MAFWUMOFWUMO mu October 1, 1965, basikalumamba ibazulilwa kucipani cakkomyunizimu citegwa Indonesian Communist Party (PKI) bakajaya bapati babasikalumamba balemekwa ibali cisambomwe mukusola kwaatula mfwulumende. Mfwulumende yakabweza ntaamu cakufwambaana alimwi cakuteengelela. Mumanyongwe aataambiki aakacitika mucisi coonse, bantu basika ku 500,000 ibakali kubonwa kuti batobela cipani cakkomyunizimu bakajaigwa.

Nokwakainda mvwiki izili mbozibede kuzwa ciindi nocakaala kwaatula mfwulumende, mupati wabasikalumamba umwi wakandaambila kuti izina lyangu ndilyakali lyakusaanguna aamulongo wamazina aabasololi bazikombelo bamucilawo cesu ibakeelede kujaigwa abakkomyunizimu. Alimwi buya wakandaambila kuti inga wanditondezya cuumbwe ncondakabambilidwe kuzikkilwa, pele cabulemu ndakakaka. Akaambo kamuuya iwakavwulide kapati wakujatikizyigwa mutwaambo twacisi, tiindakali kuyanda kubonwa munsi-munsi anguwe kutegwa nditabi muntenda yakubonwa kuti andime ndilatola lubazu mutwaambo twacisi.