Lino ndaambaula andinywe nobantu bamasi. Mbwaanga ndili mwaapostolo kuli bamasi,+ ndilaulemeka mulimo wangu+
14 ikutegwa ikuti naa cakonzyeka ndibape kuba amunyono bantu bamusyobo wangu alimwi akufwutula bamwi akati kabo.
15 Nkaambo ikuti kukakwa+ kwabo caamba luyanzano kunyika, ino kutambulwa kwabo kulaamba nzi? Sena tacikabi buyo mbuli kubuka kuzwa kubafwu?
16 Alimwi ikuti cibeela cafulaulu uukandidwe icibonwa kuti micelo mitaanzi kacisalala, nkokuti mulwi woonse awalo ulasalala; alimwi ikuti muyanda kausalala, nkokuti ayalo mitabi ilasalala.
17 Nokuba boobo, ikuti naa mitabi imwi yakagonkwa eelyo nywebo, nokuba kuti muli mutabi wacisamu camaolifa camusyokwe, mwakalumikizyigwa akati kanjiyo akulya zintu zinono zizwa kumiyanda yacisiko camusamu wamaolifa,
18 mutanoolisumpuli kumitabi eeyo. Pele ikuti kamulisumpula kulinjiyo,+ kamuyeeya kuti tamuli ndinywe pe nomutabilila miyanda, pele miyanda njiimutabilila.
19 Aboobo inga mwaamba kuti: “Mitabi eeyo yakagonkwa kutegwa kulumikizyigwe ndime.”+
20 Aayo masimpe! Akaambo kakubula lusyomo kwabo bakagonkwa,+ pele nywebo muliimvwi akaambo kalusyomo.+ Lino mutalisumpuli, pele kamuyoowa.
21 Nkaambo ikuti naa Leza tanaakailekela kuzumanana mitabi iini-ini, nkokuti andinywe takamulekeli kuzumanana pe.
22 Aboobo amubone luzyalo lwa Leza+ abukali bwakwe. Kuli bukali kuli baabo bakawa,+ pele kulindinywe kuli luzyalo lwa Leza, kufwumbwa kuti mwazumanana muluzyalo lwakwe; buyo-buyo, anywebo muyookwezyulwa.
23 Abalo mbubonya, ikuti tiibazumanana kubula lusyomo, bayoolumikizyigwa,+ nkaambo Leza ulakonzya kubalumikizya kucinyina alimwi.
24 Nkaambo ikuti nywebo nomwakagonkwa kucisamu camaolifa camusyokwe mwakalumikizyigwa kucisamu camaolifa cisyangidwe mumuunda kakuli tabusyi mboceelede kuba, cinooli cuuba-uba kapati kaka kumitabi eeyi iini-ini kulumikizyigwa alimwi kucisamu camaolifa icinyina!
25 Nkaambo tandiyandi kuti nywebo bakwesu kamutaazyi maseseke aa Leza aaya,+ kutegwa mutacenjeli mumeso aanu nobeni; kuti cibeela cimwi cabana Israyeli baba basicinguni kusikila mweelwe uukkwene wabantu bamasi uyobololwe,
26 aboobo munzila eeyi bana Israyeli boonse+ bayoofwutulwa. Mbubonya mbokulembedwe kuti: “Muvwuni* uyooboola kuzwa mu Ziyoni+ akubalesya kucita micito mibi balunyungu lwa Jakobo.
27 Alimwi eeci ncizuminano cangu ambabo,+ ndaakugusya zibi zyabo.”+
28 Masimpe, ikujatikizya makani mabotu, balo mbalwani akaambo kandinywe; pele ikujatikizya kusala kwa Leza, balo mbayandwa akaambo kabamausyi.+
29 Lino Leza takausi kujatikizya baabo mbapa zipego akwiita.
30 Nkaambo mbubonya andinywe mbomwatakali kumuswiilila Leza,+ pele lino mwakafwidwa luse+ akaambo kakutaswiilila kwabo,+
31 mbubonya buyo abalo aaba lino tabaswiilili calo capa kuti mufwidwe luse, kutegwa abalo beni kubagama bafwidwe luse lino.
32 Nkaambo Leza wabajalila boonse antoomwe mukutaswiilila,+ ikutegwa boonse abafwide luse.+
33 Eelo kaka talweeli lubono, busongo aluzyibo lwa Leza! Eelo kaka tazitobeleki mbeta zyakwe alimwi kunyina uunga waziteelela nzila zyakwe zyoonse!
34 Nkaambo “ino nguni waizyiba mizeezo ya Jehova,* naa nguni waba sikumulaya?”+
35 Naa, “ino nguni wasaanguna kumupa cintu kutegwa cipilusyigwe kulinguwe?”+
36 Nkaambo zintu zyoonse zyakazwa kulinguwe alimwi nkozili kwiinda mulinguwe alimwi akaambo kanguwe. Kulinguwe akube bulemu kukabe kutamani. Ameni.
Bupanduluzi buyungizyidwe
^ Amubone Makani Aayungizyidwe A5.
^ Naa “Mufwutuli.”
^ Amubone Makani Aayungizyidwe A5.
