Milimo 6:1-15
6 Lino mumazuba aayo basikwiiya nobakali kuyaabuvwula, iba Juda baambaula Chigiriki bakatalika kutongooka ba Juda ibaambaula Chihebrayo nkaambo bamukabafwu bankobazwa tiibakali kupegwa zyakulya izyakali kwaabilwa abuzuba.+
2 Aboobo ibali Kkumi Ababili bakaita nkamu yabasikwiiya antoomwe akubaambila kuti: “Tacili cibotu* pe kuti swebo tuleke kuyiisya Jwi lya Leza akutalika kwaabila bantu zyakulya.+
3 Aboobo bakwesu amusale baalumi bali ciloba akati kanu ibajisi mpuwo mbotu,*+ ibazwide muuya abusongo,+ ikutegwa tubape mulimo wakulanganya makani aaya aayandika;+
4 pele swebo tulazumanana kubikkila maano kumipailo akumulimo wakuyiisya jwi lya Leza.”
5 Lino majwi ngobakaamba akababotela boonse munkamu, aboobo bakasala Sitefano, mwaalumi uuzwide lusyomo amuuya uusalala, antoomwe a Filipo,+ Purokoro, Nikanora, Timoni, Paramena alimwi a Nikolayi mu Juda musandule waku Antiokeya.
6 Bakabaleta kubaapostolo, eelyo nobakamana kupaila, baapostolo bakabikka maanza aabo aalimbabo.+
7 Aboobo, ijwi lya Leza lyakazumanana kumwaika,+ eelyo mweelwe wabasikwiiya wakali kuyaabukomena kapati+ mu Jerusalemu; alimwi nkamu mpati yabapaizi abalo bakatalika kusyoma.+
8 Lino Sitefano kazwide luzyalo lwa Leza anguzu, wakali kucita zintu zigambya zipati azitondezyo akati kabantu.
9 Pele bantu bamwi bankamu ya Cikombelo ca Bantu Baangulukide bakaboola antoomwe abantu bamwi baku Kurene, ku Alekizandiriya alimwi abamwi bazwa ku Kilikiya aku Asiya kuti bamukazye Sitefano.
10 Nokuba boobo kunyina nobakakonzya kuzunda busongo amuuya nzyaakali kubelesya kwaambaula.+
11 Mpoonya cakusisikizya bakoongelezya bantu bamwi kuti baambe kuti: “Twakamumvwa kaamba majwi aakusampaula Musa alimwi a Leza.”
12 Alimwi bakanyonganya bantu, baalu alimwi abalembi, eelyo mpoonya aawo bakamujata akumukwelenkanya kumutola ku Nkuta Mpati Yaba Juda.
13 Mpoonya bakaleta bakamboni bakubeja ibakaamba kuti: “Imwaalumi ooyu taleki kwaamba majwi aakusampaula busena oobu busalala alimwi a Mulawo.
14 Mucikozyanyo, twakamumvwa kaamba kuti ooyu Jesu muna Nazareta uyoonyonyoona busena oobu akucinca zilengwa nzyaakatupa Musa.”
15 Lino boonse aabo ibakakkede mu Nkuta Mpati Yaba Juda nobakamulangisisya, bakabona kuti busyu bwakwe bwakali mbuli busyu bwamungelo.
Bupanduluzi buyungizyidwe
^ Mu Chigiriki, “Tacikkomanisyi.”
^ Naa “baalumi bali ciloba balumbaizyigwa.”
