Tusimpi 6:1-35
6 Mwanaangu, ikuti naa wapa cisyomezyo cakuzumina kubbadela cikwelete camweenzinyoko,+Ikuti naa wasukana mumaanza* amweenzu,+
2 Ikuti naa wacegwa acisyomezyo cako,Ikuti wajatwa amajwi aazwa kumulomo wako,+
3 Nkokuti mboobu mboyelede kucita mwanaangu, kutegwa waanguluke,Nkaambo waba mujanza lyamweenzinyoko:
Koya ukalibombye akulikombelezya cakufwambaana kumweenzinyoko.+
4 Utalekeli meso aako koona,Noziba zikoye zyako kuumfwula.
5 Kolivwuna mbuli nanja kuzwa mujanza lyamuvwimi,Ambuli kayuni kuzwa mujanza lyasikuteya tuyuni.
6 Yebo omutolo, koya kutunyenyene;+Kobona mbotubeleka kutegwa usongwaale.
7 Nokuba kuti tatujisi mweendelezi, mulangizi naba muleli,
8 Tulabamba cakulya cantuto ciindi cacilimo,+Tulayobolola zyakulya zyantuto ciindi cakutebula.
9 Yebo omutolo, ino uloona kwaciindi cilamfwu buti?
Ino ulabuka lili muŋonzi zyako?
10 Waamba kuti, kaasye ndoonoone aniini, nduumfwule-umfwule aniini,Kandicilivwunga maanza aniini kutegwa ndilyookezye,+
11 Ulabona, bucete bulakusikila mbuli mubbi,Akubula kwako mbuli cigwebenga.+
12 Muntu wabuyo alimwi mubi uleendeenda kaamba majwi aabumpelenge;+
13 Ulatyanka liso,+ ucita zitondezyo akuulu kwakwe, akutondeka aminwe yakwe.
14 Amoyo wakwe wabumpelenge,Ciindi coonse ukanza kucita cibi+ alimwi akubusya mazwanga.+
15 Aboobo mapenzi ayakumusikila cakutayeeyelwa;Uyootyolwa muciindi cisyoonto buyo, eelyo takaponi pe.+
16 Kuli zintu zili cisambomwe nzyasulide Jehova;Inzya, izintu zili ciloba zimusesemya:
17 Meso aalisumpula,+ mulaka waamba zyakubeja,+ maanza aatila bulowa bwabantu banyina mulandu,+
18 Moyo uukanza zintu zibi,+ maulu aafwambaana kulundukila kububi,
19 Kamboni wakubeja ooyo waamba zyakubeja zyalo-zyalo,+Alimwi amuntu uuli woonse uubusya mazwanga akati kababunyina.+
20 Mwanaangu, kobamba mulawo wabauso,Alimwi utaleki kutobela malailile* aabanyoko.+
21 Kozizambaila kumoyo wako ciindi coonse;Kozyaangilila munsingo yako.
22 Wanakweenda, zinookusololela;Woona, zinookulinda;Alimwi wabuka, zinakwaambaula anduwe.*
23 Nkaambo mulazyo ndilambe,+Alimwi mulawo ngomumuni,+Mpoonya kusinswa akulaigwa nenzila yabuumi.+
24 Zilakukwabilila kumukaintu mubi,+Kumajwi aakoongelezya aazwa amulaka wamukaintu uutalilemeki.*+
25 Utanyomeneni kubota kwakwe mumoyo wako+Alimwi atakutoleli moyo ameso aakwe aaongelezya,
26 Nkaambo akaambo kamukaintu muvwuule muntu ulamaninwa zintu akucaazya buyo cinkwa,+Pele mukamuntu, ulavwima buumi buyandisi.
27 Sena muntu ulakonzya kubikka mulilo acamba cakwe kakunyina kuumpa zisani zyakwe?+
28 Sena muntu ulakonzya kweenda atala aamakala aamulilo kakunyina kupya kumaulu?
29 Oobo mbocibede akumuntu woona amukaintu wamweenzinyina;Kunyina uuguma mukaintu ooyo uutakasubulwi.+
30 Bantu tabasampauli mubbiCiindi nabba kutegwa amane nzala iimujisi.
31 Pele ikuti naa wajatwa, zintu eezyo nzyaabba ulazibbadelela ziindi zili ciloba;Ulalunga alubono loonse lwamuŋanda yakwe.+
32 Muntu woonse uucita bumambe amukaintu takwe maano pe;*Ooyo uucita boobo ulalinyonyoona mwini.+
33 Ulajana buyo zilonda amasampu,+Alimwi masampu aakwe taakamani pe.+
34 Nkaambo buzuba* bupa kuti mulumi anyeme kapati;Alimwi takeengeleli pe ciindi aakujola cibi kucibi.+
35 Kunyina nayoozumina kubbadelwa;*Takazumini kukombelezyegwa pe, nocikomena buti eeco ncomupa.
Bupanduluzi buyungizyidwe
^ Nkokuti, kuzuminana.
^ Naa “mulawo.”
^ Naa “zinakukuyiisya.”
^ Mu Chihebrayo, “takwe moyo.”
^ Bamwi baamba kuti “bufwi.”
^ Naa “cinunuzyo.”
