Jesu ucili ku Jerusalemu mu Sabata. Ciindi walo abasikwiiya bakwe nobeenda mumunzi, babona sikulombelela iwali moofwu kuzwa naakazyalwa. Basikwiiya babuzya Jesu kuti: “Rabbi, ino nguni wakacita cibi kutegwa azyalwe kali moofwu, sena muntu ooyu naa mbazyali bakwe?”—Johane 9:2.

Basikwiiya bayanda kuzyiba naa muntu ulakonzya kubisya kacili mwida lyabanyina. Jesu waingula kuti: “Tali muntu ooyu wakacita cibi nobaba bazyali bakwe pe, pele nkutegwa milimo ya Leza itondezyegwe mulinguwe.” (Johane 9:3) Aboobo muntu ooyu naa bazyali bakwe tabajisi mulandu wakucita cinyonyoono naa cibi cili coonse calo cakapa kuti aofwaale. Muciindi caboobo, cibi ca Adamu cakapa kuti bantu boonse bazyalwe kabatalondokede akulangilwa kuba abulema, mbuli koofwaala. Pele boofwu bwamuntu ooyu bwamupa coolwe Jesu cakutondezya milimo ya Leza, mbubonya mbwaali kucita aaziindi zimbi naali kuponya bantu kumalwazi aabo.

Jesu wakankaizya kuti milimo eeyi yeelede kucitwa cakufwambaana. Waamba kuti: “Tweelede kubeleka milimo yayooyo wakandituma nolicili syikati; ibusiku bulaboola muntu uuli woonse natakonzyi kubeleka. Kufwumbwa kuti kandili munyika, ndili mumuni wanyika.” (Johane 9:4, 5) Ncobeni, ino-ino lufwu lwa Jesu luyoopa kuti Jesu abe mumudima wacuumbwe oomo mwatakonzyi kucita cintu cili coonse. Kwaciindi cino, walo ngokasensa kamumuni uumunikila nyika.

Pele sena Jesu ulamuponya muntu ooyu, alimwi ikuti naa mboobo, ino ulamuponya buti? Jesu waswida mate ansi akukanda bulongo amate aakwe. Kumane wananika bulongo bumwi mumeso aamoofwu ooyu akumwaambila kuti: “Koya ukasambe muzyiba lya Siloamu.” (Johane 9:7) Muntu ooyu wacita ncaambilwa. Naacita oobo, watalika kubona! Amuyeeye buyo mbwaakkomana kutalika kubona ciindi cakusaanguna mubuumi bwakwe!

Basimukobonyina alimwi abantu bambi buyo ibakamuzyi kuti moofwu bagambwa. Babuzya kuti: “Sena ooyu tali ngomuntu uulya iwakali kukkala kalombelela?” Bamwi bavwiila kuti: “Ngonguwe.” Pele bambi cabakatazya kusyoma eelyo baamba kuti: “Talinguwe pe, pele bakozyanya buyo.” Muntu ooyu mwini wavwiila kuti: “Ndendime.”—Johane 9:8, 9.

Aboobo bamubuzya kuti: “Ino meso aako akajaluka buti?” Waingula kuti: “Imuntu uutegwa Jesu wakakanda bulongo akundinanika mumeso akundaambila kuti, ‘Koya ku Siloamu ukasambe.’ Mpoonya ndakaunka kuyoosamba, eelyo ndakatalika kubona.” Alimwi babuzya kuti: “Uli kuli muntu ooyo?” Sikulombelela waingula kuti: “Tandizyi.”—Johane 9:10-12.

Bantu aaba batola muntu ooyu kuba Farisi, aabo abalo ibayanda kuzyiba mbwaakatalika kubona. Wabaambila kuti: “Wakandinanika bulongo mumeso, mpoonya ndakasamba eelyo ndakatalika kubona.” Mubwini ba Farisi beelede kukkomana kuti muntu ooyu sikulombelela wakaponesyegwa. Muciindi  cakucita boobo, bamwi akati kabo bamupa mulandu Jesu. Baamba kuti: “Ooyu tali muntu uuzwa kuli Leza, nkaambo tabambi buzuba bwa Sabata.” Pele bambi baamba kuti: “Ino mbuti muntu sizibi mbwakonzya kucita zitondezyo zyamusyobo ooyu?” (Johane 9:15, 16) Aboobo baandaana.

Kabaimpene mizeezo, balanga muntu ooyu lino uukonzya kubona akumubuzya kuti: “Ino yebo waamba nzi kujatikizya nguwe, mbwaanga wakajalula meso aako?” Walo tazumbauzyi abuniini kujatikizya Jesu, eelyo wavwiila kuti: “Musinsimi.”—Johane 9:17.

Ba Juda bakaka kwaazumina makani aaya. Ambweni bayeeya kuti Jesu amuntu ooyu bapangana buya kutegwa bacenge bantu. Aboobo, bayeeya kuti nzila imwi makani aaya mbwaakonzya kumana nkubuzya bazyali basikulombelela ooyu kuti naa ncobeni wakali moofwu.