Amweezyeezye kuti mutumbu siluyando ubamba-bamba mwanaakwe musankwa kutegwa aunke kucikolo. Wasinizya kuti wasamba akuti zisani zyakwe zili kabotu alimwi zinyina tombe. Eeci cipa kuti mwana kapona kabotu alimwi citondezya kuti bazyali bakwe balamulanganya kabotu. Mbubwenya buyo, awalo Taateesu siluyando, Jehova, uyanda kuti katusalala kumubili alimwi amumizeezo. Ciindi notusalala, tulagwasyigwa lwesu kutugama alimwi akupa kuti Leza alemekwe.

1. Mbuti mbotukonzya kusalala kumubili?

Jehova utwaambila kuti: “Mweelede kusalala.” (1 Petro 1:16) Kusalala caamba kusalala kumubili alimwi amukulilemeka. Tulakonzya kusalala kumubili kwiinda mukusamba abuzuba alimwi akubona kuti zisani zyesu, maanda eesu amyootokala zilasalala. Kuyungizya waawo, tulakonzya kugwasyilizya mukusalazya Ŋanda ya Bwami. Kwiinda mukuzumanana kusalala kumubili, tulemeka Jehova.—2 Bakorinto 6:3, 4.

2. Kutegwa katusalala, nzilengwa nzi nzyotweelede kutantamuka?

Bbaibbele litukulwaizya ‘kulisalazya kuzintu zyoonse zisofwaazya mubili amuuya.’ (2 Bakorinto 7:1) Aboobo, tulasolekesya kutantamuka zintu zili zyoonse zikonzya kunyonganya mubili alimwi amizeezo yesu. Mizeezo yesu yeelede kumukkomanisya Jehova, aboobo tweelede kusolekesya kwiilwana mizeezo mibyaabi. (Intembauzyo 104:34) Alimwi tweelede kusolekesya kwaambaula zintu zili kabotu.​—Amubale Bakolose 3:8.

Nzintu nzi zimbi izikonzya kutusofwaazya kumubili alimwi amukulilemeka? Zintu zimwi zilakonzya kusofwaazya mubili wesu. Aboobo tweelede kuzitantamuka zintu mbuli kufweba tombwe, kunyeela nseke zyalubanje naa cocaine alimwi akubelesya misamu iikola munzila yakulikondelezya. Kuti twazitantamuka zintu eezyi, tunoopona buumi buli kabotu alimwi tutondezya kuti tulacilemeka cipego cabuumi. Kunze lyaboobo, tulasolekesya kusalala mukulilemeka kwiinda mukulwana micito iitasalali yakulisobanya kubwaalumi naa kubukaintu alimwi akubala naa kweebelela zintu ziletela muzeezo wakoonana. (Intembauzyo 119:37; Baefeso 5:5) Cilakonzya kukatazya kuzileka zilengwa eezyi, pele Jehova ulakonzya kutugwasya kucita boobo.—Amubale Isaya 41:13.

 AMWIIYE ZINJI

3. Kusalala kumubili kulamulemeka Jehova

Tulakonzya kuzyiba Jehova mbwaabona makani aakusalala kwiinda mukulanga-langa milawo njaakapa bana Israyeli bansiku. Amubale Kulonga 19:10 alimwi a 30:17-19, akubandika mibuzyo eeyi:

• Ino tupango ootu tutondezya nzi kujatikizya Jehova mbwaabona makani aakusalala kumubili?

• Nzilengwa nzi zili kabotu iziyoomugwasya kuzumanana kusalala kumubili?

Kusalala kumubili kuyandika ciindi alimwi akusoleka canguzu. Pele tulakonzya kucita oobu, tacikwe makani akubusena nkotukkala, kufwumbwa naa tulivwubide naa tuli bacete. Atweebelele VIDIYO, akubandika mubuzyo uutobela.

• Nkaambo nzi bantu mbotukambaukila ncobakonzya kumulemeka kapati Jehova ciindi nobabona kuti zintu zyesu zilibonya kabotu alimwi munzila yabulondo?

4. Amuleke zilengwa zibyaabi

Ikuti mulafweba naa kubelesya misamu iikola munzila yakulikondelezya, inga kamuzyi mbocikatazya kuzunda cilengwa eeci. Ino ncinzi cikonzya kugwasya? Amulange-lange cilengwa eeco mbocibujatikizya buumi bwanu. Amubale Matayo 22:37-39, akubandika kutegwa mubone tombwe naa kubelesya misamu iikola . . .

• mbokucijatikizya cilongwe muntu ncajisi a Jehova.

• mbokuujatikizya mukwasyi wamuntu alimwi abaabo mbayanzana limwi.

Amube amakanze aakuzunda cilengwa cimwi cibyaabi. a Atweebelele VIDIYO.

Amubale Bafilipi 4:13, akubandika mubuzyo ooyu:

• Mbuti kuba abubambe bubotu bwakupaila, kwiiya Bbaibbele alimwi akujanika kumiswaangano mbokukonzya kugwasya muntu kuzunda cilengwa eeci cibyaabi?

 5. Amwiilwane mizeezo mibyaabi akuzunda zilengwa zitali kabotu

Amubale Bakolose 3:5, akubandika mibuzyo eeyi:

• Ino tuzyi buti kuti kubala, kweebelela naa kutuminana zintu ziletela muzeezo wakoonana afooni naa atabbuleti, alimwi acilengwa cakulisobanya kubwaalumi naa kubukaintu nzintu zitasalali mumeso aa Jehova?

• Sena muyeeya kuti Jehova uyanda kuti katusalala mukulilemeka? Nkaambo nzi?

Amubone mbomukonzya kulwana mizeezo iitasalali. Atweebelele VIDIYO.

Jesu wakabelesya cikozyanyo kutondezya kuti tweelede kubweza ntaamu cakufwambaana kutegwa tuzumanane kusalala mukulilemeka. Amubale Matayo 5:29, 30, akubandika mubuzyo ooyu:

• Nokuba kuti Jesu tanaakali kwaamba kuti tweelede kuzigusya buya cacigaminina zizo zyesu zyamubili, pele wakatondezya kuti tweelede kubweza ntaamu. Ino nintaamu nzi muntu njayelede kubweza cakufwambaana kutegwa alwane mizeezo mibyaabi? b

Ikuti naa mulasolekesya kulwana mizeezo mibyaabi, Jehova ulalumba kusolekesya nkomucita. Amubale Intembauzyo 103:13, 14, akubandika mubuzyo ooyu:

• Ikuti naa mulwana cilengwa cimwi citali kabotu, mbuti lugwalo oolu mbolumukulwaizya kuzumanana kucita boobo?

 MUBUFWAAFWI

Tulamukkomanisya Jehova kwiinda mukusalala kumubili, mumizeezo alimwi amukulilemeka.

Ncinzi Ncomwaiya?

• Nkaambo nzi kusalala ncokuyandika kapati?

• Mbuti mbomukonzya kusalala kumubili?

• Mbuti mbomukonzya kuzumanana kusalala mumizeezo alimwi amukulilemeka?