Akaambo kakukaka kuti Jesu utanda madaimona kwinda munguzu zya Leza, balembi aba Farisi balangilwa kuba amulandu wakusampaula muuya uusalala. Aboobo, ino balasala kuba kulubazu lwani, lwa Leza naa lwa Saatani? Jesu wati: “Nywebo ndinywe mupa kuti cisamu cibote amicelo yaco ibote naa kuti cibije amicelo yaco ibije, nkaambo cisamu cilazyibwa kumicelo yaco.”—Matayo 12:33.

Mbufwubafwuba ikwaamba kuti mucelo mubotu wakutanda madaimona ucitwa akaambo kakuti Jesu ubelekela Saatani. Mbubonya Jesu mbwaakacisalazya ciindi naakaamba Mulumbe Waacilundu, ikuti naa mucelo kauli mubotu, acalo cisamu cili kabotu, tacili cibi pe. Aboobo, ino mucelo waba Farisi ibatamikizya Jesu twaambo tutakwe ankotuya utondezya nzi? Utondezya kuti mbabi, balibolede. Jesu wabaambila kuti: “Nobana babacipile, ino mbuti mbomukonzya kwaamba zintu zibotu kakuli muli babi? Nkaambo mulomo waamba zizwide mumoyo.”—Matayo 7:16, 17; 12:34.

Ncobeni, majwi ngotwaamba atondezya zili mumyoyo yesu alimwi mpaayeeme lubeta. Aboobo, Jesu waamba kuti: “Ndimwaambila kuti mu Buzuba bwa Lubeta, bantu bayoolyaambilila kujatikizya majwi oonse aatagwasyi ngobaamba; nkaambo kumajwi aako uyakwaambwa kuti uli mululami, alimwi kumajwi aako uyoopegwa mulandu.”—Matayo 12:36, 37.

Nokuba kuti Jesu wacita milimo mipati iigambya, balembi aba Farisi baciyanda azimbi, bati: “Mwiiyi, tuyanda kubona citondezyo kulinduwe.” Kufwumbwa naa bakalibonena ameso kacita maleele naa pe, kuli bakamboni banji ibalibonena ameso zintu nzyacita. Aboobo Jesu waambila basololi aaba baba Juda kuti: “Izyalani libi alimwi lyabumambe lizumanana kuyanda kupegwa citondezyo, pele kunyina citondezyo ncoliyoopegwa ccita buyo citondezyo ca Jona musinsimi.”—Matayo 12:38, 39.

Jesu tanaabasiya mumudima kuti kabazumbauzya kujatikizya ncapandulula, aboobo wati: “Mbubonya Jona mbwaakali mwida lyamuswi kwamazuba otatwe isyikati amasiku, awalo Mwanaamuntu uyooba mukati kanyika kwamazuba otatwe isyikati amasiku.” Jona wakamenwa amuswi mupati pele wakazwa mulinguwo mbuli kuti wabusyigwa kubafwu. Aboobo, Jesu usinsima kuti uyoofwa kumane mubuzuba bwatatu uyoobusyigwa. Nocacitika eeci kumbele, basololi baba Juda bacikaka “citondezyo ca Jona,” bakaka kweempwa akucinca. (Matayo 27:63-66; 28:12-15) Mukwiimpana ambabo, “bantu baku Nineve” bakeempwa ciindi Jona naakabakambaukila. Aboobo bayakulipa mulandu zyalani eeli. Alimwi Jesu waamba kuti kwiinda mucikozyanyo cakwe, mwami mukaintu waku Sheba awalo uyakubapa mulandu. Mukaintu ooyu wakaliyandide kapati kumvwa  busongo bwa Solomoni alimwi wakagambwa naakabubona. Lino Jesu waamba kuti, “imupati kwiinda Solomoni mpali aano.”—Matayo 12:40-42.

Jesu wakozyanisya bukkale bwazyalani eeli libyaabi kubukkale bwamuntu iwagusyigwa muuya uusofweede. (Matayo 12:45) Akaambo kakuti muntu ooyu tazuzyi moyo wakwe azintu zibotu, muuya ooyo mubi ulapiluka akuletelezya myuuya iimbi iili ciloba mibi kapati kwiinda nguwo, eelyo ilamunjila. Mbubonya buyo, cisi cabana Israyeli cakasalazyigwa akubambululwa, mbuli muntu iwagusyigwa muuya uusofweede. Pele cisi eeci cakabakaka basinsimi ba Leza, calo icasololela kukukaka Jesu, walo uulibonya caantangalala kuti ujisi muuya wa Leza. Eeci catondezya kuti bukkale bwacisi eeci mbubi kapati lino kwiinda mbobwakabede kumatalikilo.

Kacaambaula Jesu, banyina abanabokwabo basika akwiima kumbali aankamu. Bamwi ibakkede munsi-munsi anguwe bamwaambila kuti: “Banyoko abanabokwanu baliimvwi anze, bayanda kukubona.” Mpoonya Jesu watondezya mbwalimvwa kujatikizya mbocili ciyumu cilongwe ncajisi abasikwiiya bakwe, balo ibali buyo mbuli banabokwabo abacizyi alimwi abanyina bamuzyala. Katambika janza kutondeka basikwiiya bakwe, wati: “Baama abakwesu mbaaba bamvwa jwi lya Leza akulicita.” (Luka 8:20, 21) Aboobo, watondezya kuti nokuba kuti cilongwe cakwe ababbululu bakwe cilayandika, icilongwe ncajisi abasikwiiya bakwe cilayandika kapati kwiinda ceeco ncajisi ababbululu bakwe. Eelo kaka cilatuyumya kuba acilongwe cili boobo ciyumu abakwesu mbotukomba limwi, ikwaambisya ciindi bantu bamwi nobatudooneka naa kutusampaula swebo alimwi amilimo yesu mibotu!