Marko 8:1-38
8 Kumazuba aayo, alimwi kwakali nkamu mpati yabantu, alimwi bakanyina cakulya. Aboobo wakaita basikwiiya bakwe akubaambila kuti:
2 “Yandeetezya nkamu yabantu eeyi,+ nkaambo aba kale mazuba otatwe ngobakkala andime alimwi tabajisi cakulya.+
3 Ikuti ndibaambile kuti baunke mwabo-mwabo anzala,* balanetuka munzila, alimwi bamwi bazwa kulamfwu.”
4 Pele basikwiiya bakwe bakamwiingula kuti: “Ino musyokwe omuno muntu inga wazijana kuli zinkwa zikonzya kukkwana bantu aaba?”
5 Mpoonya wakababuzya kuti: “Ino mujisi zinkwa zyongaye?” Bakati: “Zili ciloba.”+
6 Aboobo wakalailila nkamu yabantu kuti bakkale ansi. Mpoonya wakabweza zinkwa zili ciloba, wapaila, wazikomauna akutalika kupa basikwiiya bakwe kuti baabanye bantu, mpoonya bakazyaabanya nkamu yabantu.+
7 Alimwi bakalijisi atuswi tusyoonto, mpoonya naakamana kulumba Leza, wakabaambila kuti baabanye bantu.
8 Aboobo bakalya akukkuta, alimwi bakabweza zisuwo zipati* zili ciloba zizwide bufwefwelenga ibwakacaala.+
9 Lino kwakali baalumi batandila ku 4,000. Kumane wakabaleka kuti baunke.
10 Ndilyonya wakatanta bwato abasikwiiya bakwe akuboola kucooko ca Dalimanuta.+
11 Ooko ba Farisi bakaboola akutalika kukazyanya anguwe, kabayanda kuti abape citondezyo kuzwa kujulu, ikumusunka.+
12 Aboobo wakapenga kapati mumoyo, eelyo wakabuzya kuti: “Nkaambo nzi izyalani eeli ncoliyanda citondezyo?+ Ncobeni ndati, kunyina citondezyo ciyoopegwa kuzyalani eeli pe.”+
13 Naakamana kwaamba boobo, wakatanta bwato akuya mutala limwi.
14 Pele bakaluba kubwezelezya zinkwa, aboobo kwakali buyo cinkwa+ comwe ncobakajisi mubwato.
15 Eelyo wakabacenjezya cakutainda mumbali kuti: “Amulangisye; amubucenjelele bumena bwaba Farisi abumena bwa Heroda.”+
16 Aboobo bakatalika kukazyanya akaambo kakuti tiibakajisi zinkwa.
17 Naakabona boobo, wakababuzya kuti: “Nkaambo nzi ncomukazyanya akaambo kakuti tamujisi zinkwa? Sena aino tamunazyiba akumvwisya ncecaamba eeci? Sena myoyo yanu icikatazyigwa kumvwisya?
18 ‘Nokuba kuti mulijisi meso, sena tamuboni; alimwi nokuba kuti mulijisi matwi, sena tamumvwi?’ Sena tamuciyeeyi ciindi
19 nindakakomauna zinkwa+ zyosanwe kusanina baalumi bali 5,000, kuti zyakali zyongaye zisuwo izyakazwide bufwefwelenga nzyomwakabweza?” Bakamwiingula kuti: “Zyakali 12.”+
20 “Nindakakomauna zinkwa zili ciloba kusanina baalumi bali 4,000, ino zyakali zyongaye zisuwo zipati* izyakazwide bufwefwelenga nzyomwakabweza?” Bakamwiingula kuti: “Zyakali ciloba.”+
21 Kumane boobo wakababuzya kuti: “Sena aino tamunamvwisya ncecaamba eeci?”
22 Lino bakasika ku Betesaida. Okuya bantu bakamuletela mwaalumi moofwu, alimwi bakamukombelezya kuti amujate.+
23 Mpoonya wakamujata kujanza mwaalumi ooyo moofwu akumutola kunze aamunzi. Naakamuswida mate mumeso+ wakamujata akumubuzya kuti: “Sena kuli ncobona?”
24 Muntu ooyu wakaintamuka walanga akwaamba kuti: “Ndibona bantu, pele balibonya mbuli zisamu zyeendeenda.”
25 Ciindi cabili wakajata meso aamuntu ooyu, eelyo wakatalika kubona kabotu. Boofwu bwakwe bwakamana alimwi wakali kukonzya kubona zintu zyoonse mbozibede.
26 Aboobo wakamuleka kuti aunke kuŋanda akumwaambila kuti: “Utajokeli mumunzi.”
27 Lino Jesu abasikwiiya bakwe bakaunka kuminzi yaku Kaisareya Filipi, mpoonya munzila wakatalika kubuzya basikwiiya bakwe kuti: “Ino bantu baamba kuti ndime ni?”+
28 Bakamwiingula kuti: “Johane Mubbapatizi,+ pele bamwi baamba kuti Elija,+ alimwi bamwi baamba kuti, umwi wabasinsimi.”
29 Mpoonya wakababuzya kuti: “Ino nywebo mwaamba kuti ndime ni?” Petro wakamwiingula kuti: “Nduwe Kristo.”+
30 Kumane wakabalailila cakusinizya kuti bataambili muntu uuli woonse kuti ngu Kristo.+
31 Alimwi wakatalika kubayiisya kuti Mwanaamuntu weelede kwiinda mumapenzi manji akukakwa abaalu, basilutwe babapaizi abalembi akuti uyoojaigwa+ akubuka kwaakwiinda mazuba otatwe.+
32 Masimpe, wakali kubaambila kaambo aako cakutainda mumbali. Pele Petro wakamutola ambali akutalika kumukalalila.+
33 Mpoonya walo wakacenguluka akulanga basikwiiya bakwe, akumukalalila Petro kuti: “Koya kusyule lyangu, Saatani! Nkaambo ulaamizeezo yabantu ikutali ya Leza.”+
34 Lino wakaita nkamu yabantu antoomwe abasikwiiya bakwe akubaambila kuti: “Ikuti umwi kayanda kunditobela, aliimye akunyamuna cisamu cakwe cakupenzyezya* akuzumanana kunditobela.+
35 Nkaambo kufwumbwa uuyanda kufwutula buumi bwakwe uyoobusweekelwa, pele kufwumbwa uusweekelwa buumi bwakwe akaambo kandime alimwi amakani mabotu uyoobufwutula.+
36 Mubwini, nimpindu nzi njakonzya kujana muntu ikuti wavwuba nyika yoonse pele wasweekelwa buumi bwakwe?+
37 Ncinzi mubwini muntu ncakonzya kupa kuti anunune buumi bwakwe?+
38 Nkaambo kufwumbwa uufwa nsoni akaambo kandime amajwi aangu muzyalani eeli lyabasimamambe* abasizibi, awalo Mwanaamuntu uyoofwa nsoni akaambo kamuntu ooyo+ aakuboola mubulemu bwa Bausyi antoomwe abangelo basalala.”+
Bupanduluzi buyungizyidwe
^ Naa “kakunyina ncibalya.”
^ Naa “zisuwo zyakunyamwida zyakulya.”
^ Naa “zisuwo zyakunyamwida zyakulya.”
^ Amubone Bupanduluzi Bwamabala.
^ Naa “lyabantu batasyomeki.”
