MU October 6, 2014, bubambe bwakusola sikapepele waa Intaneti uutegwa JW Broadcasting bwakatalisyigwa mumwaambo wa Chingisi. * Kuzwa mu August 2015, makani aabandikwa mulisikapepele ooyu akasandululwa mumyaambo iyiinda ku 70 kutegwa abalo bakwesu abacizyi banji bagwasyigwe amakani aakumuuya aaya aayaka. Bantu banji ibeebelela nyika yoonse mboizulwa baamba majwi aakulumba kujatikizya cipego cipya eeci cikondelezya. Pele ino ncinzi cakajatikizyidwe mukupanga sikapepele wa JW Broadcasting?

 Cakusaanguna, kwakali kuyandika kujana busena ibweelela. Kumaofesi mapati aa Bakamboni ba Jehova mu Brooklyn, New York, ibusena bweelela bwakasalwa mumayake aategwa 30 Columbia Heights. Mumvwiki yomwe buyo, busena oobo ibwakasalwa bwakasalazyigwa, mpoonya cibeela cilanganya zyakubambulula icitegwa Maintenance Department cakatalika kubamba busena oobo kuti bweelele kumwaila mapulongilamu aamulisikapepele alimwi nkamu yabasikupanga mapulani bakapanga situdiyo iilibonya kabotu mukati alimwi yamazuba aano. Bakwesu abacizyi banji bamucisi ca United States bakali kubeleka mane masiku ikwaanza situdiyo alimwi akubona mbobakonzya kwiiyaka cakufwambaana. Kuvwuntauzya ikuvwula kutola myezi iili mbwiibede kwakacitwa mumazuba masyoonto buyo, mpoonya cakutasowa ciindi cibeela cuula zintu icitegwa Purchasing Department cakatalika kooda zintu zinji izyakali kuyandika.

Ntambo zinji ziindene-indene zyakabikkwa, mpoonya bakabikkila maano kubona kuti zyoonse zibelesyo zyakali kubeleka kabotu. Aaciindi nciconya eeci, mumasitudiyo eesu aaku Patterson, nkamu yesu yabaimbi ibabelesya ziimbyo yakali kulekkooda nyimbo iilila kumatalikilo aamapulogilamu, antoomwe abakwesu abacizyi ibakaboolede kuzwa mumasi manji kuzyoolekkooda nyimbo. Tubbuku twamakani twakalembwa, kwakabikkwa bubambe bwakucita zitondezyo zyazintu izyakacitika kale, alimwi bakwesu abacizyi ibabelekela mumasitudiyo eesu aaku Brooklyn, Patterson, alimwi aku Wallkill kubikkilizya amasi aambi nyika yoonse mboizulwa bakabeleka canguzu kupanga mavidiyo. Ciindi situdiyo noyakamana kuyakwa alimwi azibelesyo zyoonse nozyakabikkwa, mulimo wakatalika wakulibambila  makani aakali kuyoobandikwa mulisikapepele mumyezi misyoonto iyakusaanguna.

Notwakabuzya syaazibwene umwi mumulimo ooyu kuti naa inga citola ciindi cilamfwu buti kuyaka situdiyo iili boobu, wakaamba kuti bunji bwaziindi mulimo ooyu inga utola mwaka woonse acisela. Bakwesu abacizyi bankutwe bakaumanizya mulimo ooyu mumyezi yobilo buyo!

Izyacitika zilakkomanisya kapati! Pulogilamu yamwezi umwi aumwi, yalo bunji bwaziindi iibikkwa aawebbusaiti mubuzuba bwa Muhulo bwakusaanguna mumwezi, ileebelelwa ziindi ziinda kumamiliyoni obilo mumwezi ooyo. Kubikkilizya amavidiyo aambi oonse, mapulogilamu aamulisikapepele aleebelelwa ziindi ziinda kumamiliyoni aali kkumi amwezi.

Ino bantu ba Jehova balimvwa buti kujatikizya cipego cakumuuya eeci cipya? Ngaaya majwi amwi masyoonto buyo aakulumba:

• “Obuno busiku buli akati kamasiku aandikkomanisya kapati mubuumi bwangu! Sunu masiku, mebo abakaintu bangu twali kweebelela pulogilamu yamu May 2015 ya JW Broadcasting, ndilikkomene kapati cakunga tandijisi amajwi aakwaamba. Pulogilamu eeyi ili akati kazipego zibotu kapati nzyondatambula kuzwa kuli Jehova. Tulumba Kabunga Keendelezya alimwi abakwesu abacizyi boonse ibakabeleka canguzu kutubambila cipego eeci cakumuuya citaliboteli.”—Indonesia.

•  “Ndilino buyo aawa bakwesu banji nobajana coolwe cakumvwa umwi wamu Kabunga Keendelezya kapa makani. Lino tulakonzya kubamvwa alimwi akubabona. Kwiinda mbocakabede kaindi, lino tulimvwa kuba afwaafwi kapati abamu Kabunga Keendelezya alimwi abunyina bwanyika yoonse.”—Kenya

• “Akaambo kakuti balumi bangu tabali bakamboni, cilandikatazya kapati kukomba mumukwasyi antoomwe abana bangu bobilo. Aboobo, mebo kundigama mapulogilamu aaya aamulisikapepele andigwasya kapati. Andipa kulimvwa kuti ndili cibeela cambunga ya Leza, alimwi alandikulwaizya kapati mebo abana bangu. Masimpe eeci ncilongezyo cizwa kuli Jehova.”—Britain.

• “Eelo kaka tulaiyanda JW Broadcasting! Mipailo yesu yakaingulwa ciindi mapulogilamu naakatalika kusandululwa amumyaambo iimbi. Tulakulwaizigwa kapati bakwesu notubona mbomukkomene, alimwi ambomukukkomanina kukomba Jehova. Kuzwa ciindi noyakatalika pulogilamu yesu yamulisikapepele, lino tulimvwa kuti tuli cibeela ncobeni cambunga ya Jehova iitaliboteli alimwi iigambya.”—Czech Republic.

• “Kuswiilila makani aapegwa abakwesu bamu Kabunga Keendelezya mumwaambo wangu kwayumya cilongwe cangu a Jehova.”—Brazil.

• “Ndabelekela Jehova kwamyaka iili 16 lino, pele kunze lyabuzuba mbondakabbapatizyigwa kunyina buzuba mbondakakkomene akubotelwa kapati mbuli sunu. Twamulumba bakwesu akaambo ka JW Broadcasting.”—Brazil.

Kwiinda mukugwasyigwa a Jehova, tusyoma kuti JW Broadcasting ilazumanana kuba pulogilamu iibagwasya kapati babunyina nyika yoonse mboizulwa alimwi akupa kuti Jehova, azumanane kulemekwa akutembaulwa.