Jakobo 2:1-26
2 Bakwesu, sena mutondezya lusyomo mu Mwami wesu uulemekwa Jesu Kristo, pele kumwi mulasalulula?+
2 Nkaambo ikuti muntu uusamide nweenwe zyangolida kuminwe alimwi azisani zyeebeka wanjila momuswaangene, pele alimwi awalo muntu mucete uusamide zisani zilaatombe wanjila,
3 sena mulemeka yooyo uusamide zisani zyeebeka akwaamba kuti, “Amukkale waawa abusena oobu bubotu,” pele mucete mumwaambila kuti, “Yebo koide kwiimvwi,” naa kuti, “Kkala waalya munsi aacilyatilo camaulu aangu”?+
4 Ikuti naa mboobo, sena tamusalululani akati kanu,+ alimwi sena tiimwaba babetesi bakosola milandu munzila mbyaabi?+
5 Amuswiilile, bakwesu nomuyandwa. Sena Leza tanaakasala baabo nyika eeyi mboibona kuti mbacete kuba bavwubi mulusyomo+ alimwi abasikukona Bwami, oobo mbwaakasyomezya kuli baabo bamuyanda?+
6 Pele nywebo mwasampaula mucete. Sena tabali bavwubi ibamudyaaminina+ akumukwelaanya kumutola kunkuta?
7 Sena tabasampauli zina libotu eelyo ndimwakapegwa?
8 Lino ikuti naa mulautobela mulawo wamwami kweelana alugwalo lwaamba kuti, “Weelede kuyanda simukobonyoko mbubonya mbuli mboliyanda omwini,”+ mucita kabotu kapati.
9 Pele ikuti kamuzumanana kusalululana,+ mucita cibi, alimwi mulasinswa amulawo ooyu kuti muli basikusotoka mulawo.+
10 Nkaambo ikuti umwi kabamba milawo yoonse mu Mulawo pele wasotoka omwe, waba sikwiisotoka yoonse.+
11 Nkaambo ooyo wakaamba kuti: “Utaciti bumambe,”+ alimwi wakati: “Utajayi.”+ Lino ikuti kotaciti bumambe pele kojaya bantu, waba sikusotoka mulawo.
12 Amuzumanane kwaambaula alimwi akulilemeka mbuli baabo ibayoobetekwa amulawo wabantu baangulukide.*+
13 Nkaambo ooyo uutafwidi bamwi luse uyoobetekwa kakunyina kufwidwa luse.+ Aboobo luse lulisumpukide kapati kwiinda lubeta.
14 Bakwesu, ino cigwasya nzi ikuti naa umwi waamba kuti ulijisi lusyomo pele katajisi milimo?+ Sena lusyomo oolo lulakonzya kumufwutula?+
15 Ikuti mukwesu naa mucizyi katajisi zyakusama* alimwi katajisi cakulya cikkwene buzuba oobo,
16 kumane umwi wanu wabaambila kuti, “Mweende kabotu muluumuno; mujane zyakusama azyakulivwumba alimwi azyakulya zikkwene,” pele kunyina nomwabapa zintu nzyobayandika kumubili, ino eeci inga cagwasya buti?+
17 Mbubonya buyo, ilusyomo lulikke buyo, kakunyina milimo, lulifwide.+
18 Nokuba boobo, umwi inga waamba kuti: “Yebo ujisi lusyomo, mebo ndijisi milimo. Nditondezye lusyomo lwako kakunyina milimo, eelyo mebo ndilakutondezya lusyomo lwangu kwiinda mumilimo yangu.”
19 Tee ulasyoma kuti kuli buyo Leza omwe? Ucita kabotu. Pele aalo madaimona alasyoma oobo alimwi alakankama.+
20 Pele sena yebo omuntu mufwubafwuba ulayanda kuzyiba kuti lusyomo ilunyina milimo ndwabuyo?
21 Sena Abrahamu taateesu tanaakaambwa kuti mululami akaambo kamilimo naakamana kutuula Izaka mwanaakwe acipaililo?+
22 Wabona kuti lusyomo lwakwe lwakabelekela antoomwe amilimo yakwe alimwi lusyomo lwakwe lwakalondolwa kwiinda mumilimo yakwe,+
23 alimwi lwakazuzikizyigwa lugwalo lwaamba kuti: “Abrahamu wakasyoma Jehova,* eelyo wakabonwa kuti mululami,”+ alimwi wakaitwa kuti mulongwe wa Jehova.*+
24 Mwabona kuti muntu weelede kwaambwa kuti mululami akaambo kamilimo, ikutali akaambo kalusyomo lulikke pe.
25 Mbubonya buyo, sena Rahabu muvwuule awalo tanaakaambwa kuti mululami akaambo kamilimo, naakamana kutambula batumwa camaanza obilo akubainzya nzila iimbi nobakali kupiluka kwabo?+
26 Ncobeni, mbubonya mubili uunyina muuya mbuufwide,+ alwalo lusyomo lunyina milimo lulifwide.+
Bupanduluzi buyungizyidwe
^ Mu Chigiriki, “amulawo walwaanguluko.”
^ Mu Chigiriki, “kali mantanda.”
^ Amubone Makani Aayungizyidwe A5.
^ Amubone Makani Aayungizyidwe A5.
