Baroma 4:1-25
4 Mbwaanga cili boobo, ino inga twaamba kuti Abrahamu taateesu wakunyama wakajana mpindu nzi?
2 Mucikozyanyo, ikuti Abrahamu naakaambwa kuti mululami akaambo kamilimo, nkokuti naakajisi kaambo kamupa kulidunda, pele ikutali kuli Leza pe.
3 Nkaambo, ino kayi lugwalo lwaamba buti? “Abrahamu wakasyoma Jehova,* eelyo wakabonwa kuti mululami.”+
4 Lino kumuntu uubeleka, imali ngavwola taaboni kuti nduzyalo pe, pele waabona kuti ncikwelete.
5 Pele muntu uutasyomi milimo yakwe mwini, pele uusyoma Leza ooyo uukonzya kwaamba sizibi kuti mululami, imuntu uuli boobo ubonwa kuti mululami akaambo kalusyomo lwakwe.+
6 Mbubonya awalo Davida mbwaamba kujatikizya lukkomano lwamuntu ooyo Leza ngwaamba kuti mululami ikutali akaambo kamilimo kuti:
7 “Balikkomene aabo bajatilwa milandu yabo abaabo bajisi zibi izyavwumbwa;*
8 ulikkomene muntu ooyo Jehova* ngwatabikkilili zibi zyakwe.”+
9 Aboobo sena lukkomano oolu lusikila buyo bantu bapalwidwe naa lulabasikila abantu batapalwidwe?+ Nkaambo twaamba kuti: “Abrahamu wakabonwa kuti mululami akaambo kalusyomo lwakwe.”+
10 Ino wakali mubukkale buli buti naakabonwa kuti mululami? Sena ndeelyo naakapalwidwe naa katanapalulwa? Talili leelyo naakapalwidwe pe, pele ndeelyo naatakaningapalulwa.
11 Alimwi wakatambula citondezyo+ nkokuti bupalule, kacili cisinizyo cabululami kwiinda mulusyomo ndwaakajisi katanapalulwa, kutegwa abe usyi wabaabo boonse bajisi lusyomo+ nobatapalwidwe, ikutegwa babonwe kuti mbalulami;
12 alimwi akuti abe usyi walunyungu lupalwidwe, ikutali buyo kuli baabo batobela bupalule, pele akuli baabo ibalutobela kapati lusyomo oolo ndwaakajisi taateesu Abrahamu+ katanapalulwa.
13 Nkaambo Abrahamu naa lunyungu lwakwe tanaakatambula cisyomezyo cakuti uyooba sikukona nyika kwiinda mumulawo pe,+ pele nkwiinda mubululami akaambo kalusyomo lwakwe.+
14 Nkaambo ikuti aabo beendelezyegwa amulawo mbaasikukona, nkokuti lusyomo luba lwabuyo acalo cisyomezyo cajaigwa.
15 Mulawo nguupa kuti muntu asikilwe bukali,+ pele nokutakwe mulawo akwalo kusotoka mulawo takuko.+
16 Aboobo wakapegwa cisyomezyo akaambo kalusyomo ikutegwa kwiinda muluzyalo lwa Leza+ cisyomezyo eeco cisinizyigwe kulunyungu lwakwe loonse,+ ikutali buyo kuli baabo batobela Mulawo pele akuli baabo batobela lusyomo lwa Abrahamu ooyo uuli ngutaateesu toonse.+
17 (Cili boobo kweelana ambokulembedwe kuti: “Ndakusala kuti ube usyi wamisyobo minji.”)+ Cisyomezyo eeci cakaambwa kumbele lya Leza ooyo ngwaakali kusyoma, uubusya bafwide akwaamba zintu zitanacitika mbuli kuti zilicitikide kale.*
18 Nokuba kuti kwakanyina kaambo kakubeda abulangizi, pele akaambo kabulangizi wakasyoma kuti ulakonzya kuba usyi wamisyobo minji kweelana amajwi aakaambwa aakuti: “Oobu mboluyooba lunyungu lwako.”+
19 Alimwi nokuba kuti lusyomo lwakwe tiilwakamana, wakayeeya mubili wakwe lino iwakali kubonwa kuti ulifwide kale, (mbwaanga wakajisi myaka iitandila ku 100 ),+ alimwi akuti Sara tanaakali kuzyala.+
20 Pele akaambo kacisyomezyo ca Leza tanaakazungaana pe mulusyomo akutalika kudooneka; pele wakayuma akaambo kalusyomo lwakwe, wakalemeka Leza
21 alimwi wakalisinizyide cakumaninina kuti eezyo nzyaakasyomezya Leza wakali kukonzya akuzizuzikizya.+
22 Aboobo, “wakabonwa kuti mululami.”+
23 Pele majwi aakuti “wakabonwa kuti mululami” taakalembelwa Abrahamu alikke pe,+
24 pele alatujatikizya andiswe notweelede kubonwa boobo nkaambo tulamusyoma Leza iwakabusya Jesu Mwami wesu kuzwa kubafwu.+
25 Wakaabwa akujaigwa akaambo kamilandu yesu+ alimwi wakabusyigwa kutegwa Leza atubone kuti tuliluleme.+
Bupanduluzi buyungizyidwe
^ Amubone Makani Aayungizyidwe A5.
^ Naa “izyalekelelwa.”
^ Amubone Makani Aayungizyidwe A5.
^ Naa ambweni, “akwaamba zintu zitako mbuli kuti nkozili.”
