1, 2. Ino mibuzyo nzi njobavwula kubuzya bantu banji?

KUPAYA kwameenda kwanyonyoona munzi woonse. Cigwebenga calebula ntobolo mucikombelo, cacisa akujaya bantu banji. Bulwazi bwakkansa bwajaya mukaintu umwi iwasiya bana bosanwe.

² Nokucitika ntenda naa mapenzi aali boobu, bantu banji babuzya kuti, “Ino nyika eeyi iya kuli?” Bantu banji bayanda kuzyiba ikaambo nyika ncoizwide bantu basulaikana alimwi amapenzi. Sena kuli nomwakalibuzyide boobu andinywe?

3, 4. (a) Ino mibuzyo nzi njaakabuzya Habakuku? (b) Ino Jehova wakamwiingula buti?

³ Mu Bbaibbele, tubala kuti bantu ibakajisi lusyomo luyumu muli Leza abalo bakabuzya mibuzyo iili boobu. Mucikozyanyo, musinsimi Habakuku wakabuzya Jehova kuti: “Ino nkaambo nzi ncondipa kubona zintu zibi? Alimwi nkaambo nzi ncolekelela mapenzi kuti kaacitika? Nkaambo nzi ncokuli lunyonyooko abugwebenga kumbele lyangu? Alimwi nkaambo nzi mazwanga akulwana ncozivwulide?”—Habakuku 1:3.

⁴ Kulugwalo lwa Habakuku 2:2, 3 tubala kujatikizya Leza mbwaakayiingula mibuzyo njaakajisi Habakuku alimwi acisyomezyo ncaakamupa cakuti wakali kuyoozibambulula zintu. Jehova ulabayanda kapati bantu. Bbaibbele lyaamba kuti: “Ulamubikkila maano.” (1 Petro 5:7) Mubwini, Leza ulikusulide kapati kupenga kwiinda mbotukusulide swebo. (Isaya 55:8, 9) Aboobo lino atubandike  mubuzyo wakuti, Nkaambo nzi bantu ncobapenga kapati boobu munyika?

5. Ino ncinzi ncobaamba basololi bazikombelo banji kujatikizya kupenga? Ino ncinzi ncoliyiisya Bbaibbele?

⁵ Bamapasita, bamapulisiti alimwi abamafwundisi bazikombelo kanji-kanji baamba kuti bantu balapenga akaambo kakuti nkuyanda kwa Leza. Bamwi inga baamba kuti zintu zyoonse izibacitikila bantu, kubikkilizya amapenzi, Leza wakazisalila limwi alimwi akuti makani aaya tatukonzyi kwaamvwisya, ngamaseseke. Bambi baamba kuti bantu, kubikkilizya abana baniini, balafwa kutegwa bakakkale kujulu a Leza. Pele aaya taali masimpe pe. Jehova kunyina pe napa kuti zintu zibi zicitike. Bbaibbele lyaamba kuti: “Leza mwini-mwini takonzyi kucita bubi nokuceya, alimwi Singuzuzyoonse takonzyi kubisya pe!”—Jobu 34:10.

6. Nkaambo nzi bantu banji ncobatongooka Leza nobalanga mapenzi oonse aacitika munyika?

⁶ Bantu banji batongooka Leza nobalanga mapenzi oonse aacitika munyika nkaambo bayeeya kuti Leza nguweendelezya nyika. Pele mbubonya mbotwakaiya mu Cibalo 3, mweendelezi wini wanyika ngu Saatani Diabolosi.

7, 8. Nkaambo nzi ncokuli kupenga kapati munyika?

⁷ Bbaibbele litwaambila kuti “nyika yoonse ili mumaanza aamubi.” (1 Johane 5:19) Mweendelezi wanyika eeyi, Saatani, mukali alimwi ngusilunya. Ngonguwe “weena nyika yoonse.” (Ciyubunuzyo 12:9) Bantu banji batobela malengwa aakwe. Aaka nkakaambo kamwi nyika ncoizwide bubeji, kusulaikana alimwi alunya.

⁸ Kuli twaambo atumbi ncokuli kupenga kapati munyika. Ba Adamu a Eva nobakazanga, bakatambukizya bana babo cibi. Aboobo akaambo kacibi, bantu bapa kuti  bantunyina kabapenga. Bunji bwaziindi, bantu bali boobo bayanda kuba anguzu kwiinda beenzinyina. Balalwana, balabusya nkondo akupenzya bambi. (Mukambausi 4:1; 8:9) Zimwi ziindi, bantu balapenga akaambo kakusikilwa “ziindi zyamapenzi akucitikilwa zintu zitalangilwi.” (Mukambausi 9:11) Balakonzya kupenga akaambo kakuti bajanika kubusena ikwacitikila ntenda.

9. Nkaambo nzi ncotukonzya kwaamba kuti Jehova ulaakaambo kabotu alimwi kamvwika ncaalekela kuti kupenga kuzumanane?

⁹ Jehova tatalisyi mapenzi pe. Tatukonzyi kumutongooka akaambo kankondo, bubi alimwi alunya nzyotubona. Leza tali nguwe uupa kuti kube ntenda zijatikizya mizuzumo yanyika, maguwo, alimwi akupaya kwameenda. Pele ambweni mulibuzya kuti, ‘Ikuti naa Jehova ngusinguzuzyoonse kujulu aanyika, nkaambo nzi ncatazilesyi kucitika zintu zibi izili boobu?’ Tulizyi kuti Leza ulatubikkila maano kapati, aboobo kweelede kuti kuli kaambo kabotu alimwi kamvwika ikamupa kulekela kupenga kuti kuzumanane.—1 Johane 4:8.

10. Ino mbuti Saatani mbwaakakazya Jehova?

¹⁰ Mumuunda wa Edeni, Diabolosi wakeena ba Adamu a Eva. Saatani wakatamikizya Leza kuti Mweendelezi mubi. Wakaamba kuti Leza wakali kubapa kwiindwa cintu cimwi cibotu ba Adamu a Eva. Saatani wakali kuyanda kuti bamusyome kuti walo ulakonzya kuba mweendelezi mubotu kwiinda Jehova alimwi akuti tiibakali kuyandika kusololelwa a Leza.—Matalikilo 3:2-5; amubone Bupanduluzi Buyungizyidwe 27.

11. Ino mubuzyo nzi ngotweelede kwiingula?

¹¹ Ba Adamu a Eva tiibakamumvwida Jehova alimwi bakamuzangila. Bakayeeya kuti bakalaanguzu zyakulisalila beni cibotu acibi. Ino Jehova wakali kuyootondezya buti  kuti bazangi aaba tiibakaluzi alimwi akuti walo ulizizyi zintu zikonzya kutugwasya ncobeni?

12, 13. (a) Nkaambo nzi Jehova ncaatakabanyonyoona bazangi mpoonya-mpoonya? (b) Nkaambo nzi Jehova ncaalekela Saatani kuba mweendelezi wanyika eeyi alimwi akuti bantu kabalyeendelezya?

¹² Jehova tanaakabanyonyoona ba Adamu a Eva mpoonya-mpoonya. Pele wakabalekela kuti bazyale bana. Mpoonya Jehova wakapa bana ba Adamu a Eva coolwe cakuti basale ngobakali kuyanda kuti abe mweendelezi wabo. Makanze aa Jehova akali aakuti nyika izule bantu balondokede, alimwi eeci cakali kuyoocitika kunyina makani ancaakasola kucita Diabolosi.—Matalikilo 1:28; Isaya 55:10, 11.

¹³ Saatani wakakazya Jehova kumbele lyabangelo banji kapati. (Jobu 38:7; Daniele 7:10) Aboobo Jehova wakamupa ciindi Saatani kutegwa atondezye naa ncaakaamba ncamasimpe. Alimwi Jehova wakabapa ciindi bantu cakulibikkila mfwulumende zyabo izisololelwa aa Saatani kutegwa batondezye naa balakonzya kuzwidilila kakunyina kugwasyigwa a Leza.

14. Ino ncinzi icalibonya muciindi cainda?

¹⁴ Kwazyuulu-zyuulu zyamyaka bantu basola kulyeendelezya beni, pele baalilwa. Calibonya antangalala kuti Saatani mubeji. Bantu bayandika kugwasyigwa a Leza. Musinsimi Jeremiya wakaliluzi naakaamba kuti: “Ndilizyi kabotu, O Jehova, kuti muntu tapedwe nguzu zyakuzyiba nzila yakwe. Muntu weenda tapedwe nguzu zyakusololela noziba ntaamu zyakwe.”—Jeremiya 10:23.

15, 16. (a) Nkaambo nzi Jehova ncaalekela kupenga kuti kuzumanane kwaciindi cilamfwu boobu? (b) Nkaambo nzi Jehova ncaatanjila mulimo wakumana mapenzi ngatalisya Saatani?

¹⁵ Nkaambo nzi Jehova ncaalekela kupenga kuti kuzumanane  kwaciindi cilamfwu boobu? Nkaambo nzi ncatazilesyi kucitika zintu zibi? Kwali kuyandika ciindi kutegwa kulibonye kuti Saatani waalilwa kweendelezya. Bantu basola mfwulumende ziindene-indene, pele tiicagwasya pe. Nokuba kuti bantu basumpuka musayaansi amukupanga zintu, ikutalulama, bucete, bubi alimwi ankondo zyavwula kapati kwiinda mbocakabede kaindi. Tatukonzyi kuzwidilila kulyeendelezya kakunyina kusololelwa a Leza.

¹⁶ Nokuba boobo, Jehova tanaanjila mulimo wakumana mapenzi ngatalisya Saatani. Ikuti naa wacita oobo, inga caamba kuti Leza ugwasyilizya bweendelezi bwa Saatani, pele kunyina nayakucicita eeco naaceya. Kuyungizya waawo, eeco inga capa kuti bantu kabayeeya kuti balakonzya kuzwidilila kulyeendelezya beni. Pele ooko nkubeja, alimwi Jehova kunyina nakonzya kuba alubazu mukusumpula bubeji oobo. Walo tabeji pe.—Bahebrayo 6:18.

17, 18. Ino Jehova uyakuzicita buti zintu zyoonse nzyaanyonyoona Saatani?

¹⁷ Sena Jehova ulakonzya kuzibambulula zintu zyoonse izyanyonyooka akaambo kabuzangi bwa Saatani alimwi abantu? Inzya. Kuli Leza, zintu zyoonse zilakonzyeka. Jehova ulicizyi ciindi cini nocinoosalede cakumaninina kuti nzyaakaamba Saatani zyoonse nzyabuyo. Mpoonya uyoosandula nyika kuba paradaiso, kweelana amboyakalengwa kuti ibe. Boonse aabo ibali “muzyuumbwe” bayoobusyigwa. (Johane 5:28, 29) Bantu kunyina nobayakuciswa naa kufwa pe. Jesu uyakuzibambulula zintu zyoonse nzyaanyonyoona Saatani. Jehova uyakubelesya Jesu ‘kunyonyoona milimo ya Diabolosi.’ (1 Johane 3:8) Tulamulumba kapati Jehova akaambo kakutukkazikila moyo ciindi cino kutegwa tukonzye kumuzyiba alimwi akumusala kuti abe Mweendelezi wesu. (Amubale 2 Petro  3:9, 10.) Noliba leelyo notupenga, ulatugwasya kuti tuliyumye.—Johane 4:23; amubale 1 Bakorinto 10:13.

¹⁸ Jehova tatusinikizyi kuti tumusale kuba Mweendelezi wesu. Wakapa bantu cipego cakulisalila cakucita. Atulange-lange ncocaamba kulindiswe cipego eeci citaliboteli.

19. Ino ncipego nzi citaliboteli ncaakatupa Jehova? Nkaambo nzi ncotweelede kulumba akaambo kacipego eeci?

¹⁹ Cipego citaliboteli ncaakatupa Jehova cakulisalila cakucita citupa kwiindana kapati abanyama. Banyama bacita zintu cakutayeeya kweelana ambobalengedwe, pele swebo tulakonzya kusala buumi mbotunoopona alimwi akusala kukkomanisya Jehova naa pe. (Tusimpi 30:24) Alimwi swebo tatuli mbuli mincini iicita buyo zintu eezyo nzyoyakabambilwa kucita. Tulijisi lwaanguluko lwakusala naa tunooli bantu bali buti, lwakusala balongwe besu, alimwi ancotuyanda kucita mubuumi. Jehova uyanda kuti katukkomene mubuumi.

20, 21. Ncintu nzi ciinda kubota ncomukonzya kusala lino?

²⁰ Jehova uyanda kuti katumuyanda. (Matayo 22:37, 38) Uli mbuli muzyali uukkomana ciindi mwanaakwe naamba kuti “ndilamuyanda” ikuzwa ansi aamoyo ikutali akaambo kakusinikizyigwa buya. Jehova wakatupa lwaanguluko lwakusala kumubelekela naa pe. Saatani, Adamu a Eva bakasala kuzangila Jehova. Ino nywebo mulacibelesya buti cipego ncomujisi cakulisalila cakucita?

²¹ Amucibelesye cipego ncomujisi cakulisalila cakucita ikubelekela Jehova. Kuli mamiliyoni aabantu ibasala kukkomanisya Leza akumukazya Saatani. (Tusimpi 27:11) Ino ncinzi ncomukonzya kucita lino kutegwa mukajanike munyika mpya ya Leza eelyo nayakumanizya kupenga koonse? Cibalo citobela cilawiingula mubuzyo ooyu.