Luka 8:1-56
-
Bamakaintu ibakali kumukutaukila Jesu (1-3)
-
Cikozyanyo casikuminza (4-8)
-
Ikaambo Jesu ncaakali kubelesya zikozyanyo (9, 10)
-
Cikozyanyo casikuminza capandululwa (11-15)
-
Lambe talivwumbwi (16-18)
-
Banyina abanabokwabo Jesu (19-21)
-
Jesu waumuzya guwo (22-25)
-
Jesu waatandila mungulube madaimona (26-39)
-
Mwana musimbi wa Jairo; mukaintu wajata cisani ca Jesu (40-56)
8 Nokwakainda kaindi kaniini, Jesu wakeenda muminzi mipati amisyoonto kayaabukambauka akwaambilizya makani mabotu aa Bwami bwa Leza.+ Alimwi bali Kkumi Ababili bakali anguwe,
2 abamakaintu bamwi aabo bakaponesyegwa kumyuuya mibi akumalwazi: Mariya ooyo iwakali kwiitwa kuti Magadalene, ooyo iwakagusyigwa madaimona aali ciloba;
3 Joana+ imukaintu wa Cuza, ooyo iwakali kulanganya ŋanda ya Heroda; Susana alimwi abamakaintu banji aabo ibakali kubakutaukila kwiinda mukubelesya lubono lwabo.+
4 Lino nkamu yabantu noyakabungana abaabo bakali kumutobela kumunzi amunzi, wakaamba kwiinda mucikozyanyo kuti:+
5 “Sikuminza wakaunka kuyoominza mbuto zyakwe. Naakali kuminza, izimwi zyakawida mumbali aanzila aboobo zyakalyataukwa mpoonya bayuni bamujulu bakazilya.+
6 Zimwi zyakawida amwala, eelyo nozyakamena, zyakayuma akaambo kakubula mudumu.+
7 Zimwi zyakawida mumamvwa, mpoonya mamvwa aakali kukomena antoomwe anzizyo akazisyaanikizya.+
8 Pele zimwi zyakawida mubulongo bubotu, aboobo nozyakamena, zyakazyala micelo iiyungizyidwe ziindi izili 100.”+ Naakamana kwaamba zintu eezyi, wakoompolola kuti: “Ooyo uujisi matwi aamvwa, aamvwe.”+
9 Pele basikwiiya bakwe bakamubuzya ncocakali kwaamba cikozyanyo eeci.+
10 Wakati: “Nywebo mwazumizyigwa kumvwisya maseseke aa Bwami bwa Leza, pele bamwi boonse baambilwa muzikozyanyo+ kutegwa nokuba kuti balabona, kubona kwabo kube kwabuyo, akuti batamvwisyi caambwa nokuba kuti balamvwa.+
11 Lino bupanduluzi bwacikozyanyo eeci mboobu: Imbuto ndijwi lya Leza.+
12 Eezyo izyakawida mumbali aanzila mbantu aabo bamvwa mpoonya bacimvwa buyo, Diabolosi ulaboola akuligusya ijwi ilili mumyoyo yabo kutegwa batasyomi akufwutulwa.+
13 Eezyo izyakawida amwala mbantu aabo banga nobamvwa jwi, balalitambula calukkomano pele banyina miyanda. Balasyoma kwakaindi kaniini buyo, pele ciindi nobasunkwa balawa.+
14 Eezyo izyakawida mumamvwa mbantu aabo bamvwa, pele akaambo kakuti balanyonganizyigwa akulibilika, lubono+ alimwi azyakulikondelezya zyamubukkale oobu,+ balasyaanikizyigwa alimwi tabazyali micelo iisima.+
15 Eezyo izyakawida mubulongo bubotu, aaba mbantu bajisi myoyo iiluleme+ alimwi mibotu ibalijatisya jwi ndibamvwa akuzyala micelo cakuliyumya.+
16 “Kunyina muntu uunga ayasya lambe ulalivwunika cintu naa kulibikka mujungusi lyabulo, pele ulalibikka acibikkilo calambe kutegwa aabo banjila muŋanda bamunikilwe.+
17 Nkaambo kunyina cintu cisisidwe citakayubununwi, nociba cintu civwumbidwe kabotu-kabotu citakazyibwi akuba antangalala.+
18 Aboobo amubikkile maano mbomumvwa, nkaambo kufwumbwa uujisi uyoopegwa zinji,+ pele ooyo uutajisi, noziba zyeezyo nzyayeeya kuti ulijisi uyoonyangwa.”+
19 Lino banyina abanabokwabo bakaboola kulinguwe,+ pele tiibakakonzya kusika afwaafwi anguwe akaambo kankamu yabantu.+
20 Aboobo wakaambilwa kuti: “Banyoko abanabokwanu baliimvwi anze, bayanda kukubona.”
21 Mukwiingula wakabaambila kuti: “Baama abakwesu mbaaba bamvwa jwi lya Leza akulicita.”+
22 Bumwi buzuba, Jesu abasikwiiya bakwe bakatanta bwato, mpoonya wakabaambila kuti: “Atuzabukile mutala eliya lyazyiba.” Mpoonya bakaunka.+
23 Pele bwato nobwakali kweenda, Jesu wakoona. Eelyo kwakasika guwo pati aazyiba cakuti maanzi akatalika kuzula mubwato alimwi bakaba muntenda.+
24 Aboobo bakaunka kulinguwe akumubusya kabati: “Mwiiyi, Mwiiyi, twafwa!” Mpoonya wakabuka akukalalila guwo amayuwe, eelyo zyakabatama, kwakaumuna wi.+
25 Mpoonya Jesu wakati kuli basikwiiya bakwe: “Ino lusyomo lwanu luli kuli?” Pele bakayoowa akugambwa kapati, eelyo bakalyaambauzya mulicabo kuti: “Ino mubwini nguni ooyu? Nkaambo ulalailila noliba guwo amayuwe alimwi zilamumvwida.”+
26 Eelyo bakasika kunkomwe mucooko caba Gerasa,+ icilangene a Galilaya.
27 Jesu mbwaakazwida buyo mubwato akusika mutala, wakaswaanganya muntu wamumunzi iwakanjidwe madaimona. Kwaciindi cilamfwu tanaakali kusama zisani alimwi tanaakali kukkala kuŋanda, pele wakali kukkala kunamaumbwe.+
28 Naakabona Jesu wakoongolola akufwugama kumbele lyakwe, eelyo ajwi pati wakati: “Ino ndijisi kaambo nzi anduwe Jesu, O Mwana wa Leza Mupatikampatila? Ndakulomba kuti utandipenzyi.”+
29 (Nkaambo Jesu wakali kulailila muuya mubi canguzu kuti uzwe mumuntu ooyo. Wakali kumunjila ziindi zinji*+ alimwi kanji-kanji wakali kulindililwa akwaangwa nketani ansimbi, pele wakali kuzidunsaula alimwi daimona lyakali kumutola musyokwe.)
30 Jesu wakamubuzya kuti: “Nduwe ni zina?” Wakati: “Makamu,”* nkaambo wakanjidwe madaimona manji.
31 Lino akamukombelezya kuti ataatandili mumulindi uutagoli.+
32 Lino ooko kwakali tanga pati lyangulube+ izyakali kweembelwa acilundu eeco, aboobo akamukombelezya kuti aazumizye kunjila mungulube eezyo, eelyo wakaazumizya.+
33 Mpoonya madaimona aayo akazwa mumuntu ooyo akunjila mungulube, kumane tanga eelyo lyakabalikila mujeleele akusotokela muzyiba akunyikila.
34 Pele beembezi nobakabona cakacitika, bakatija akuyooluula makani aaya mumunzi amutunzi.
35 Mpoonya bantu bakaunka kuyoobona cakacitika. Bakaboola kuli Jesu akujana muntu wakagusyigwa madaimona ulikkede kumaulu aa Jesu kasamide alimwi kabateme, eelyo bakayoowa kapati.
36 Aabo ibakalibonena cakacitika bakabaambila mbwaakaponesyegwa muntu ooyo wakanjidwe madaimona.
37 Mpoonya bantu boonse bamuminzi yeengelede cooko caba Gerasa bakalomba Jesu kuti azwe akati kabo, nkaambo bakayoowa kapati. Mpoonya Jesu wakanjila mubwato kuti aunke.
38 Pele muntu ooyo wakagusyigwa madaimona wakali kukombelezya Jesu kuti baunke limwi, pele walo wakamwaambila kuti ajokele, wakati:+
39 “Kopiluka kuŋanda ukazumanane kuluula ncaakucitila Leza.” Aboobo wakaunka kayaabwaambilizya mumunzi woonse ncaakamucitila Jesu.
40 Eelyo Jesu naakapiluka, inkamu yabantu yakamutambula kabotu nkaambo boonse bakali kumulangila.+
41 Amubone! Kwakasika mwaalumi uutegwa Jairo; ooyu mwaalumi wakali mweendelezi wacikombelo. Wakavwuntama ansi kumaulu aa Jesu akutalika kumukombelezya kuti aunke kuŋanda yakwe,+
42 nkaambo mwanaakwe musimbi simuzyalwaalikke iwakajisi myaka iili 12 wakali kufwumba bulamfwu.
Jesu naakali kuyaabweenda, makamu aabantu akamubumbilila.
43 Lino kwakali mukaintu iwakali kuciswa kalobola+ kwamyaka iili 12, alimwi tanaakali kukonzya kuponesyegwa amuntu uuli woonse.+
44 Wakaboola kusyule lya Jesu akujata maaya aacisani cakwe caatala,+ ndilyonya bulowa bwakaleka kuzwa.
45 Aboobo Jesu wakabuzya kuti: “Ino nguni wandiguma?” Boonse nobakali kukazya, Petro wakati: “Omwiiyi, bantu balikubumbilide alimwi akukusyaanikizya.”+
46 Pele Jesu wakati: “Kuli wandiguma, nkaambo ndalimvwa kuti nguzu+ zyazwa mulindime.”
47 Naakabona kuti wazyibwa, mukaintu ooyo wakaboola kakankama akufwugama kumbele lyakwe akwaamba kumbele lyabantu boonse cakamupa kuti amugume ambwaakaponesyegwa mpoona-mpoona.
48 Pele wakamwaambila kuti: “Mwanaangu, lusyomo lwako lwakuponya. Koya muluumuno.”+
49 Naakacili kwaambaula, umwi iwakali kwiiminina mweendelezi wacikombelo ooyo wakaboola akumwaambila kuti: “Mwanaako musimbi wafwa kale; koleka kumukatazya Mwiiyi.”+
50 Jesu naakamvwa makani aaya, wakamwiingula kuti: “Utayoowi pe, kosyoma buyo, eelyo mwanaako ulapona.”+
51 Naakasika kuŋanda kunyina ngwaakazumizya kunjila anguwe ccita buyo Petro, Johane, Jakobo alimwi abausyi abanyina musimbi ooyo.
52 Pele bantu boonse bakali kulila akoomoka akaambo kamusimbi ooyo. Aboobo wakati: “Kamuleka kulila,+ nkaambo tafwide pe, pele uloona.”+
53 Aboobo bakatalika kumuseka, nkaambo bakalizyi kuti wakalifwide.
54 Pele wakamujata kujanza akumwiita wati: “Omwana, buka!”+
55 Mpoonya muuya*+ wakwe wakapiluka, eelyo wakabuka ndilyonya,+ alimwi Jesu wakalailila kuti musimbi ooyo apegwe cakulya.
56 Bazyali bamwana ooyu bakakkomana kapati, pele wakabalailila kuti bataambili muntu uli woonse cakacitika.+
Bupanduluzi buyungizyidwe
^ Naa ambweni, “Kwaciindi cilamfwu wakalimujisi.”
^ Mu Chigiriki, “Legioni.”
^ Naa “nguzu zipa buumi.”
