CIIYO 7
Ino Bwami bwa Leza Ninzi?
1. Ino Bwami bwa Leza Ninzi?
Nkaambo nzi Jesu ncali Mwami iweelela?—MARKO 1:40-42.
Bwami bwa Leza nimfwulumende yakujulu. Buyoonjila mubusena bwamfwulumende zyoonse alimwi akupa kuti kuyanda kwa Leza kucitwe kujulu aanyika. Makani aajatikizya Bwami bwa Leza, makani mabotu. Ino-ino Bwami bwa Leza buyoozuzikizya cintu ncobayanda bantu, nkokuti mfwulumende yeendelezya kabotu. Buyookamantanya bantu boonse bapona anyika.—Amubale Daniele 2:44; Matayo 6:9, 10; 24:14.
Bwami bweelede kuba amwami. Jehova wakasala Mwanaakwe, Jesu Kristo, kuba Mwami wa Bwami bwakwe.—Amubale Ciyubunuzyo 11:15.
Amweebelele Kavidiyo Ino Bwami bwa Leza Ninzi?
2. Nkaambo nzi Jesu ncali Mwami iweelela?
Mwana wa Leza, Mwami iweelela nkaambo ulaaluzyalo alimwi ulakakatila kubululami. (Johane 1:14) Alimwi ulaanguzu zyakugwasya bantu nkaambo uyoolela nyika kali kujulu. Naakabusyigwa, wakaunka kujulu akukkala kujanza lyalulyo lya Jehova kalindila. (Bahebrayo 10:12, 13) Kumane, Leza wakamupa nguzu zyakuti atalike kulela.—Amubale Daniele 7:13, 14.
3. Ino mbaani bayoolela a Jesu?
Ikakamu kaitwa kuti “basalali,” kayoolela a Jesu kujulu. (Daniele 7:27) Basalali ibakasaanguna kusalwa mbaapostolo ba Jesu basyomeka. Kusikila lino, Jehova wazumanana kusala baalumi abamakaintu basyomeka kuba basalali. Mbubwenya mbuli Jesu, balabusyigwa amibili yamuuya.—Amubale Johane 14:1-3; 1 Bakorinto 15:42-44.
Ino bantu baunka kujulu bali bongaye? Jesu wakabaita kuti “katanga kaniini.” (Luka 12:32) Antoomwe banooli 144,000. Bayoolela nyika antoomwe a Jesu.—Amubale Ciyubunuzyo 14:1.
4. Ino ncinzi cakacitika Jesu naakatalika kulela?
Bwami bwa Leza bwakatalika kulela mu 1914. * Ntaamu yakusaanguna njaakabweza Jesu naakatalika kulela kali Mwami njakusowela Saatani amadaimona aakwe anyika. Saatani wakakalala kapati alimwi wakatalika kuleta mapenzi nyika yoonse. (Ciyubunuzyo 12:7-10, 12) Kuzwa leelyo, mapenzi ngobajisi bantu avwula kapati. Nkondo, nzala, malwazi, alimwi amizuzumo yanyika, zyoonse eezyi nzibeela ‘zyacitondezyo’ cakuti Bwami bulaafwaafwi kulela nyika.—Amubale Luka 21:7, 10, 11, 31.
5. Ino ncinzi ncobuli mukuzuzikizya Bwami bwa Leza?
Kwiinda mumulimo wakukambauka wanyika yoonse, Bwami bwa Leza buli mukukamantanya nkamu mpati yabantu bazwa muzisi zyoonse. Mamiliyoni aabantu babombe myoyo bayaabuba balelwa ba Bwami bwa Leza ansi aabweendelezi bwa Jesu. Bwami bwa Leza buyoobakwabilila bwaakunyonyoona bweende bwazintu oobu bubyaabi anyika. Aboobo, boonse bayanda kugwasyigwa a Bwami bwa Leza beelede kwiiya kuba balelwa ba Jesu ibamvwida.—Amubale Ciyubunuzyo 7:9, 14, 16, 17.
Mumyaka iili 1,000, Bwami buyoozuzikizya makanze ngaakajisi Leza kumatalikilo kujatikizya bantu. Nyika yoonse iyooba paradaiso. Kumamanino, Jesu uyoobupilusya Bwami kuli Bausyi. (1 Bakorinto 15:24-26) Sena kuli muntu ngomuzyi ngomuyanda kwaambila makani aajatikizya Bwami bwa Leza?—Amubale Intembauzyo 37:10, 11, 29.
^ munc. 6 Kutegwa muzyibe zinji kujatikizya businsimi bwamu Bbaibbele bwaamba zyamwaka wa 1914, amubone bbuku lyakuti Ino Ncinzi Cini Bbaibbele Ncoliyiisya? mapeeji 215-218.
