1. Nzintu nzi zimwi zikonzya kwaandaanya mumukwasyi?

BALAA coolwe abo bakkala mumaanda muli luyando, kumvwana, alimwi aluumuno. Tusyoma kuti mukwasyi wanu uliboobo. Mukubula coolwe mumikwasyi iitabaliki takuli boobo pe, pele kuli kuteendelana akaambo katwaambo twiindene-indene. Ino ncinzi cileta kuteendelana mumikwasyi? Mucibalo eci tulabandika zintu zyotatwe. Mumikwasyi imwi banamukwasyi tabakombi cikombelo comwe. Mumwi bana tabazyalwi da lyomwe, naa kuli wisi omwe. Acimbi cibaanga cileta kwaandaana mumaanda amwi mmilimo yakusola kujana cakulya, naa kuyandisya buvwubi. Nokuba boobo zintu zileta kwaandaana muŋanda imwi ambweni tazikonzyi kuleta penzi muŋanda imbi. Ino nkaambo nzi?

2. Nkuukuli bamwi nkobayandaula malailile aabukkale bwamukwasyi, pele ino nkuukuli kujanwa malailile aagwasya kwiinda?

² Kamwi kaambo nkwiindana kwamizeezo. Kuti naa mwasola amoyo omwe kuteelela mbwazilanga zintu mweenzinyoko, mulalangilwa kapati kubona nzila yakugwasya kuleta lukamantano muŋanda. Kaambo kabili kajatikizya nkomujana lulayo. Bantu banji batobela lulayo lwababelesinyina, basimukobonyina, basilulayo lwamumapepa aamakani, naa malailile aambi aabantu. Nokuba boobo bamwi baiya ncolyaamba Jwi lya Leza kumapenzi aabo akutobela nzila eyi. Ino kucita boobo inga kwagwasya buti mukwasyi kuleta luumuno muŋanda?—2 Timoteo 3:16, 17.

3. (a) Ino mmalailile nzi Bbaibbele ngolipa kujatikizya kukwatana amuntu ngomwiindene limwi lusyomo? (b) Ino ninjiisyo nzi zikonzya kugwasya umwi mulukwatano uusyoma kuti naa kakwetene amuntu utasyomi?

³ Ibbaibbele lilasinizya kutulaya kutakwatanaa muntu uukomba cikombelo calusyomo lwiindene. (Deuteronomo 7:3, 4; 1 Ba-Korinto 7:39) Nokuba boobo mulakonzya mwakaiya kasimpe kamu Bbaibbele kamuli mwakwatwa kale, kakuli walo mulumaanu taakaiya pe. Ino mulacita buti? Nokuba boobo zikonkezyo zyalukwatano zyeelede kuzuzikizya. (1 Ba-Korinto 7:10) Ibbaibbele lilasinizya kwaamba kuti lukwatano talweelede kumana, alimwi likulwaizya bantu bakwetene kujana nzila yakumana mazwanga aabo muciindi cakwaatija. (Ba-Efeso 5:28-31; Tito 2:4, 5) Ino kuti mulumaanu tasoleli limwi kumuzumizya kutobela bukombi bwamu Bbaibbele? Ulakonzya wasola kumukasya kuunka kumiswaangano yambungano, ambweni akwaamba kuti tamuyanzyi mukaintu wakwe kuunka mumulimo waŋanda aŋanda, kukambaukila bantu makani aabukombi. Inga mulatyani?

4. Ino mukaintu inga watondezya buti lweetelelo kuti mulumaakwe katatoli lubazu mulusyomo lwakwe?

⁴ Amulibuzye kuti, ‘Ino nkaambo nzi mulumaangu ncalimvwa boobu? (Tusimpi 16:20, 23) Kuti naa katateeleli bwini-bwini ncomucita ulakonzya walibilika. Ambweni basazinyina balatongooka akaambo kakuti tamucitoli lubazu muzilengwa zimwi nzyobasyoma. “Ndalikulendelelwa akaambo kakucaala endikke muŋanda,” mbwaakaamba mulumi wamukaintu umwi. Oyu mwaalumi wakayeeya kuti cikombelo camunyanzya mukaintu. Pele wakaalilwa kupozya kuti ulalendelelwa nkaambo kakulisumpula. Ambweni mulumaanu inga wayandika kusyomezya kuti mucimuyanda mbuli lyoonse nokuba kuti mwatalika kuyanda Jehova. Amubone kuti mulajana ciindi cakukkala anguwe.

5. Ino nciimo nzi ceelede mukaintu ncayelede kubaaco kuti mulumaakwe kajisi lusyomo lwaandeene?

 ⁵ Nokuba boobo kuli cintu cipati ncomweelede kuyeeya kuti mukonzye kweendelezya zintu mubusongo. Ijwi lya Leza lilailila bamakaintu kuti: “Amulibombye kubalumi banu, mbubonya mbukweelede mu-Mwami.” (Ba-Kolose 3:18) Munzila eyi licenjezya bamakaintu kutabaa muuya walwaanguluko. Kunze lyaboobo ilugwalo olu nolwaamba kuti “mbukweelede mu-Mwami,” lutondezya kuti kulibombya kumwaalumi takweelede kumupa kuti mulube kulibombya ku Mwami. Takweelede kwiindizya pe.

6. Ninjiisyo nzi zyeelede kuyeeyegwa amukaintu Munakristo uukwetwe?

 ⁶ Izintu zipati mubukombi bwakasimpe izitayelede kulubwa a Munakristo, mmiswaangano yambungano alimwi akukambaukila bantu zyalusyomo lwakwe lwamu Bbaibbele. (Ba-Roma 10:9, 10, 14; Ba-Hebrayo 10:24, 25) Aboobo ino inga mwacita nzi kuti muntu umwi wamwaambila kutatobela mulawo umwi wa Leza? Bamaapostolo ba Jesu Kristo bakati: “Tuleelede kumvwa Leza kwiinda bantu.” (Incito 5:29) Cikozyanyo cabo citondezya nzila yeelede kutobelwa ziindi zinji mubukkale. Sena luyando lwa Jehova luyoopa kuti mumukombe alikke munzila yakwe? Alimwi sena luyando lwamulumi luyoomupa kuti mucite boobo munzila njazumizya walo?—Matayo 4:10; 1 Johane 5:3.

7. Mukaintu Munakristo weelede kubaa makanze nzi?

⁷ Jesu wakatondezya kuti talili lyoonse nocinookonzeka. Wakacenjezya kuti bamwi banamukwasyi basyoma bayakulimvwa kuti baandaanizigwa mbuli kuti kwainda panga akati kabo abanamukwasyi bamwi akaambo kakukazya bukombi bwakasimpe. (Matayo 10:34-36) Umwi mukaintu ku Japan wakajisi penzi eli. Wakali kukasigwa amulumaakwe kwamyaka iili 11. Wakali kumupenzya kapati alimwi kanjikanji wakali kumukkiila aanze. Pele walo wakazumanana. Beenzinyina bamumbungano ya Bunakristo bakamugwasya. Wakayuma kupaila alimwi wakakulwaizigwa kapati a 1 Petro 2:20. Oyu Munakristo mukaintu wakalijisi lusyomo lwakuti bumwi buzuba mulumaakwe uyakutalika awalo kubelekela Jehova kuti naa wazumanana walo. Ncobeni cakacitika.

8, 9. Ino mukaintu inga walilemeka buti kutegwa atasinkilili mulumaakwe munzila iziteelede?

⁸ Nzinji zintu zigwasya nzyomunga mwacita izinga zyacinca moyo wamuntu ngomukwetene limwi. Mucikozyanyo kuti naa mulumaanu taciyandi cikombelo canu, mutamupi kaambo keni-keni kakumutongooka muzintu zimwi. Kamubamba ŋanda yanu kabotu. Kamulibamba kabotu. Kamumutondezya lyoonse kuti mulamuyanda alimwi mulamulumba. Muciindi cakumutongooka, amumugwasye. Amutondezye kuti musyoma mulinguwe kuti ngomutwe wanu. Mutamujosezyi cibi kuti naa muyeeya kuti wamubisizya. (1 Petro 2:21, 23) Kamuyeeya kuti talondokede pe, elyo kuti  kwabuka mazwanga, amulibombye, musaangune ndinywe kulilekelela.—Ba-Efeso 4:26.

⁹ Mutalekeli miswaangano yanu kuti imusye cakulya cakwe. Alimwi mulakonzya mwasala kuunka mumulimo wa Bunakristo ciindi mulumaanu natawo aŋanda. Cilagwasya kuti Munakristo mukaintu katamukambaukili mulumaakwe ciindi ncatayandide kuteelela. Pele ulatobela lulayo lwamwaapostolo Petro lwakuti: “Anywebo nobakaintu, amulibombye kubalumi banu, kuti naa kakuli bamwi babo bataswiilili Majwi aa Leza inga balakwelelezegwa abukkale bwanu kakunyina akubelesya majwi ciindi babona bweende bwanu bweelede bwakulilemeka.” (1 Pita 3:1, 2, Ci.) Bamakaintu Banakristo balasola canguzu kuya ambele mukutondezya micelo yamuuya wa Leza.—Ba-Galatiya 5:22, 23.

10. Ino mwaalumi weelede kulilemeka buti kumukaintu wakwe uujisi lusyomo lwandeene?

¹⁰ Ino kuti mulumi kali Munakristo uutola lubazu, mukaintu walo pe? Ibbaibbele lilapa malailile mumakani aaya. Lyaamba kuti: “Akuli umwi sibunyina uujisi mukaakwe uutali muzumini, lino moyo wakwe wanooyanda kukala kulinguwe, atamuleki.” (1 Ba-Korinto 7:12) Alimwi lilailila baalumi kuti: “Anywebo nubalumi, amuyandisye banakazi banu.”—Ba-Kolose 3:19.

11. Ino mulumi inga watondezya buti bupampu alimwi akweendelezya busilutwe bwakwe munzila yakucenjela kuti mukaintu katatoli lubazu mulusyomo lwa Bunakristo?

¹¹ Kuti naa kamukwete mukaintu uujisi lusyomo lwaandeene alwanu, amusole kumupa bulemu alimwi akulemeka mizeezo yakwe. Mbwali mupati, weelede kupegwa lwaanguluko lwakutola lubazu mulusyomo lwabukombi bwakwe, nokuba kuti nywebo tamujisi lubazu andulo. Ciindi cakusaanguna nomwakanana anguwe makani aajatikizya lusyomo lwanu, mutalangili  kuti ulasiya lusyomo lwakwe ndwaajisi kwaciindi cilamfwu akumutobela ndyoonya elyo pe. Muciindi cakumwaambila mpoona-mpoona kuti zilengwa zyabukombi nzyobalikutobela amukwasyi wakwe kwaciindi cilamfwu nzyakubeja, amusole kubelesya Magwalo kumupandulwida kabotu-kabotu. Ulakonzya ambweni ulalendelelwa kuti naa bunji bwaziindi mucita milimo ya mbungano. Ulakonzya katamuyanzyi kubelekela Jehova kakuli mukucita boobo usola kumwaambila kuti: “Kamunga kamujana ciindi cakukkala andime!” Amukkazike moyo. Kwiinda mukumuteelela akumutondezya luyando, ulakonzya wasanduka kumbele aamazuba, watalika awalo kutobela bukombi bwakasimpe.—Ba-Kolose 3:12-14; 1 Petro 3:8, 9.

12. Nokuba kuti mulumi amukaintu wakwe balaandeene lusyomo, ino inga njiisyo zya Magwalo zyatobelwa buti mukuyiisya bana babo?

¹² Ikuyiisya bana makani aabukombi inga lyaba penzi muŋanda mobatakombi cikombelo comwe cakasimpe. Ino njiisyo zya Magwalo inga zyatobelwa buti? Ibbaibbele lipa mukuli mupati wakuyiisya bana kuli wisi nokuba kuti banyina abalo balijisi lubazu lupati. (Tusimpi 1:8; amukozyanisye a Matalikilo 18:19; Deuteronomo 11:18, 19.) Mwaalumi ucili mutwe wamukwasyi natasyomi mubusilutwe bwa Kristo.

13, 14. Kuti naa mulumi ulamukasya mukaintu kuunka abana kumiswaangano ya Bunakristo naa kubayiisya, ino mukaintu weelede kucita nzi?

¹³ Bamwi bamawisi batasyomi tabakwe makani kuti naa banyina babayiisya bana babo makani aabukombi. Bamwi balakasya. Ino kuti mulumaanu tazumizyi kutola bana kumiswaangano yambungano nokuba kubayiisya Bbaibbele aŋanda? Lino mweelede kuzuzikizya zintu zinji—kuzuzikizya zintu nzyayanda Jehova Leza, zintu nzyayanda mulumaanu silutwe alimwi  azintu nzyobayanda bana. Ino inga mwakonzya buti kucita zyoonse ezi?

¹⁴ Cakutadooneka, mulacibikka mumupailo. (Ba-Filipi 4:6, 7; 1 Johane 5:14) Kumamanino ndinywe mweelede kusala nzila njomweelede kutola. Kuti naa mwamupandulwida kabotu-kabotu mulumaanu kuti tamulimukukazya busilutwe bwakwe, ambweni ulatalika kumwaangulula. Nokuba kuti mulumaanu tazumizyi kutola bana kumiswaangano nokuba kubaa ciiyo cini-cini ca Bbaibbele ambabo, mulakonzya mwabayiisya. Kwiinda mumisalo yanu yabuzuba abuzuba alimwi acitondezyo canu cibotu, amusole kubayiisya kuyanda Jehova, kusyoma mu Jwi lyakwe, kulemeka bazyali—kubikkilizya abawisi—kutondezya luse kubantu alimwi akuba bantu basimilimo. Kumbele aamazuba bawisi balakonzya babona bubotu bwamilimo yanu.—Tusimpi 23:24.

15. Ino wisi bana Munakristo ujisi mukuli nzi kumakani aakuyiisya bana?

¹⁵ Kuti naa nobalumi ndinywe musyoma, walo mukaintu wanu pe, ndinywe mweelede kubweza mukuli wakukomezya bana banu “mulwiiyo lwa-Mwami amumilazyo yakwe.” (Ba-Efeso 6:4) Nomucita boobo, mutalubi kutondezya luse, luyando alimwi akuba muntu mubombe moyo kumukaintu wanu.

16, 17. Ino ninjiisyo nzi zya Bbaibbele bana nzyobeelede kuyeeya kuti naa babaa lusyomo lwaandeene alwabazyali babo?

¹⁶ Tacicili cintu ceenzu kubana bacili baniini kutobela mizeezo yabukombi iisiyene ayabazyali babo. Sena obo mbomwacita? Kuti naa mbombubo Ibbaibbele lilijisi lulayo ilwanu.

¹⁷ Ijwi lya Leza lyaamba kuti: “Amulemeke bazyali banu mu-Mwami, nkaambo cililuleme kucita obo. . . .  Lemya uso abanyoko.” (Ba-Efeso 6:1, 2) Eci cijatikizya kupa bulemu bweelede kubazyali. Pele nokuba kuti kumvwida bazyali ncintu cipati, takweelede kuzuzikizigwa kakunyina akuyeeya Leza mwini-mwini. Kuti naa mwana wakomena cakuti ulakonzya kusala, amikuli ilavwula njayelede kuliyumwida. Eci tacicitiki buyo mumulawo wanyika pe, cilacitika ikapati amumulawo wa Leza. “Toonse buyo tuleelede kulyaambilila makani esu kubusyu bwa-Leza,” mbolyaamba Bbaibbele.—Ba-Roma 14:12.

18, 19. Kuti naa bana bakomba cikombelo caandeene acabazyali babo, muunzila nzi njobanga babagwasya bazyali kuteelela lusyomo lwabo kabotu?

¹⁸ Kuti naa lusyomo lwanu lwamusandula, amusole kuteelela mbobazilanga zintu bazyali banu. Balalangilwa kukkomana kuti naa babona kuti akaambo kakwiiya Bbaibbele akutobela njiisyo zyalyo, mwaba bantu basibulemu kapati, bateelela, alimwi ibatumika. Nokuba boobo kuti naa lusyomo lwanu lupya alimwi lwamupa kuti mukake tumpiyompiyo alimwi azilengwa zyobayanda kapati, balakonzya bayeeya kuti munyansya lukono ndobali kuyanda kumusiila. Alimwi balakonzya balibilika kuti naa ncomucita taceendelani abukkale bwamumunzi naa ambweni cimupa kuti mutabikkili maanu kuzintu nzyobayeeya kuti zilakonzya kumugwasya kukkala kabotu munzila yakumubili. Acimbi cinga cabatola ansi nkulisumpula. Balakonzya bayeeya kuti musola kutondezya kuti balilubide, nywebo muliluzi.

 ¹⁹ Aboobo amusole cakufwambaana kujana nzila yakuti bazyali banu baswaangane abaalu bamwi naa Bakamboni basimide bamumbungano yanu. Amukulwaizye bazyali banu kusika ku Ŋanda ya Bwami kutegwa balimvwide beni makani aabandikwa alimwi akulibonena beni Bakamboni ba Jehova mbobabede. Muciindi bazyali banu balakonzya babomba moyo. Nociba ciindi bazyali nobazumanana kukaka, mane akusika nkobanyonyoona mabbuku aajatikizya Bbaibbele, alimwi akukasya bana kusika kumiswaangano ya Bunakristo, cilakonzya kujanika ciindi cakubalila kumbi, kubandika a Banakristonyoko alimwi akupa bukamboni kubantu akubagwasya munzila iiliyoonse. Mulakonzya alimwi kupaila kuli Jehova. Bamwi bana balayandika kulindila kusikila bakomena, alimwi batalika kulikkalila nobanga bayungizya azimbi zintu zyakucita. Noziba buti zintu kuŋanda nkomukkala, mutalubi ‘kulemeka bazyali banu.’ Nywebo amugwasye kuleta luumuno muŋanda. (Ba-Roma 12:17, 18) Cintu cipati ncakuti muyandaule luumuno a Leza.

20. Ino bana inga balimvwa buti kuti bawisi naa banyina mbakujana?

²⁰ Mumaanda manji, cintu cikatazya kapati tabuli bukombi pe, mmapenzi aamuzyali wakujana. Maanda manji sunu alabikkilizya abana bakujana kumuzyali omwe naa boonse bobile. Mumukwasyi wamusyobo oyu, bana balakonzya kubaa bbivwe, alusulano, alimwi kulakonzya ambweni baciyeeya muzyali wabo wini-wini. Aboobo balakonzya kutyompya muzyali wakujana uusoleka amoyo omwe kuti abe wisi naa banyina mubotu. Ino ncinzi cinga cagwasya mukwasyi wabazyali bakujana kuti uzwidilile?

21. Nokuba kuti bali muciimo caandeene, nkaambo nzi bazyali bakujana ncobeelede kujana lugwasyo munjiisyo zya Bbaibbele?

²¹ Nokuba kuti ciimo eci ciliindene, ncomweelede kuziba ncakuti njiisyo zya Bbaibbele izipa kuti maanda amwi azwidilile zilakonzya kubeleka awaawa. Ikutatobela njiisyo ezyo inga kwabaanga kwamugwasya caino, pele kumbele aamazuba kulalangilwa kumuletela mapenzi. (Intembauzyo 127:1; Tusimpi 29:15) Amuyandaule busongo abupampu—ibusongo bwakutobela  njiisyo zya Leza bunga bwamugwasya kumbele aamazuba alimwi abupampu bwakuziba kaambo banamukwasyi ncobaamba alimwi akucita zintu zimwi. Alimwi kulayandika lweetelelo.—Tusimpi 16:21; 24:3; 1 Petro 3:8.

22. Nkaambo nzi ncocinga cabayumina bana kuzumina muzyali wakujana?

²² Kuti kamuli bazyali bakujana, mulakonzya kwiibaluka kuti ciindi nomwakali buyo beenzinyina bamukwasyi, mwakali kutambulwa kabotu abana. Pele kuzwa ciindi nomwakaba bazyali babo, tabacimulangi mbuli mbobali kumulanga pe. Akaambo kakuyeeya muzyali wabo wini-wini uutako, moyo wabana ulakonzya kuuli kumuzyali oyo, ambweni kabayeeya kuti muyanda kubanyengelela kutegwa bayande ndinywe kwiinda muzyali wabo uutako. Zimwi ziindi balakonzya bamuyeezya cakutainda ambali kuti tamuli bawisi naa banyina. Majwi ali boobu alacisa. Nokuba boobo “utafwambi kukalala ciindi cakubijilwa.” (Mukambausi 7:9) Bupampu alweetelelo zilayandika kuti mukonzye kweendelezya myoyo yabana.

23. Ino lulayo inga lwapegwa buti mumukwasyi wabana bakujana?

²³ Ciimo eci cilayandika kapati ciindi nomupa lulayo. Kuzumanana kupa lulayo ncintu ciyandika kapati. (Tusimpi 6:20; 13:1) Alimwi mbwaanga bana boonse tabakozyenye, lulayo lweelede kwiindana kumwana amwana. Bamwi bazyali bakujana inga bayeeya kuti cilagwasya, ikapati kumatalikilo kuti muzyali wabana wini-wini wabweza nguwe mukuli oyu wabuzyali. Pele kuyandika kuti boonse bazyali bobile bazuminana kumakani aalulayo lweelede alimwi akucita mbweena obo, takweelede kutondezya muuya wakusala nomulaya mwana wanu amwana wakujana. (Tusimpi 24:23) Nokuba kuti kuteelela kulayandika kapati, tamweelede kuluba kuti kuli kutalondoka. Mutaindilizyi kunyema. Amulaye muluyando.—Ba-Kolose 3:21.

24. Ino ncinzi cinga caleta lukwabililo kumapenzi aakutalilemeka akati kabanamukwasi basimbi abasankwa mumukwasyi wakujana?

 ²⁴ Kubandika mumukwasyi kulakonzya kwagwasya kapati kulesya mapenzi. Kubandika inga kwagwasya mukwasyi kubikkila maanu kuzintu buyo zipati mubuumi. (Amukozyanisye a Ba-Filipi 1:9-11.) Alimwi kulakonzya kugwasya muntu umwi aumwi kubona mbwanga wagwasya mumakanze aamukwasyi. Kunze lyaboobo kubandika amoyo woonse mumukwasyi kulakonzya kucesya mapenzi aakutalilemeka. Ibasimbi beelede kuziba mbokusamwa ambokulilemekwa nobali munsi aabawisi bakujana alimwi ababunyina bakujana, abalo basankwa beelede kulayigwa kumakani aambobeelede kulilemeka kuli banyina bakujana alimwi abacizi babo bakujana.—1 Ba-Tesalonika 4:3-8.

25. Nciimo nzi cinga caleta luumuno mumukwasyi wakujana?

 ²⁵ Nomulwana mapenzi aakuba muzyali wakujana, amukkazike moyo. Citola ciindi kubamba cilongwe cipya. Kucita kuti bana mbootakazyala bakuyande akukulemeka mmulimo mupati kapati. Pele cilakonzeka. Icintu ciyandika kapati kutegwa mube aluumuno mumukwasyi wakujana mmoyo wabusongo abupampu, uuyandisya kapati kukkomanisya Jehova. (Tusimpi 16:20) Ciimo cili boobo inga camugwasya alimwi kulwana mapenzi aambi.

26. Ino mapenzi aajatikizya lubono alimwi aciimo banamukwasyi ncobalaaco kulubono inga zyaleta buti kwaandaana?

²⁶ Mukwasyi ulakonzya kwaandaanizigwa munzila  ziindene-indene amapenzi aajatikizya lubono alimwi aciimo banamukwasyi ncobajisi kulubono. Mukubula coolwe mikwasyi imwi ilanyonganizigwa amazwanga aajatikizya mali alimwi aluyando lwakuvwuba—naa kuvwuba buyo aasyoonto. Kuti naa banabukwetene boonse balabeleka alimwi babaa muuya wakulipambula, iwakuti “aaya mali ngevwola ngaangu, aayo ngovwola ngaako,” inga caleta kwaandaana. Nokuba kuti mazwanga atantamukwa, ibanabukwetene ibabeleka boonse balakonzya bajata bubi cakuti tabacijisi aciindi cakukkala antoomwe. Bunji bwamawisi mazubaano balasiya mikwasyi yabo akuya kubelekela kumbi kwaciindi cilamfwu—kwamyezi minji naa myaka—kutegwa bajane mali manji kwiinda ngobakonzya kujana kumunzi. Eci inga caleta mapenzi mapati.

27. Ninjiisyo nzi zinga zyagwasya mukwasyi uujisi mapenzi aajatikizya mali?

²⁷ Taakwe nokunga kwabikkwa milawo muzintu ezi pe nkaambo aumwi mukwasyi ujisi mapenzi aawo alimwi azintu ziyandika ziindene. Nokuba boobo lulayo lwa Bbaibbele lulakonzya kugwasya. Mucikozyanyo, bbuku lya Tusimpi 13:10 litondezya kuti mapenzi manji cimwi ciindi alakonzya kutantamukwa kwiinda ‘mukuswiilila kulaigwa.’ Eci caamba kuti mweelede kuyanda kulaigwa akuteelela muzeezo wamweenzinyoko, mubone mbwakalanga kaambo muciindi cakumwaambila buyo muzeezo wanu. Kunze lyaboobo kubaa mbaakani yamukwasyi yakubelesya mali kulakonzya kugwasya mukwasyi kubelekela antoomwe. Cimwi ciindi banabukwetene boonse bobile inga bayandika kubeleka ndiza kwaciindi cilimbocibede kutegwa bakonzye kuula akubbadelela zintu zimbi, ikapati kuti naa bajisi bana naa bantu bambi bayanda lugwasyo. Kuti naa zintu zili boobo, mulumi ulakonzya kusyomezya mukaintu wakwe kuti ucimubikkila maanu. Mulumi antoomwe abana kwiinda muluyando balakonzya  kugwasya mumilimo imwi njacita alikke mukaintu.—Ba-Filipi 2:1-4.

28. Malailile nzi aanga kuti naa atobelwa alagwasya mukwasyi kubaa lukamantano mumukwasyi?

²⁸ Pele mweelede kuziba kuti nokuba kuti mali alayandika mubweende obu bwazintu, taapi lukkomano pe. Taapi buumi pe. (Mukambausi 7:12) Kwiindilizya kubikkila maanu kuzintu zyakumubili kulakonzya kunyonyoona bukkale bwanu alimwi akumunyonyoona munzila yakumuuya. (1 Timoteo 6:9-12) Ma! aino cilagwasya kuyandaula Bwami bwa Leza abululami bwakwe kusaanguna, akusyoma kuti ulaileleka milimo yesu yakusola kujana zintu ziyandika mubuumi! (Matayo 6:25-33; Ba-Hebrayo 13:5) Kuti naa mwasaanguna kubikkila maanu kuzintu zyakumuuya alimwi akuyandaula luumuno a Leza, mulajana kuti ŋanda yanu ulaba munzi uukamantene munzila zipati nokuba kuti taakwe nowajisini akaambo kazintu zimwi.