Mahonda aaitwa kuti mazemu, nceceendelo ncobayandisya kubelesya bantu mumadolopo aakumusanza kwacisi ca Benin. Mupainiya umwi wakugwasyilizya uutegwa Désiré wakabikka kalimba aazemu yakwe, mpoonya masipika wakaalanzya kucuuno cikkala bantu bakkwela honda. Aakalimba kakwe inga ciindi coonse ulizya makani aamumabbuku eesu naa zisobano zyamu Bbaibbele izyakalekkoodwa. Mbwaatantila  buyo ahonda muntu, tacitoli ciindi cilamfwu, inga ulatalika kuswiilila cakubikkila maano. Bantu banji balanoneezyegwa kapati kuswiilila cakunga nobasika nkobaya, balawayawaya kuseluka naa kukakila limwi buya kusikila mane makani ngobaswiilila amana. Ba Désiré baamba kuti: “Mubwini, inga ndiyanda kuti twasika nkobaya babbadale akuunka kutegwa ndijane sikutanta umbi, nokuba boobo, ndilizyi kuti iciyandika kapati ncakuti bamvwe makani mabotu ikutali kuti mebo ndijane mali. Kunze lyaboobo, inzila eeyi yandigwasya kwaabila mabbuku manji.”

Nolla mwana musimbi uulaamyaka iili cisambomwe uukkala abamukwasyi wakwe mubusena bwamalundu ku Burundi. Bumwi buzuba ciindi mukwasyi wakwe nowakali kujika cakulya aambaula, baalumi bobilo ibakali kubeleka aŋanda iibambene ayamukwasyi wakwe bakalomba mulilo wakuti abalo babbebbesye mbaula yabo. Nolla, walo watakalinatalika cikolo, ngowakatumidwe kuti akalange mulilo ciindi baalumi aaba nobakaboola. Wakabazumizya kubweza mulilo. Nokwakainda ciindi cisyoonto buyo, Nolla wakaunka nkobakabede baalumi aaba pele wakabona kuti mulilo ngobakabwezede bakaubelesya kudoneka musanga. Eeci cakamucima kapati, aboobo wakabaambila kuti, “Nindalizyi kuti mulilo muuyandila kuyasya tombwe, nindatamupa.” Mpoonya wakayeeya kuti mu Ŋanda ya Bwami wakabwene magazini iyakajisi cifwanikiso catombwe. Wakazuza kuya ku Ŋanda ya Bwami akubweza mamagazini obilo aa Ngazi Yamulindizi ya June 1, 2014 yalo iyakali kubandika makani aakufweba. Nolla wakajokela kubaalumi aaba, wakabapa mamagazini, akubaambila kuti baabale mpomunya aawo. Kwiinde ciindi cili mbocibede,  wakabajana alimwi akubapa tupepa twakubatamba kumuswaangano wacooko. Nobakabona kuti mwana musimbi ooyu ngukalya uzumanana, baalumi aaba bakajanika mazuba obilo kumuswaangano. Nobakali kulyookezya masyikati, Nolla wakababona akubaitila kucakulya amukwasyi wakwe. Akaambo kakuti nzyobakabona akumvwa amuswaangano zyakabakkomanisya, baalumi aaba bakatalika kwiiya Bbaibbele.

Baalu mucisi ca Liberia bamwaya mulumbe wa Bwami muntolongo ziindene-indene. Mupainiya waalubazu wazina lya Yves walo uubelekela mudolopo lipati lya Monrovia upandulula kuti: “Mu March, baange botatwe bakeelela kuba basikumwaya batabbapatizyidwe. Eeci capa kuti mweelwe wabasikumwaya muntolongo mpati yamu Monrovia usike kucisambomwe.” Ino baange aaba bakambauka buti? Yves upandulula kuti, “Balaswaangana muli Bwatatu amu Mujibelo kulibambila mulimo wakukambauka. Mpoonya balazumizyigwa kuunka kucitolokesi cimwi acimwi kabakambaukila basintolongonyina mulumbe wamu Bbaibbele uupa bulangizi.” Lino baange banji bajisi ciiyo cibageme ca Bbaibbele alimwi balajanika kumiswaangano iicitilwa muntolongo mweenya. Mwiiminizi waofesi yamutabi wakapa makani aabuleya kubaange bali 79 aantolongo eeyi. Muntolongo azimbi zili cisambomwe kuli tukamu itwiiya Bbaibbele lyoonse alimwi baange banji bacinca maumi aabo.

Bakwesu bakasoleka canguzu kugwasya bantu bajisi luyandisisyo ibakkala mumasena aakulamfwu kuti bajanike ku Ciibalusyo. Mucikozyanyo,  ba San naa ba Bushmen, mbabantu bakusaanguna kukkala mu Africa nkoili kumusanza. Musyule oomu bakali kupona buumi buuba-uba, bakali kulonga-longa kabali bavwimi alimwi abasikucela micelo yamusyokwe. Lya Ciibalusyo camu 2015, ba Glenn, imupainiya waalubazu uubelekela mucisi ca Namibia nkocili kunyika, bakabikka bubambe bwakucita Ciibalusyo mumunzi wakulamfwu waba San ikulampa makkilomita aali 270 kujwe lyadolopo lya Rundu. Eeci cakali ciindi cabili kucita Ciibalusyo mumunzi ooyu. Ziindi zyoonse eezyi zyobilo, balupati-pati bamumunzi bakazumizya Bakamboni ba Jehova kuswaanganina munkuta ya magistrate kakunyina kubbadela. Bantu bali  232 bakajanika ku Ciibalusyo nokuba kuti kwakali kuwa mvwula mpati kacitanatalika Ciibalusyo alimwi anocakali kucitwa. Ba Bushmen ibakkala mucilawo eeci baambaula mwaambo uutegwa Khwe, walo waambaulwa kwiinda mukulizya mulaka. Makani akasandululwa kuzwa mu Chingisi kutola muci Khwe. Akaambo kakuti kunyina Bbaibbele muci Khwe, kwakabelesyegwa projekita kutondezya zifwanikiso abwaanda izipandulula makani aamu Bbaibbele mbuli aali kubbuku lya Isaya 35:5, 6. Ba Glenn, balo ibasololela ziiyo zya Bbaibbele izili mbozibede iziyaambele mubusena oobu, baamba kuti: “Lino yakkwana myaka yobilo kandiboola kuno ciindi comwe amwezi. Ndilakkala mubusena oobu kwamazuba aali mbwaabede. Bantu tabafwambaani kuyaambele akaambo kakuti tanduuzyi kabotu mwaambo alimwi nkulamfwu kapati. Twakomba kaka amutugwasye. Nindakaunka kubalupati-pati bamumunzi kuyoolibambila Ciibalusyo camwaka uuno, umwi wamukkomiti yacilawo eeci wakandilomba kuti tuyake busena bwakukombela mucilawo eeci. Wakaamba kuti kkomiti yakalilibambilide kutupa nyika alimwi akuyaka ŋanda yakukombela kwiinda mukubelesya mali aabo beni! Cilikke ncotwakeelede kucita swebo nkujana pasita naa kuyiisya umwi wabo kuba pasita!”