Milimo 11:1-30
11 Lino baapostolo abakwesu ibakali mu Judaya bakamvwa kuti bantu bamasi abalo bakalitambula jwi lya Leza.
2 Aboobo Petro naakasika ku Jerusalemu, ibakali kutobela bupalule+ bakatalika kumutongooka,*
3 kabati: “Yebo wakanjila muŋanda yabantu batapalwidwe akulya ambabo.”
4 Aboobo Petro wakabapandulwida makani oonse mbwaabede, wakati:
5 “Ndakali kupaila mumunzi wa Jopa, mpoonya mucilengaano ndakabona cintu cimwi kaciboola ansi mbuli cisani cipati caangidwe mumakkona one icilengelezyegwa, alimwi mane cakasika aawo mpondakabede.+
6 Nindakalangisya mulincico, ndakabona banyama bamunyika bamaulu one, banyama bamusyokwe, ibakalaba alimwi abayuni bamujulu.
7 Alimwi ndakamvwa jwi lyakandaambila kuti: ‘Nyamuka Petro, jaya ulye!’
8 Pele ndakati: ‘Peepe Mwami, nkaambo mukanwa lyangu tamunabuzuba mwanjila cintu cisofweede naa citasalali.’
9 Iciindi cabili ijwi lizwa kujulu lyakati: ‘Koleka kwaamba zintu nzyaasalazya Leza kuti zilisofweede.’
10 Eeci cakacitika ciindi catatu, mpoonya zyoonse zyakakwelwa akupilusyigwa kujulu.
11 Alimwi aciindi nciconya eeco, kwakasika baalumi botatwe aŋanda mpotwakabede ibakatumidwe kulindime kuzwa ku Kaisareya.+
12 Mpoonya muuya wakandaambila kuti nduunke ambabo, kakunyina kudooneka pe. Pele abalo bakwesu aaba bali cisambomwe bakaunka andime, eelyo twakanjila muŋanda yamwaalumi ooyo.
13 “Wakatwaambila mbwaakabona mungelo iwakaima muŋanda yakwe akumwaambila kuti: ‘Kotuma bantu ku Jopa kuyakwiita Simoni uutegwa Petro,+
14 eelyo uyookwaambila zintu eezyo zinga zyapa kuti yebo abamuŋanda yako boonse mukafwutulwe.’
15 Pele nindakatalika kwaambaula, muuya uusalala wakabasikila mbubonya mbowakatusikila aswebo kumatalikilo.+
16 Mpoonya ndakaibaluka ncaakali kwaamba Mwami, naakali kwaamba kuti: ‘Johane wakali kubbapatizya amaanzi,+ pele nywebo muyoobbapatizyigwa amuuya uusalala.’+
17 Aboobo ikuti Leza wakapa cipego nciconya eeco kulimbabo mbubonya mbwaakacita akulindiswe notwakasyoma Mwami Jesu Kristo, ino mebo ndime ni kuti ndimulesye Leza?”*+
18 Nobakamvwa zintu eezyi, bakaleka kukazya,* alimwi bakatembaula Leza, balaamba: “Anu nkokuti Leza wapa coolwe cakweempwa kubantu bamasi kutegwa abalo bakajane buumi.”+
19 Lino aabo ibakamwaika+ akaambo kamapenzi aakabuka kujatikizya Sitefano bakaakusika ku Fonike, ku Kupro aku Antiokeya, pele bakali kukambaukila buyo ba Juda.+
20 Pele, baalumi bamwi akati kabo ibazwa ku Kupro aku Kurene bakaboola ku Antiokeya akutalika kwaambaula abantu bakanana Chigiriki, kabaambilizya makani mabotu aa Mwami Jesu.
21 Kunze lyaboobo, ijanza lya Jehova* lyakali ambabo, alimwi bantu banji bakaba basyomi akusandukila ku Mwami.+
22 Impuwo yabo yakamvwugwa kumbungano yamu Jerusalemu, eelyo balo bakatuma Barnaba+ ku Antiokeya.
23 Lino naakasika akubona luzyalo lwa Leza, wakakondwa akutalika kubakulwaizya boonse kuti bazumanane kukakatila ku Mwami amoyo omwe;+
24 nkaambo wakali mwaalumi mubotu, uuzwide muuya uusalala alusyomo. Alimwi nkamu yabantu mpati yakayungizyigwa ku Mwami.+
25 Aboobo wakaunka ku Tarso kuyooyandaula Saulo.+
26 Naakamujana, wakamuleta ku Antiokeya. Eelyo kwamwaka woonse bakali kuswaangana antoomwe ambabo mumbungano akuyiisya nkamu yabantu mpati, alimwi kwakali ku Antiokeya basikwiiya kwiinda mukusololelwa a Leza nkobakasaanguna kwiitwa kuti Banakristo.+
27 Kumazuba aayo basinsimi+ bamwi bakaselemukila ku Antiokeya kuzwa ku Jerusalemu.
28 Umwi wabo uutegwa Agabo+ wakanyamuka akusinsima kwiinda munguzu zyamuuya kuti kwakali kuyooba nzala mpati munyika yoonse,+ eelyo nzala eeyi yakaba ncobeni kuciindi ca Kilaudiyo.
29 Aboobo basikwiiya aabo bakakanza umwi aumwi kweelana ancaakali kukonzya kupa,+ ikutumina lugwasyo+ kubakwesu bakkala mu Judaya;
30 alimwi ncobeni bakacita mbubonya oobo, bakatuma lugwasyo oolo kubaalu kwiinda muli Barnaba a Saulo.+
Bupanduluzi buyungizyidwe
^ Naa “kukazyanya anguwe.”
^ Naa “ndimusinkile Leza?”
^ Mu Chigiriki, “bakaumuna wi.”
^ Amubone Makani Aayungizyidwe A5.
