Luka 13:1-35
-
Amweempwe buyo-buyo muyoonyonyoonwa (1-5)
-
Cikozyanyo camukuyu uutazyali (6-9)
-
Mukaintu uulemene waponesyegwa mu Sabata (10-17)
-
Cikozyanyo canseke yamusitada alimwi acabumena (18-21)
-
Kuyandika kubeleka canguzu kutegwa tunjile mumulyango uusyaanikide (22-30)
-
Heroda, “Mwaaba ooyo” (31-33)
-
Jesu walila Jerusalemu (34, 35)
13 Kuciindi eeco kwakali bamwi bakaliko aawo ibakamwaambila zyabana Galilaya aabo bulowa bwabo Pilato mbwaakasanganya azipaizyo zyabo.
2 Mukubaingula wakababuzya kuti: “Sena muyeeya kuti bana Galilaya aaba bakali basizibi kwiinda bana Galilaya bamwi boonse akaambo kakuti bakajaigwa boobo?
3 Peepe, pele ndimwaambila kuti, ikuti muteempwi anywebo nyoonse muyoonyonyoonwa mbuli mbabo.+
4 Naa aabo bali 18 ibakalimbwa akujaigwa angazi ku Siloamu, sena muyeeya kuti bakali basizibi kwiinda bantu boonse bakkala mu Jerusalemu?
5 Peepe, pele ndimwaambila kuti, ikuti muteempwi anywebo nyoonse muyoonyonyoonwa mbuli mbabo.”
6 Mpoonya wakaamba cikozyanyo eeci: “Umwi muntu wakajisi mukuyu wakasyangidwe mumuunda wakwe wamisaansa, eelyo wakaboola kuti alangaule nkuyu kulinguwo, pele tanaakajana niiba yomwe.+
7 Mpoonya wakaambila mubelesi wamumuunda wamisaansa kuti, ‘Lino yaba myaka yotatwe kandiboola kulangaula nkuyu kumukuyu ooyu, pele kunyina niiba yomwe njondijana. Kocigonka cisamu eeci! Mubwini ino nkaambo nzi ncoceelede kunyonyoona nyika?’
8 Mukumwiingula wakati, ‘Simalelaangu, amucileke amwaka uuno, ndicilimine mumbali akucibikkila mbolezi.
9 Ikuti cikazyale micelo kumbele, inga cabota; pele kuti citakazyali, nkokuti mukaciteme.’”+
10 Lino wakali kuyiisya mucikombelo cimwi mu Sabata.
11 Lino amubone! Kwakali mukaintu wakanjidwe daimona lyakali kumupa kubula nguzu* kwamyaka iili 18 ; alimwi wakaloongomene katakonzyi koololoka naaceya.
12 Naakamubona, Jesu wakamwiita akumwaambila kuti: “Omukaintu, waangululwa kubulwazi bwako.”+
13 Mpoonya Jesu wakabikka maanza aakwe aalinguwe, eelyo ndilyonya wakoololoka akutalika kutembaula Leza.
14 Pele mweendelezi wacikombelo kanyemede akaambo kakuti Jesu wakaponya muntu mu Sabata, wakaambila makamu aabantu kuti: “Kuli mazuba aali cisambomwe nokweelede kubelekwa milimo;+ aboobo mumazuba aayo amuboole kuzooponesyegwa, ikutali mubuzuba bwa Sabata.”+
15 Pele Mwami wakamwiingula kuti: “Nobasikuupaupa ameso,+ sena umwi aumwi wanu taangululi ŋombe naa mbongolo yakwe mucimpati mu Sabata akwiitola kuyoonywa maanzi?+
16 Aboobo sena tiicaleelede kumukaintu ooyu walo uuli mwana wa Abrahamu alimwi ooyo Saatani ngwaangide kwamyaka iili 18 kuti aangununwe kucilwazi eeci mubuzuba bwa Sabata?”
17 Naakaamba zyeezyi, basikumukazya boonse bakafwa nsoni, pele nkamu yoonse yabantu yakakondwa kuzintu zitaliboteli zyoonse nzyaakacita.+
18 Aboobo wakazumanana kwaamba kuti: “Ino Bwami bwa Leza buli mbuli nzi, alimwi ino inga ndabukozyanisya anzi?
19 Buli mbuli nseke yamusitada muntu umwi njaakabweza akwiisyanga mumuunda wakwe, eelyo yakamena akukomena akuba cisamu, mpoonya bayuni bauluka mujulu bakali kuyaka ziteente mumitabi yancico.”+
20 Alimwi wakati: “Ino Bwami bwa Leza inga ndabukozyanisya anzi?
21 Buli mbuli bumena, mukaintu umwi mbwaakabweza akubusanganya afulaulu iwakali muzisuwo zyotatwe zipati* mane kusikila mulwi woonse wakafwufwumuka.”+
22 Mpoonya wakeenda kuzwa kumunzi amunzi akukanzi akanzi, kayaabuyiisya akuzumanana lweendo lwakwe lwakuya ku Jerusalemu.
23 Lino muntu umwi wakamubuzya kuti: “Mwami, sena masimpe kuti aabo ibayakufwutuka banooli buyo basyoonto?” Wakabaambila kuti:
24 “Amubeleke canguzu kuti munjile mumulyango uusyanikide,+ nkaambo ndimwaambila kuti banji bayooyanda kunjila, pele bayookakilwa.
25 Nkaambo ikuti mwiniŋanda wanyamuka kale akujala cijazyo, eelyo nywebo mwaima anze akutalika kukonkomona acijazyo akwaamba kuti, ‘Mwami, kotujalwida,’+ uyoomwaambila kuti: ‘Tandizyi naa mwazwa kuli.’
26 Mpoonya muyootalika kwaamba kuti, ‘Twakali kulya akunywa kumbele lyako, alimwi wakali kuyiisya mumigwagwa yesu.’+
27 Pele uyoomwaambila kuti, ‘Tandizyi naa mwazwa kuli. Amuzwe kulindime, nywebo nyoonse nobasikucita zitaluleme!’
28 Eelyo ooko nkomuyoolilila akulumina ntwino mwaakubona Abrahamu, Izaka, Jakobo alimwi abasinsimi boonse mu Bwami bwa Leza, pele nywebo kamutandilidwe anze.+
29 Kunze lyaboobo, bantu bayooboola kuzwa kujwe akumbo, akuzwa kunyika akumusanza, alimwi bayookkala akulya mu Bwami bwa Leza.
30 Alimwi amubone! Kuli baabo bamamanino ibayooba bakusaanguna, alimwi abaabo bakusaanguna ibayooba bamamanino.”+
31 Aciindi nciconya eeco, kwakasika ba Farisi bamwi ibakamwaambila kuti: “Kozwa okuno nkaambo Heroda uyanda kukujaya.”
32 Pele wakabaambila kuti: “Kamuya mukamwaambile mwaaba* ooyo kuti, ‘Bona! Sunu ajuunza ndinootanda madaimona akuponya balwazi, pele mubuzuba bwatatu ndinoomanizyide.’
33 Nokuba boobo, ndeelede kuzumanana lweendo lwangu sunu, juunza azona, nkaambo taceeleli* kuti musinsimi ajailwe kunze kwa Jerusalemu.+
34 Aakaka Jerusalemu, Jerusalemu, yebo oojaya basinsimi akubapwaya mabwe aabo batumwa kulinduwe+—lyoonse ndakali kuyanda kubafwukatila bana bako mbubonya nkuku nseke mboifwukatila twana twanjiyo mumababa aanjiyo! Pele nywebo tiimwakali kuyanda.+
35 Amubone! Ŋanda* yanu yaba tongo alimwi yasiigwa kulindinywe.+ Ndimwaambila kuti tamukandiboni limbi kusikila mukaambe kuti: ‘Ulilelekedwe ooyo uuboola muzina lya Jehova!’”*+
Bupanduluzi buyungizyidwe
^ Naa “kumulemanika.”
^ Cisuwo comwe cakaleelene acibikkilo camalita aali 7.33. Amubone Makani Aayungizyidwe B14.
^ Mu Israyeli mwaaba wakazyibidwe kuti munyama mucenjezu.
^ Naa “tacilangilwi.”
^ Nkokuti, tempele.
^ Amubone Makani Aayungizyidwe A5.
