Aciindi cimwi Mwami Nebukadinezara naakalota cibumbwa, wakapanga cibumbwa cangolida cipati. Mpoonya cibumbwa eeco wakaciimika mucibanda ca Dura akwiita bantu balemekwa kapati mucisi coonse, kubikkilizya aba Sadirake, Mesaki alimwi a Abedinego kuti baboole kumbele lyancico. Mwami wakalailila kuti: ‘Mbomutiimvwide buyo kulila kwamyeembo, tuntimbwa alimwi amintolilo, muvwuntame kumbele lyacibumbwa! Kufwumbwa ooyo utiikake kuvwuntama, ulasowelwa mumulilo uupya kapati.’ Sena Bahebrayo botatwe bakacivwuntamina cibumbwa naa bakakomba buyo Jehova alikke?

Kumane mwami wakalailila kuti ziimbyo zilizyigwe. Boonse bakavwuntama akucikomba cibumbwa, ccita buyo Sadirake, Mesaki alimwi a Abedinego. Baalumi bamwi bakabona cakacitika, aboobo bakaambila mwami kuti: ‘Bahebrayo botatwe baya bakaka kukomba cibumbwa cako.’ Nebukadinezara wakatuma bantu kuti babaite, mpoonya wakabaambila kuti: ‘Ndilamupa coolwe acimbi kuti mukombe cibumbwa. Ikuti mutaciti oobo, ndilamusowela mubbibi lyamulilo. Kunyina leza uukonzya kumufwutula kuzwa kulindime.’ Bakaingula kuti: ‘Tatuyandiki kupegwa coolwe cimbi pe. Leza wesu ulakonzya kutufwutula. Pele nokuba kuti atatufwutuli, tatukoovwuntama pe, O mwami.’

Nebukadinezara wakanyema kapati. Wakaambila baalumi bakwe kuti: ‘Amulisosele bbibi lyamulilo kutegwa lipye ziindi zili 7 kwiinda mbolipya lyoonse!’ Kumane wakalailila basikalumamba bakwe kuti: ‘Amubaange baalumi aaba akubasowela mumo!’ Bbibi  lyamulilo lyakali kupya kapati cakuti ciindi basikalumamba nobakaswena afwaafwi, bakafwa mpoonya-mpoonya. Bahebrayo botatwe bakasowegwa mumulilo. Pele Nebukadinezara naakalanga mukati, wakabona baalumi bali 4 kabeendeenda mubbibi lyamulilo muciindi cabaalumi botatwe. Wakayoowa kapati akubuzya babelesi bakwe kuti: ‘Sena tiitwawaala baalumi botatwe mumulilo? Ndibwene bali 4, alimwi umwi ulibonya mbuli mungelo!’

Nebukadinezara wakaswena afwaafwi abbibi lyamulilo akwiita kuti: ‘Amuzwe oomo, nywebo nobabelesi ba Leza Mupatikampatila!’ Boonse bakagambwa kubona ba Sadirake, Mesaki alimwi a Abedinego kabazwa mumulilo kakunyina kupya. Lukanda lwabo, masusu alimwi azisani kunyina nozyakapya, alimwi buya kunyina anobakali kununka mulilo.

Nebukadinezara wakati: ‘Leza waba Sadirake, Mesaki alimwi a Abedinego mupati. Watuma mungelo wakwe kutegwa abafwutule. Kunyina leza uuli mbuli leza wabo.’

Mbubwenya mbuli Bahebrayo botatwe, sena ulikanzide kusyomeka kuli Jehova ziyume zitete?