Jeremiya 31:1-40
31 “Kuciindi eeco,” mbwaamba Jehova, “ndiyooba Leza wamikwasyi yoonse ya Israyeli, eelyo balo bayooba bantu bangu.”+
2 Mboobu mbwaamba Jehova:
“Bantu aabo ibakafwutuka kupanga bakafwidwa luzyalo munkandaCiindi Israyeli naakali kuunka kubusena bwakwe bwakulyookezyela.”
3 Kali kulamfwu, Jehova wakalibonya kulindime akwaamba kuti:
“Ndalikukuyanda aluyando lutamani.
Nkakaambo kaako ndakukwelela kulindime aluyando lutamani.*+
4 Ndiyookuyakulula alimwi, eelyo uyooyakululwa.+
Yebo onakalindu wa Israyeli uyakubweza nsakalala zyako alimwi
Akutalika kuzyana kokkomene.*+
5 Uyoosyanga alimwi myuunda yamisaansa muzilundu zya Samariya;+Basikusyanga bayoosyanga akulya micelo yanjiyo.+
6 Nkaambo buzuba buyoosika eelyo balindizi bamumalundu aa Efraimu nobayakoongolola kuti:
‘Amunyamuke, tuunke ku Ziyoni, kuli Jehova Leza wesu.’”+
7 Nkaambo mboobu mbwaamba Jehova:
“Amoompolole cakukondwa kuli Jakobo.
Amoongolole cakukondwa nkaambo ndinywe mweendelezya masi.+
Amwaambilizye; amumutembaule akwaamba kuti,‘O Jehova, kobafwutula bantu bako, ba Israyeli ibasyeede.’+
8 Amubone ndilabaleta kuzwa kucisi cakunyika.+
Ndiyoobabunganya antoomwe kuzwa kumagolelo aanyika.+
Akati kabo kunooli boofwu abalema,+Mukaintu uumitide alimwi ayooyo uuyanda kale kutumbuka, boonse kabali antoomwe.
Kabali mbungano mpati bayoojokela okuno.+
9 Bayooboola kabalila.+
Ndiyoobasololela kumwi kabakombelezya kuti bafwidwe luzyalo.
Ndiyoobasololela kutulonga twamaanzi,+Munzila iiyalene iitakabapi kulebwa.
Nkaambo mebo ndendime Usyi wa Israyeli, alimwi Efraimu mwanaangu wakusaanguna.”+
10 Amumvwe jwi lya Jehova, nywebo nomasi,Alimwi amulyaambilizye akati kansumbu zili kulamfwu,+ kuti:
“Ooyo wakamwaya ba Israyeli uyoobabunganya.
Uyoobalanganya mbubonya mweembezi mbwalanganya butanga bwakwe.+
11 Nkaambo Jehova uyoonununa Jakobo+Akumuvwuna kuzwa mujanza lyayooyo uumwiinda nguzu.+
12 Bayooboola akoompolola cakukondwa atala aacilundu ca Ziyoni+Akusekelela akaambo kabubotu bwa* Jehova,Akaambo kamaila, kawaini mupya,+ kamafwuta,Kabana bambelele, bampongo abaŋombe.+Bayooba buyo mbuli muunda uutilailwa kabotu,+Alimwi tabakagonkelwi limbi akaambo kanzala anyota.”+
13 “Aciindi eeco nakalindu uyoozyana kakkomene,Abalo balombwana abamadaala bayoocita oobo antoomwe.+
Ndiyoocinca kulila kwabo kuti kube kusekelela.+
Ndiyoobaumbulizya akubapa kuti bakondwe muciindi camause aabo.+
14 Ndiyookkutya bapaizi zyakulya zinji,*Alimwi bantu bangu bayookkuta bubotu bwangu,”+ mbwaamba Jehova.
15 “Mboobu mbwaamba Jehova:
‘Kumvwika jwi mu Rama,+ ijwi lyakoomoka akulila kapati:
Rakele ulila bana bakwe basankwa.*+
Wakaka kuumbulizyigwa kujatikizya bana bakwe basankwa,Nkaambo tabaciko pe.’”+
16 Mboobu mbwaamba Jehova:
“‘Koleka kulila, alimwi kolesya meso aako kuzwa misozi,Nkaambo kuli bulumbu akaambo kamulimo wako,’ mbwaamba Jehova.
‘Bayoopiluka kuzwa kucisi cabasinkondonyina.’+
17 ‘Alimwi yebo ulaabulangizi bubotu kumbele,’+ mbwaamba Jehova.
‘Bana bako bayoopilukila kucilawo cabo.’”+
18 “Ndamumvwa Efraimu kalilauka kuti,‘Yebo wandilulamika, aboobo ndalulamikwa,Mbuli moombe uutanatambisyigwa.
Kondipilusya, eelyo ndilapiluka kakunyina kuwayawaya,Nkaambo nduwe Jehova Leza wangu.
19 Nkaambo nondakapiluka ndakausa;+Nondakasalazyilwa makani, ndakalyuuma acibelo akaambo kakuusa.
Ndakafwa nsoni, alimwi ndakasampuka,+Nkaambo ndakanyamwide masampu aakubwana.’”
20 “Sena Efraimu tali mwana ngondiyandisya, kalungu kangu kaamoyo?+
Nkaambo ciindi coonse nendimubwentela, tandileki kumuyeeya pe.
Nkakaambo kaako moyo* wangu wapya akaambo kanguwe.+
Aboobo ziyume zitete ndiyoomufwida lubomba,” mbwaamba Jehova.+
21 “Kolibikkila zitondezyo mumugwagwa,+Alimwi kolibikkila zikwankwani.
Koubikkila maano mugwagwa, inzila moyakwiinda.+
Kopiluka, yebo nakalindu wa Israyeli, kopiluka kuminzi yako eeyi.
22 Ino uyooleka lili kwiingaila, yebo omwana musimbi uutasyomeki?
Nkaambo Jehova walenga cintu cipya munyika:
Mukaintu uyoosungwaala kutobela musankwa.”
23 Mboobu mbwaamba Jehova wamakamu, Leza wa Israyeli: “Bayakwiinduluka kwaamba majwi aaya mucisi ca Juda amuminzi yancico eelyo ndaakubunganya bantu babo baangidwe: ‘Jehova akuleleke, yebo obusena bwakukkala bululeme,+ yebo ocilundu cisalala.’+
24 Mulincico cisi ca Juda alimwi aminzi yancico yoonse bayookkala antoomwe boonse, balimi abaabo beembela butanga.+
25 Nkaambo ndiyookatalusya muntu uukatede, alimwi ndiyookkutya muntu uuli woonse wagonkelwa akaambo kanzala anyota.”+
26 Akaambo kaceeci ndakasinsimuka akujalula meso, lino ŋonzi zyangu zyakali kunoneezya.
27 “Amubone! Mazuba alaboola,” mbwaamba Jehova, “eelyo muŋanda ya Israyeli amuŋanda ya Juda ndiyoosyanga mbuto* yamuntu ambuto yamunyama uuvwubwa.”+
28 “Alimwi mbubonya mbondapakamene kandilibambilide kubazyula, kubakolomona, kubawisya, kubanyonyoona alimwi akubapwayaula,+ mbubonya oobo mbondiyoopakamana kandilibambilide kubayaka alimwi akubasyanga,”+ mbwaamba Jehova.
29 “Kumazuba aayo kunyina limbi nobayakwaamba kuti, ‘Bamausyi mbabakalya misaansa iisakamuka, pele meno aabana babo ngaakaba abunyeele.’*+
30 Pele umwi aumwi uyoofwa akaambo kacinyonyoono cakwe mwini. Kufwumbwa muntu uulya misaansa iisakamuka, meno aakwe mwini ngaayakuba abunyeele.”
31 “Amubone! Mazuba alaboola,” mbwaamba Jehova, “eelyo ndiyoopangana cizuminano cipya abamuŋanda ya Israyeli alimwi abamuŋanda ya Juda.+
32 Tacikabi mbuli cizuminano ncindakapangana abamausyi mubuzuba oobo nindakabajata kujanza akubagwisya mucisi ca Egepita,+ ‘icizuminano cangu eeco balo ncobakatyola,+ nokuba kuti mebo ndakali simalelaabo mwini-mwini,’* mbwaamba Jehova.”
33 “Nkaambo eeci ncecizuminano ncendiyoopangana abamuŋanda ya Israyeli aakwiinda mazuba aayo,” mbwaamba Jehova. “Ndiyoobikka mulawo wangu mukati kabo,+ alimwi ndiyakuulemba mumyoyo yabo.+ Eelyo ndiyooba Leza wabo, abalo bayooba bantu bangu.”+
34 “Alimwi kunyina limbi umwi aumwi wabo nayooyiisya mweenzinyina nokuba kuyiisya mwanookwabo kuti, ‘Kozyiba Jehova!’+ nkaambo boonse buyo bayoondizyiba, kuzwa kumusyoonto akati kabo kusikila kumupati,”+ mbwaamba Jehova. “Nkaambo ndiyoobalekelela cinyonyoono cabo, alimwi cibi cabo tandikaciyeeyi limbi pe.”+
35 Mboobu mbwaamba Jehova,Ooyo uupa zuba kutegwa kube mumuni masyikati,Uupa milawo yamwezi alimwi uupa nyenyeezi kuti kazimweka masiku,Uukopanya lwizi akupa kuti mayuwe aandulo avwuume,Ooyo uujisi zina lyakuti Jehova wamakamu:+
36 “‘Ikuti naa malailile aaya akaleke kubeleka,’ mbwaamba Jehova,‘Nkokuti alwalo lunyungu lwa Israyeli luyooleka kuba cisi kumbele lyangu lyoonse.’”+
37 Mboobu mbwaamba Jehova: “‘Ikuti naa majulu aali mujulu alakonzya kupimwa alimwi ikuti azyalo ntalisyo zyanyika ansi zilakonzya kulingulwa, nkokuti ambebo ndilakonzya kulukaka lunyungu loonse lwa Israyeli akaambo kazintu zyoonse nzyobacita,’ mbwaamba Jehova.”+
38 “Amubone! Mazuba alaboola,” mbwaamba Jehova, “eelyo munzi ooyu uyooyakilwa+ Jehova kuzwa ku Ngazi ya Hananeli+ kusikila ku Mulyango Waku Kkona.+
39 Alimwi ntambo yakupimya+ iyoolulama kutozya kukalundu ka Garebi, alimwi iyoonyona kutozya ku Goa.
40 Aboobo kkuti* lyoonse lyamitunta alimwi amulota,* alimwi amibundu yoonse yakumingenyu kusikila ku Kkuti lya Kidroni,+ mane kuyoosika kukkona lya Mulyango wa Mabbiza+ uuli kujwe, ziyooba cintu cisalala kuli Jehova.+ Munzi ooyu taukazyulwi kabili nokuba kunyonyoonwa pe.”
Bupanduluzi buyungizyidwe
^ Naa “ndazumanana kukutondezya luyando lutamani.”
^ Naa “Akunjila mucizyano cabaabo basekelela.”
^ Naa “kazintu zibotu zizwa kuli.”
^ Mu Chihebrayo, “mafwuta.”
^ Naa “bana bakwe.”
^ Mu Chihebrayo, “mala.”
^ Naa “lunyungu.”
^ Mu Chihebrayo, “ngaakafwumpa.”
^ Naa ambweni, “mulumaabo.”
^ Naa “cibanda.”
^ Naa “amulota wamafwuta,” nkokuti, mulota uusangene amafwuta aazipaizyo.
