Luka 10:1-42
10 Nozyakainda zintu eezyi, Mwami wakasala abamwi bali 70 akubatuma bobilo-bobilo+ kuti bamusolwede kuminzi akumasena oonse nkwaakali kuyanda kuunka.
2 Mpoonya wakabaambila kuti: “Masimpe, mulimo wakutebula mupati, pele babelesi mbasyoonto. Aboobo, amulombe Simalelo wabutebuzi kuti atume babelesi mumulimo wakwe wakutebula.+
3 Kamuya! Amubone! Ndamutuma mbuli bana bambelele akati kabaumpe.+
4 Mutabwezi nkomo yamali niiba nkomo yacakulya neziba mpato+ alimwi mutasowi ciindi kwaanzyanya amuntu uuli woonse munzila.
5 Kufwumbwa nkomuyoonjila muŋanda, amukasaangune kwaamba kuti: ‘Akube luumuno muŋanda iino.’+
6 Eelyo ikuti muŋanda oomo kakuli muntu uuyandisya luumuno, luumuno lwanu luyooba alinguwe. Pele kuti kakunyina, luyoopiluka kulindinywe.
7 Aboobo amukkale muŋanda eeyo imuli siluumuno,+ mulye akunywa zintu nzyobamupa+ nkaambo similimo weelede kupegwa bulumbu bwakwe.+ Mutanoolongi-longi pe, kuzwa kuŋanda aŋanda.
8 “Alimwi kufwumbwa nkomuyoonjila mumunzi akutambulwa abantu bamumo, amukalye nzyobayoomupa
9 alimwi amukaponye baciswa bali mumo, alimwi akubaambila kuti: ‘Bwami bwa Leza bwaswena afwaafwi kulindinywe.’+
10 Pele kufwumbwa nkomuyoonjila mumunzi nkobatakamutambuli, amukaunke munzila zyanguwo zipati akwaamba kuti:
11 ‘Noluba lusuko lwamunzi wanu ilwanamatide kumaulu eesu twamukunkumwida lube bumboni kulindinywe.+ Nokuba boobo, kamuzyi kuti Bwami bwa Leza bwaswena afwaafwi.’
12 Ndimwaambila kuti mubuzuba oobo cisubulo ca Sodoma ciyooceya kwiinda camunzi ooyo.+
13 “Maawe kulinduwe Korazini! Maawe kulinduwe Betesaida! Nkaambo ikuti milimo mipati iyakacitika mulindinywe noyakacitika mu Turo a Sidoni, nobakeempwa kaindi, kwiinda mukusama zisani zyamasaka akukkala mumulota.+
14 Aboobo, mulubeta cisubulo ca Turo a Sidoni ciyooceya kwiinda canu.
15 Ayebo Kapernauma, sena uyoosumpulwa kujulu? Uyooboola ansi mu Cuumbwe!*
16 “Kufwumbwa uumuswiilila nywebo ulandiswiilila andime.+ Alimwi kufwumbwa uutamulemeki nywebo tandilemeki andime. Kuyungizya waawo, kufwumbwa uutandilemeki mebo tamulemeki awalo ooyo wakandituma.”+
17 Lino aabo bali 70 bakapiluka kabakkomene balaamba: “Mwami, naaba madaimona alatumvwida kwiinda mukubelesya zina lyako.”+
18 Amvwe boobo wakabaambila kuti: “Ndamubona kale Saatani kawide+ mbuli lulabo kuzwa kujulu.
19 Amubone! Ndamupa nguzu zyakulyatauka nzoka atubanze, azyakuzunda nguzu zyasinkondo+ zyoonse alimwi kunyina ciyoomucisa.
20 Nokuba boobo, mutakkomani akaambo kakuti myuuya ilamumvwida, pele amukkomane akaambo kakuti mazina aanu alembwa kujulu.”+
21 Aciindi eeco nciconya wakakondwa kapati mumuuya uusalala akwaamba kuti: “Ndakutembaula caantangalala Taata, O Mwami wakujulu aanyika, nkaambo wazisisa cakulomya zintu eezyi kubasongo abacenjede,+ pele waziyubunwida bana basyoonto. Inzya Taata, nkaambo oobu mbookayanda.+
22 Taata wandipa zintu zyoonse alimwi kunyina uumuzyi kabotu Mwana ccita Taata alikke, alimwi kunyina uumuzyi kabotu Taata ccita Mwana alikke,+ alimwi ayooyo kufwumbwa Mwana ngwaayanda kuyubunwida.”+
23 Amane kwaamba boobo wakaambila basikwiiya bakwe balikke kumbali kuti: “Balikkomene aabo bajisi meso aabona zintu eezyi nzyomubona.+
24 Nkaambo ndimwaambila kuti, bunji bwabasinsimi abami bakali kuyandisisya kubona zintu nzyomubona, pele tiibakazibona,+ alimwi bakali kuyandisisya kumvwa zintu nzyomumvwa, pele tiibakazimvwa pe.”
25 Lino amubone! Umwi muntu uuzyi Mulawo wakaimikila kuti amusunke, eelyo wakamubuzya kuti: “Omwiiyi, ino ncinzi ncondeelede kucita kutegwa ndikakone buumi butamani?”+
26 Eelyo wakati kulinguwe: “Ino mulembedwe nzi mu Mulawo? Ino ubala kuti nzi?”
27 Mukwiingula wakati: “‘Weelede kuyanda Jehova* Leza wako amoyo wako woonse, abuumi bwako boonse, anguzu zyako zyoonse alimwi amizeezo yako yoonse’+ alimwi ‘asimukobonyoko mbubonya mbuli mboliyanda omwini.’”+
28 Wakamwaambila kuti: “Waingula kabotu; kozumanana kucita boobu eelyo uyoojana buumi.”+
29 Pele akaambo kakuti wakali kuyanda kulitondezya kuti mululami,+ mwaalumi ooyu wakabuzya Jesu kuti: “Ino mubwini simukoboma nguni?”
30 Jesu wakaingula kuti: “Umwi muntu wakali kuselemuka kuzwa ku Jerusalemu kuya ku Jeriko alimwi wakafwumpwa ababbi ibakamubbida zisani azyoonse nzyaakajisi akumuuma kapati bamane bamusiya kanetukide.
31 Lino munzila njiyonya eeyo kwakali kweenda mupaizi umwi, pele naakamubona, wakaleya wamweenguluka.
32 Mbubonya buyo, awalo mu Levi naakasika abusena oobo akumubona, wakaleya wamweenguluka.
33 Pele mu Samariya+ umwi iwakali kweenda munzila eeyo wakasika alinguwe, alimwi naakamubona wakamufwida luzyalo.
34 Aboobo wakaunka mpaakabede, wazambaila zilonda zyakwe akuzitila mafwuta alimwi awaini. Mpoonya wakamubikka ambongolo yakwe akumuleta kuŋanda yabeenzu akumulanganya.
35 Lino buzuba bwakatobela wakagusya madinari* obilo akupa siŋanda yabeenzu akumwaambila kuti: ‘Komulanganya alimwi kufwumbwa mali ngotiibelesye atala lyayaaya, ndiyookujolela ndaakujoka.’
36 Ino uyeeya kuti nguni akati kabaaba botatwe wakaba simukobonyina+ wamuntu ooyu wakafwumpwa ababbi?”
37 Wakati: “Nguulya wakamufwida luzyalo.”+ Mpoonya Jesu wakati kulinguwe: “Koya anduwe kocita mbubonya oobo.”+
38 Lino nobakali kuyaabweenda wakanjila mumunzi umwi. Ooko kwakamutambula mukaintu umwi uutegwa Marta+ muŋanda yakwe.
39 Mukaintu ooyu wakalijisi amwanookwabo musimbi uutegwa Mariya, ooyo iwakakkala kumaulu aa Mwami akuzumanana kuswiilila nzyaakali kwaamba.*
40 Pele Marta wakanyonganizyigwa akukutauka milimo minji. Aboobo wakaboola kulinguwe akwaamba kuti: “Mwami, sena tokwe makani kuti mwanookwesu wandilekelezya kucita zintu? Komwaambila aboole azoondigwasye.”
41 Mwami wakaingula kuti: “Marta, Marta, ulalibilika akunyonganizyigwa azintu zinji.
42 Pele nzintu buyo zisyoonto ziyandika naa kuti ncomwe buyo. Mariya walo wasala cibeela cibotu,*+ alimwi takanyangwi ncico pe.”
Bupanduluzi buyungizyidwe
^ Naa “Cikkalilo Cabafwu.” Amubone Bupanduluzi Bwamabala.
^ Amubone Makani Aayungizyidwe A5.
^ Amubone Makani Aayungizyidwe B14.
^ Mu Chigiriki, “ijwi lyakwe.”
^ Naa “cibeela cibotu kapati.”
