Makani mabotu aakuti bantu bayoopona kukabe kutamani anyika alilembedwe mu Bbaibbele. (Intembauzyo 37:29) Bbaibbele lijisi mabbuku masyoonto-syoonto aali 66. Leza wakabelesya baalumi basyomeka babalilwa ku 40 kulemba mabbuku aaya. Mabbuku aakusaanguna osanwe akalembwa a Musa myaka iili 3,500 yainda. Bbuku lyamamanino lyakalembwa amwaapostolo Johane myaka iili 1,900 yainda. Ino basikulemba Bbaibbele bakali kulemba mizeezo yani? Leza wakabelesya muuya uusalala kubaambila ncobakeelede kulemba. (2 Samuele 23:2) Bakalemba mizeezo ya Leza, ikutali yabo beni pe. Aboobo Jehova ngo Sikwaanza Bbaibbele.​—Amubale 2 Timoteyo 3:16; 2 Petro 1:20, 21.

Amweebelele Kavidiyo Ino Sikwaanza Bbaibbele Nguni?

Tulizyi kuti Bbaibbele lyakazwa kuli Leza akaambo kakuti lilasinsima munzila iiluzi iziyoocitika kumbele. Kunyina muntu uukonzya kucita oobo. (Joshua 23:14) Alikke Leza Singuzuzyoonse nguukonzya kubona munzila iiluzi iziyoobacitikila bantu kumbele.​—Amubale Isaya 42:9; 46:10.

Ibbuku lizwa kuli Leza lyeelede kuba lilibedelede, alimwi oobo mbolibede ncobeni. Mabbiliyoni aama Bbaibbele alajanika mumyaanda myaanda yamyaambo. Nokuba kuti ndyakaindi, Bbaibbele lileendelana asayaansi. Alimwi basikulemba aaba bali 40 tiibakalemba zintu zikazyanya. * Kunze  lyaboobo, luyando lwa Leza ilutondezyedwe mu Bbaibbele lulijisi nguzu zyakucinca bantu kuti kabapona kabotu. Twaambo ootu twamasimpe tupa kuti mamiliyoni aabantu basyome kuti Bbaibbele ndi Jwi lya Leza.​—Amubale 1 Batesalonika 2:13.

Amweebelele Kavidiyo Ino Inga Twasinizya Buti Kuti Bbaibbele Ndyamasimpe?

Makani amwi mapati aambwa mu Bbaibbele makani mabotu aajatikizya makanze Leza ngajisi kujatikizya bantu. Magwalo alapandulula mbocakasweeka coolwe ncobakajisi bantu kumatalikilo cakupona munyika yaparadaiso alimwi amboiyakupilusyigwa paradaiso kumbele.​—Amubale Ciyubunuzyo 21:4, 5.

Ijwi lya Leza alimwi lilijisi milawo, njiisyo, alimwi alulayo. Kuyungizya waawo, Bbaibbele lilaamba zikozyanyo zijatikizya mbwaakali kubeendelezya bantu Leza. Zikozyanyo eezyi ziyubununa bube bwa Leza. Aboobo, Bbaibbele lilakonzya kumugwasya kumuzyiba Leza. Lilapandulula mbomukonzya kuba mulongwe wakwe.​—Amubale Intembauzyo 19:7, 11; Jakobo 2:23; 4:8.

Broshuwa eeyi ilamugwasya kumvwisya Bbaibbele kwiinda mukubelesya nzila njaakali kubelesya Jesu. Wakali kupandulula “ncaamba Magwalo” ngaakali kubaambila.​—Amubale Luka 24:27, 45.

Kuli buyo zintu zisyoonto zikondelezya mbuli mbwaakondelezya makani mabotu aazwa kuli Leza. Nokuba boobo, bantu banji tabaayandi, alimwi buya bamwi alabanyemya. Mutatyompwi pe. Bulangizi bwanu bwakupona kukabe kutamani buyeeme aakumuzyiba Leza.​—Amubale Johane 17:3.