Tito 2:1-15
2 Pele yebo, kozumanana kwaamba zintu zyeendelana anjiisyo mbotu.*+
2 Bamanene ababe bantu bataciindizyi muzilengwa, basimide mumizeezo, balibatamika, bayumu mulusyomo, muluyando amukuliyumya.
3 Abalo bamacembele mbubonya ababe bantu balilemeka munzila iisalala, ibatabejelezyi bamwi twaambo, ibatali bazike kukunywa waini munji, pele ababe bamayi bazintu zibotu,
4 kuti balaye* bakaintu bacili bana-bana kuyanda balumi babo, kuyanda bana babo,
5 kulibatamika, kulilemeka kabotu, kuba bankutwe kubeleka milimo yaaŋanda,* kuba bantu bali kabotu, balibombya kubalumi babo,+ ikutegwa jwi lya Leza litasampaulwi.
6 Mbubonya buyo, abalo baalumi bacili bana-bana kozumanana kubakulwaizya kuti kabalibatamika.+
7 Yebo kopa cikozyanyo mukucita milimo mibotu munzila zyoonse. Koyiisya zintu zisalala cakubikkila maano kapati,+
8 koamba majwi mabotu* aatakonzyi kutongookwa,+ ikutegwa aabo bakazya bafwe nsoni, babule cintu cibyaabi cili coonse ncobatwaamba.+
9 Bazike abalibombye kuli basimalelaabo muzintu zyoonse,+ akusola kubakkomanisya, ikutali kubabbodweda,
10 ikutali kubabbida pe,+ pele beelede kusyomeka cakumaninina, kutegwa munzila zyoonse bape bamwi kutembaula kuyiisya kwa Mufwutuli wesu, Leza.+
11 Nkaambo luzyalo lwa Leza lwalibonya, iluleta lufwutuko kubantu boonse.+
12 Lutuyiisya kukaka bukkale bwakutayoowa Leza azisusi zyanyika+ akuti tweelede kupona cakulibatamika, cabululami alimwi acakubelekela Leza cakulyaaba mubweende bwazintu obuno,*+
13 notulindila bulangizi bukkomanisya+ akulibonya kwabulemu kwa Leza wesu mupati alimwi akwa Mufwutuli wesu, Jesu Kristo,
14 iwakalyaaba mwini akaambo kandiswe+ ikutegwa atwaangunune*+ kumisyobo yoonse yabubi alimwi akulisalazizya bantu bakwe balibedelede, ibasungweede kubeleka milimo mibotu.+
15 Kozumanana kwaamba zintu eezyi alimwi kokulwaizya akusinsa anguzu zyoonse nzyookapegwa.+ Utalekeli muntu uuli woonse kukunyansya pe.
Bupanduluzi buyungizyidwe
^ Naa “iigwasya.”
^ Naa “bayeekezye; bayiisye.”
^ Naa “kabalanganya maanda aabo.”
^ Naa “aagwasya.”
^ Naa “muciindi ecino.” Amubone Bupanduluzi Bwamabala.
^ Mu Chigiriki, “atununune; atuvwune.”
