Sena kuli wakakwaambila kale maseseke?— * Ibbaibbele lilaamba kujatikizya maseseke aalibedelede aaitwa kuti maseseke aa Leza. Aambwa kuti maseseke akaambo kakuti bantu tiibakaazyi. Nobaba bangelo bakali kuyanda kuzyiba zinji kujatikizya maseseke aayo. Sena inga wayanda kwaazyiba maseseke aayo?—

Kaindi loko, Leza wakalenga bantu bakusaanguna, mwaalumi amukaintu. Mazina aabo bakali ba Adamu a Eva. Leza wakabapa munzi mubotu iwakali kwiitwa kuti muunda wa Edeni. Ikuti ba Adamu a Eva nobakamumvwida Leza, balo abana babo nobakapanga nyika yoonse kuba paradaiso mbuli muunda uulya. Alimwi nobakapona mu Paradaiso kukabe kutamani. Pele sena ulizyi ncobakacita ba Adamu a Eva?—

Ba Adamu a Eva tiibakamumvwida Leza, nkakaambo kaako ncotutali muparadaiso lino. Pele Leza wakaamba kuti uyooibotya nyika yoonse, alimwi bantu boonse bayoopona kukabe kutamani alimwi akukkomana. Ino uyoocita buti oobo? Kwaciindi cilamfwu, bantu tiibakazyi mbwayoocita oobo. Akali maseseke.

Ciindi Jesu naakaboola anyika, wakayiisya bantu zintu zinji kujatikizya maseseke aaya. Wakaamba kuti akali kujatikizya Bwami bwa Leza. Jesu wakaambila bantu kuti kabapaila kuti Bwami oobu buboole. Buyoopa kuti nyika eeyi ibe paradaiso, busena bubotu kapati.

Sena wakkomana kuzyiba maseseke aaya?— Kozyiba kuti balikke aabo bamumvwida Jehova mbabayookkala mu Paradaiso. Bbaibbele lilatwaambila makani manji aajatikizya bamaalumi abamakaintu ibakamumvwida Jehova. Sena inga wayanda kwiiya kujatikizya mbabo?— Atubone bamwi akati kabo alimwi akuzyiba mbotukonzya kubaiya.