Johane 21:1-25
21 Nozyakainda zintu eezyi, Jesu wakalitondezya alimwi kuli basikwiiya bakwe ku Lwizi lwa Tiberiya. Mboobu mbwaakalitondezya.
2 Antoomwe kwakali Simoni Petro, Tomasi (iwakali kwiitwa kuti Wamaanga),+ Natanayeli+ uuzwa ku Kana waku Galilaya, bana ba Zebedayo+ alimwi abasikwiiya bakwe bambi bobilo.
3 Simoni Petro wakati kulimbabo: “Ndaunka kukuzuba nswi.” Bakati kulinguwe: “Andiswe tulaunka anduwe.” Bakaunka akutanta mubwato, pele masiku aayo kunyina ncobakajaya.+
4 Nokuba boobo, nobwakali kuca, Jesu wakaliimvwi kunkomwe, pele basikwiiya kunyina nobakazyiba kuti wakali Jesu.+
5 Mpoonya Jesu wakati kulimbabo: “Nobana, sena kuli cakulya ncomujisi?”* Bakamwiingula kuti: “Peepe!”
6 Wakati kulimbabo: “Amuwaale kansabwe kanu kululyo lwabwato eelyo mulajaya nswi.” Aboobo bakakawaala, pele bakaalilwa kukakwela akaambo kakuvwula kwanswi.+
7 Mpoonya sikwiiya ooyo Jesu ngwaakali kuyandisya+ wakati kuli Petro: “Ngu Mwami!” Lino Simoni Petro naakamvwa kuti ngu Mwami, wakasama cisani cakwe caatala nkaambo wakali mantanda,* eelyo wakasotokela mulwizi.
8 Pele basikwiiya bamwi bakaboola mubwato busyoonto kabazyaabukwela kansabwe kazwide nswi, nkaambo tiibakali kule kapati ankomwe, wakali buyo musinzo uutandila kumamita aali 90.*
9 Pele nobakasika kunkomwe bakabona mulilo wamalasya answi zyakali kuyokwa alinguwo, alimwi bakabona acinkwa.
10 Jesu wakabaambila kuti: “Amulete nswi zimwi nzyomwajaya ino aawa.”
11 Aboobo Simoni Petro wakatanta bwato akukakwelela kunkomwe kansabwe kakazwide nswi zipati zili 153. Pele nokuba kuti zyakali zinji, tiikakadunsauka kansabwe.
12 Jesu wakabaambila kuti: “Amuboole mulye.” Kunyina naba omwe wabasikwiiya bakwe wakajisi camba cakumubuzya kuti: “Ino nduwe ni?” nkaambo bakalizyi kuti Mwami.
13 Jesu wakabweza cinkwa akubapa, wakacita mbubonya answi.
14 Eeci lino cakali ciindi+ catatu ncaakalibonya Jesu kuli basikwiiya bakwe kuzwa naakabusyigwa kuzwa kubafwu.
15 Nobakamana kulya, Jesu wakati kuli Simoni Petro: “Simoni omwana wa Johane, sena ulandiyanda kwiinda zyeezyi?” Wakavwiila kuti: “Inzya Mwami, ulizyi kuti ndilakuyanda kapati.” Jesu wakamwaambila kuti: “Kosanina twana twambelele twangu.”+
16 Alimwi ciindi cabili wakati kulinguwe: “Simoni omwana wa Johane, sena ulandiyanda?” Wakavwiila kuti: “Inzya Mwami, ulizyi kuti ndilakuyanda kapati.” Jesu wakati kulinguwe: “Koembela tubelele twangu.”+
17 Ciindi catatu wakati kulinguwe: “Simoni omwana wa Johane, sena ulandiyanda kapati?” Petro wakausa akaambo kakuti ciindi catatu wakamubuzya kuti: “Sena ulandiyanda kapati?” Aboobo wakamwaambila kuti: “O Mwami, yebo ulizyi zintu zyoonse; ulizyi kuti ndilakuyanda kapati.” Jesu wakamwaambila kuti: “Kosanina tubelele twangu.+
18 Ncobeni ndikwaambila masimpe kuti, nookacili mwana wakali kulisamika omwini akulyeendela kufwumbwa nkookali kuyanda. Pele waakucembaala uyootandabika maanza aako, eelyo muntu uumbi nguuyookusamika akukusololela nkotayandi kuunka.”
19 Eeci wakacaamba ikutondezya lufwu ndwaakali kuyoofwa Petro ikulemeka Leza. Naakamana kwaamba boobu, wakati kulinguwe: “Kozumanana kunditobela.”+
20 Petro wakacenguluka akubona sikwiiya ngwaakali kuyandisya Jesu katobela,+ sikwiiya ooyo kucilalilo iwakayaama acamba ca Jesu akumubuzya kuti: “Mwami, ino nguni uuyanda kukwaaba?”
21 Aboobo mbwaakamubonena buyo, Petro wakabuzya Jesu kuti: “O Mwami, ino mbuti muntu ooyu?”
22 Jesu wakati kulinguwe: “Ikuti kandiyanda kuti azumanane kupona kusikila ndikaboole, ino eeco cikujatikizya buti yebo? Yebo kozumanana buyo kunditobela.”
23 Makani aaya akabusya mpuwo akati kabakwesu yakuti sikwiiya ooyo takafwi. Pele Jesu tanaakamwaambila kuti takafwi pe, pele wakati: “Ikuti kandiyanda kuti azumanane kupona kusikila ndikaboole, ino eeco cikujatikizya buti yebo?”
24 Ooyu ngosikwiiya+ uupa bumboni bwazintu eezyi alimwi nguwakazilemba, alimwi tulizyi kuti bumboni bwakwe mbwamasimpe.
25 Mubwini kuli zintu azimbi zinji nzyaakacita Jesu nzyondiyeeya kuti, ikuti nozyakalembwa zyoonse, imabbuku aalembedwe naatakakkwana munyika eeyi.+
Bupanduluzi buyungizyidwe
^ Naa “nswi nzyomujisi?”
^ Naa “tanaakasamide bukkwene.”
^ Mu Chigiriki, “kutukokola tuli 200.” Amubone Makani Aayungizyidwe B14.
