Kuzwa ciindi Samuele naakacili mwana, wakali kukkala akubelekela kutente lyakubunganina, busena bantu nkobakali kukombela Jehova. Sena ulizyi Samuele mbwaakaunka kutente lyakubunganina? Atusaangune kwiiya kujatikizya Hana, banyina Samuele.

Kwaciindi cilamfwu, Hana wakali kuyanda kuba amwana, pele tanaakali kuzyala. Aboobo wakapaila kuli Jehova akumukombelezya kuti amugwasye. Wakasyomezya kuti naa wazyala mwana, uyoomutuma kuyookkala akubelekela kutente lyakubunganina. Jehova wakawiingula mupailo wakwe, aboobo wakazyala mwana musankwa. Wakamuulika zina lyakuti Samuele. Alimwi kweelana ambwaakasyomezya Hana, Samuele naakakkwanya myaka yotatwe naa yone yakuzyalwa, wakamutola kutente lyakubunganina kuti akabelekele Leza.

Eli nguwakali mupaizi mupati kutente lyakubunganina. Bana bakwe basankwa bobilo abalo bakali kubeleka nkukonya kutente lyakubunganina. Koyeeya kuti tente lyakubunganina bwakali busena bwakukombela Leza, aboobo bantu bakeelede kucita zintu zili kabotu okuya. Pele bana ba Eli bakali kucita zintu zibi kapati. Samuele wakali kubona nzyobakali kucita. Sena awalo Samuele wakali kucita zintu zibi mbuli bana ba Eli?— Peepe, wakazumanana kucita zintu zili kabotu, mbubwenya mbobakamuyiisya bazyali bakwe.

Ino uyeeya kuti Eli wakeelede kubacita buti bana bakwe?— Wakeelede kubasubula akubakasya kubelekela aŋanda ya Leza. Pele Eli tanaakacita oobo, aboobo Jehova wakamunyemena Eli abana bakwe. Jehova wakayanda kubasubula.

Bumwi buzuba masiku Samuele kalede, wakamvwa jwi lyakali kwiita kuti: ‘Samuele!’ Mpoonya wakazuzila kuli Eli, pele Eli wakamwaambila kuti: ‘Tandili ndime ndakwiita.’ Eeci cakacitika ziindi azimwi zyobilo. Nocakacitika ciindi catatu,  Eli wakaambila Samuele kuti, amvwa jwi limwiita alimwi, weelede kwaamba kuti: ‘Akaka Jehova, kondaambila ndiliswiilide.’ Aboobo mbwaakacita oobo Samuele. Mpoonya Jehova wakati kuli Samuele: ‘Umwaambile Eli kuti ndilausubula mukwasyi wakwe akaambo kazintu zibi nzyobacita.’ Sena uyeeya kuti cakali cuuba-uba kuli Samuele kutola mulumbe ooyu kuli Eli?— Peepe, tiicakali cuuba-uba. Pele nokuba kuti Samuele wakaliyoowede, wakacita Jehova ncaakamwaambila. Aboobo ncaakaamba Jehova cakacitika. Bana ba Eli bobilo bakajaigwa, awalo Eli wakafwa.

Samuele ncikozyanyo cibotu kulindiswe. Wakacita zintu zili kabotu nokuba kuti wakalibwene bantu bamwi kabacita zintu zibi. Ino mbuti kujatikizya nduwe? Sena uyooba mbuli Samuele akuzumanana kucita zintu zili kabotu? Ikuti wacita oobo, uyoomukkomanisya Jehova alimwi abazyali bako.