Matayo 24:1-51
24 Lino Jesu naakali kuzwa kutempele, basikwiiya bakwe bakamusikila kuti bamutondezye mayake aatempele.
2 Mukubaingula wakati: “Sena tamuzibwene zintu zyoonse eezyi? Ncobeni ndimwaambila kuti, taakwe bbwe liyoocaala aano atala aabbwenyina kakunyina kukolomonwa.”+
3 Kakkede aa Cilundu ca Maolifa, basikwiiya bakamusikila kumbali akumubuzya kuti: “Kotwaambila, ino ndilili zintu eezyi noziyooba alimwi ncinzi ciyooba citondezyo cakubako*+ kwako acamamanino aabweende bwazintu?”*+
4 Eelyo mukwiingula Jesu wakabaambila kuti: “Amulangisye kuti kutabi muntu uumweena,+
5 nkaambo banji bayooboola muzina lyangu, kabati, ‘Ndime Kristo,’ eelyo bayakweena bantu banji.+
6 Muyoomvwa nkondo mumasena aalaafwaafwi alimwi amasena aali kule. Nywebo mutakayoowi pe, nkaambo zintu eezyi zyeelede kucitika, pele mamanino taanasika.+
7 “Nkaambo cisi ciyoobukila cisinyina abwami buyoobukila bwaminyina,+ alimwi kuyooba nzala+ amizuzumo yanyika mumasena aaindene-indene.+
8 Zintu zyoonse eezyi ngamatalikilo aamapenzi aali mbuli kumyongwa kwamukaintu uuyanda kutumbuka.
9 “Mpoonya bantu bayoomupenzya+ akumujaya,+ alimwi muyoosulwa amasi oonse akaambo kazina lyangu.+
10 Kunze lyaboobo, ibanji bayoolebwa akwaaba umwi amweenzinyina alimwi bayoosulana.
11 Basinsimi bakubeja banji bayoobuka akweena bantu banji;+
12 alimwi akaambo kakuvwula kwabubi, luyando lwabantu banji luyoomana.
13 Pele ooyo uuliyumya kusikila kumamanino uyoofwutulwa.+
14 Alimwi makani mabotu aa Bwami aaya ayookambaukwa munyika yoonse kuti bukabe bumboni kumasi oonse,+ mpoonya mamanino ayoosika.
15 “Aboobo, mwaakubona cintu cisesemya cileta lunyonyooko ncaakaamba musinsimi Daniele kaciimvwi mubusena busalala+ (ooyo uubala abelesye maano),
16 mpoonya aabo bali mu Judaya bakatalike kutijila kumalundu.+
17 Muntu uuli aciluli caŋanda atakaseluki kuti agusye zintu zili muŋanda yakwe,
18 awalo muntu uuli mumuunda atakapiluki kuyoobweza cisani cakwe caatala.
19 Maawe kuli bamakaintu bamitide abaabo banyonsya bana kumazuba aayo!
20 Kamuujisi kupaila kutegwa mutakatiji ciindi camupeyo naa mubuzuba bwa Sabata;
21 nkaambo kuciindi eeco kuyooba mapenzi mapati+ aatanacitikide kuzwa kumatalikilo aanyika kusikila sunu, alimwi kunyina naayooba limbi pe.+
22 Mubwini, kuti mazuba aayo atakafwiinsyigwi, kunyina muntu uuyookonzya kufwutuka; pele akaambo kabasale imazuba aayo ayoofwiinsyigwa.+
23 “Alimwi ikuti umwi akamwaambile kuti, ‘Amubone! Ngooyu Kristo,’+ naa, ‘Nguulya!’ Mutakasyomi pe.+
24 Nkaambo ba Kristo bakubeja abasinsimi+ bakubeja bayoobuka akucita zitondezyo zipati azintu zigambya ikutegwa, ikuti kacikonzyeka bakeene+ nobaba basale.
25 Amubone! Ndamucenjezyela limwi.
26 Aboobo, ikuti bantu bamwaambila kuti, ‘Amubone! Uli munkanda,’ mutaunki pe; alimwi naa bati, ‘Amubone! Uli mumaanda aamukati mwini,’ mutasyomi pe.+
27 Nkaambo mbubonya lulabo mbolulaba kuzwa kujwe akumunika kusikila kumbo, akwalo kubako* kwa Mwanaamuntu mbokuyooba.+
28 Kufwumbwa ooko kuli mutunta, nkonkuko nkobayoobungana antoomwe basikwaze.+
29 “Mbwaayoomanina buyo mapenzi aakumazuba aayo, izuba liyoosizyigwa,+ awalo mwezi taukamuniki, alimwi nyenyeezi ziyooloka kuzwa kujulu, anguzu zyakujulu ziyoozungaanizyigwa.+
30 Mpoonya citondezyo ca Mwanaamuntu ciyoolibonya kujulu, eelyo bantu bamisyobo yoonse anyika bayoolyuuma acamba akulila,+ alimwi bayoobona Mwanaamuntu+ kaboola mumakumbi aakujulu kajisi nguzu abulemu bupati.+
31 Alimwi uyootuma bangelo bakwe akulila kupati kwamweembo, eelyo bayoobunganya basale bakwe antoomwe kuzwa kumyuwo yone,* kuzwa kumagolelo amwi aajulu kusikila kulaambi.+
32 “Lino amwiiye cikozyanyo eeci kumukuyu: Mboyatalikila buyo kusyuuka mitabi yanguwo akuba amatuvwu, mulazyiba kuti mainza alaafwaafwi.+
33 Mbubonya buyo andinywe, mwaakubona zintu zyoonse eezyi, amukazyibe kuti ulaafwaafwi, uli amulyango.+
34 Ncobeni ndimwaambila kuti izyalani eeli talikamani pe kusikila zintu zyoonse eezyi zikacitike.
35 Julu anyika ziyoomana, pele majwi aangu taakamani pe.+
36 “Kujatikizya buzuba oobo alimwi aciindi kunyina uuzyi pe,+ nobaba bangelo kujulu naba Mwana, pele buyo Taata alikke.+
37 Nkaambo mbubonya mazuba aa Nowa mbwaakabede,+ akwalo kubako* kwa Mwanaamuntu mbokuyooba.+
38 Nkaambo mbubonya mbuli kumazuba aayo Zambangulwe kalitanaboola, bakali kulya akunywa, basankwa bakali kukwata abalo basimbi bakali kukwasyigwa kusikila buzuba Nowa mbwaakanjila mubwato,+
39 pele tiibakabikkila maano kusikila mane Zambangulwe lyakaboola akubatola boonse,+ mbubonya buyo akwalo kubako kwa Mwanaamuntu mbokuyooba.
40 Lino baalumi bobilo banooli mumuunda; omwe uyootolwa mpoonya umwi uyoosiigwa.
41 Bamakaintu bobilo banooziya aziyo; omwe uyootolwa mpoonya umwi uyoosiigwa.+
42 Aboobo amulangile, nkaambo tamuzyi buzuba Mwami wanu nayooboola.+
43 “Pele kamuzyiba kuti: Ikuti mwiniŋanda naakalizyi ciindi* mubbi ncaakali kuboola,+ naatakoona akumulekela mubbi kuti anjile muŋanda yakwe.+
44 Aboobo, andinywe amulibambile,+ nkaambo Mwanaamuntu ulaboola aciindi ncomutayeeyeli.
45 “Ino mubwini, nguni muzike uusyomeka alimwi uucenjede* ooyo simalelaakwe ngwaakasala kulanganya babelesi bamuŋanda yakwe, kuti kabapa cakulya cabo aciindi ceelede?+
46 Ulikkomene muzike ooyo ikuti simalelaakwe aakusika akamujane kacita oobo!+
47 Ncobeni ndimwaambila kuti, uyoomusala kulanganya lubono lwakwe loonse.
48 “Pele ikuti muzike ooyo mubi mumoyo wakwe waamba kuti, ‘Simalelaangu wamuka,’+
49 mpoonya watalika kuuma bazikenyina, kulya alimwi akunywa abacakolwa,
50 simalelo wamuzike ooyo uyooboola mubuzuba mbwatayeeyeli alimwi aaciindi ncatazyi,+
51 eelyo uyoomupa cisubulo cipati alimwi akumusowela kooko kujanwa basikuupaupa ameso. Ooko nkonkuko nkwayoolilila akulumina ntwino.+
Bupanduluzi buyungizyidwe
^ Amubone Bupanduluzi Bwamabala.
^ Naa “aaciindi.” Amubone Bupanduluzi Bwamabala.
^ Amubone Bupanduluzi Bwamabala.
^ Naa “kumabazu one aanyika.”
^ Amubone Bupanduluzi Bwamabala.
^ Naa “kuti nciindi nzi cabusiku.”
^ Naa “imusongo.”
