Luka 5:1-39
5 Aciindi cimwi makamu aabantu naakali kumubumbilila akuswiilila majwi aa Leza, wakaimvwi kumbali aazyiba lya Genesarete.*+
2 Mpoonya wakabona mato obilo kaaimvwi kumbali aazyiba, pele bazubi bakalizwide mulingawo alimwi bakali kusanzya nsabwe zyabo.+
3 Naakatanta bwato bumwi, oobo ibwakali bwa Simoni, wakamulomba kuti abukwasule aniini kuzwa kunkomwe. Mpoonya wakakkala akutalika kuyiisya makamu aabantu kali mubwato.
4 Naakamana kwaambaula, wakaambila Simoni kuti: “Katuya akati kazyiba, eelyo amuwaale nsabwe zyanu kutegwa mujaye nswi zinji.”
5 Pele mukwiingula, Simoni wakaamba kuti: “Mufwundisi, masiku oonse twalikubeleka kakunyina ncotwajaya,+ pele akaambo kakuti nduwe waamba ndilaziwaala nsabwe.”
6 Nobakacita boobo, bakajaya* nswi zinji. Mane nsabwe zyabo zyakatalika kudunsauka.+
7 Aboobo bakaita beenzinyina ibakali mubwato bumbi kuti baboole babagwasye, eelyo bakaboola akuzuzya mato obilo cakuti akatalika kubbila.
8 Abone boobu, Simoni Petro wakamufwugamina Jesu akwaamba kuti: “Tantamuka kulindime O Mwami, nkaambo ndimuntu sizibi.”
9 Nkaambo walo alimwi abaabo mbaakali limwi bakagambwa kapati nibakajaya nswi zinji kapati,
10 ncimwi buyo a Jakobo a Johane, bana ba Zebedayo,+ ibakali beenzinyina ba Simoni. Pele Jesu wakaambila Simoni kuti: “Utayoowi. Kuzwa lino unoozuba bantu baumi.”+
11 Aboobo bakatola mato aabo kucito akusiya zyoonse akumutobela.+
12 Aciindi cimwi naakali mumunzi umbi, kwakali mwaalumi umwi iwakazwide cinsenda mubili woonse. Naakabona Jesu, wakavwuntama ansi akumulomba kuti: “Mwami, ikuti koyanda, ulakonzya kundisalazya.”+
13 Aboobo wakatandabika janza lyakwe, wamujata akumwaambila kuti: “Ndilayanda! Kosalazyigwa.” Mpoonya aawo cinsenda cakwe cakamana.+
14 Eelyo wakalailila mwaalumi ooyo kuti ataambili muntu uuli woonse, wakati: “Pele koya ukalitondezye kumupaizi alimwi ukatuule cituuzyo akaambo kakusalazyigwa kwako, mbubonya Musa mbwaakalailila,+ kutegwa bukabe bumboni kulimbabo.”+
15 Pele mpuwo yakwe yakamwaika kapati, aboobo makamu aabantu akali kubungana kuti baswiilile alimwi akuponesyegwa malwazi aakabajisi.+
16 Pele ciindi aciindi wakali kuunka kuyookkala alikke munkanda kuyoopaila.
17 Buzuba bumwi naakali kuyiisya, ba Farisi abamayi ba Mulawo ibakaboola kuzwa muminzi yoonse ya Galilaya, Judaya alimwi a Jerusalemu bakalikkede ooko abalo; alimwi wakalijisi nguzu zya Jehova* zyakuponya bantu.+
18 Lino kwakaboola baalumi bakatembede muntu amacila uulebukide mubili, eelyo bakali kusola kumunjizya mukati akumusisya kuli Jesu.+
19 Aboobo mbwaanga tiibakajana aakumunjizyila akaambo kankamu yabantu, bakatanta aciluli, mpoonya kwiinda acipulo ncobakadonkola bakamulengelezya amacila akati kabaabo bakali kumbele lya Jesu.
20 Naakabona lusyomo lwabo, wakati: “Omwaalumi, walekelelwa zibi zyako.”+
21 Mpoonya balembi aba Farisi bakatalika kubandika mulicabo kabati: “Nguni ooyu waamba majwi aakusampula Leza? Nguni uukonzya kulekelela zibi kunze lya Leza alikke?”+
22 Pele mbwaanga Jesu wakazyiba nzyobakali kuyeeya, mukubaingula wakababuzya kuti: “Ino muyeeya nzi mumyoyo yanu?
23 Ncili cuuba-uba, ikwaamba kuti, ‘Walekelelwa zibi zyako,’ naa kwaamba kuti, ‘Nyamuka weende’?
24 Pele kutegwa muzyibe kuti Mwanaamuntu ulijisi nguzu zyakulekelela bantu zibi anyika—” wakaambila muntu ooyo uulebukide mubili kuti: “Ndikwaambila kuti, Nyamuka, bweza macila aako, uunke kuŋanda yako.”+
25 Mpoonya wakanyamuka kabalangilila, akubweza macila mpaakali kulala akuunka kuŋanda yakwe kalemeka Leza.
26 Lino bantu boonse bakagambwa kapati eelyo bakalemeka Leza, alimwi bakayoowa kabati: “Sunu twabona zintu zigambya!”
27 Lino nicakamana kucitika eeci, wakazwida anze, mpoonya wakabona simutelo uutegwa Levi kakkede aŋanda iitelelwa mitelo, eelyo wakamwaambila kuti: “Koba sikunditobela.”+
28 Mpoonya wakasiya zintu zyoonse, wakanyamuka akutalika kumutobela.
29 Kumane Levi wakamucitila pobwe pati lyakumutambula muŋanda yakwe, alimwi kwakali basimutelo banji abantu bambi mbobakali kulya limwi.*+
30 Babone boobo ba Farisi abalembi babo bakatongaukila basikwiiya bakwe, kabati: “Ino nkaambo nzi ncomulya akunywa antoomwe abasimutelo alimwi abasizibi?”+
31 Jesu wakati kulimbabo: “Aabo bataciswi tabayandiki musilisi, pele aabo baciswa mbabayandika musilisi.+
32 Ndakaboolela kwiita basizibi kuti beempwe ikutali bantu baluleme.”+
33 Bakamwaambila kuti: “Basikwiiya ba Johane ziindi zinji balaliimya kulya alimwi balakomba, ncimwi buyo ababa Farisi, pele bako balalya akunywa.”+
34 Jesu wakabaambila kuti: “Sena mulakonzya kupa kuti balongwe basibwiinga baliimye kulya ciindi nacili ambabo?
35 Pele ciyoosika ciindi ncobayoonyangwa sibwiinga;+ eelyo bayooliimya kulya kumazuba aayo.”+
36 Alimwi wakabaambila cikozyanyo kati: “Kunyina uutenda cigamba kucisani caatala cipya akucisuma acisani cakaindi. Ikuti wacita boobo, nkokuti cigamba cipya cilamonkola cisani cakaindi alimwi cigamba catendwa kucisani cipya taceendelani acakaindi.+
37 Alimwi kunyina muntu uubikka waini mupya munkomo zyazipaya zyakaindi. Ikuti wacita boobo, waini mupya ulabbosyola nkomo zyazipaya, eelyo ulatika azyalo nkomo zyazipaya zilanyonyooka.
38 Pele waini mupya weelede kubikkwa munkomo zyazipaya zipya.
39 Kunyina muntu iwanywa waini wakaindi uuyanda mupya, nkaambo waamba kuti, ‘Wakaindi mubotu.’”
Bupanduluzi buyungizyidwe
^ Nkokuti, Lwizi lwa Galilaya.
^ Mu Chigiriki, “bakajata.”
^ Amubone Makani Aayungizyidwe A5.
^ Naa “mbobakakkede limwi kutebulu.”
