Nzila Yacisambomwe: Kulekelelana

“Amukazikilane myoyo yanu akulekelelana.”—Ba-Kolose 3:13.

Ncocaamba eeci. Banabukwetene ibazwidilila balaiya kuzyintu zyakabacitikila musyule; Nokuba boobo, aumwi wabo tabikkilili alimwi tabusyi twaambo twakainda akwaambila mweenzinyina majwi mbuli aakuti, “Lyoonse ulamuka” naa kuti, “Lyoonse toswiilili.” Boonse bobile, mulumi amukaintu, balayandisya “kulekelela milandu.”—Tusimpi 19:11.

Ino nkaambo nzi ncociyandika eeci? Leza “ulafwamba kujatila,” pele bantu talili lyoonse nobacita oobu. (Intembauzyo 86:5) Ikuti banabukwetene kabatabambi twaambo naa baimpana, mukuya kwaciindi ootu twaambo tulakonzya kubapa kutalika kusulaikana cakunga babona mbuli kuti tacicikonzyeki kulekelelana. Balakonzya kuleka kwaambauzyanya—aumwi inga katacibikkili maano mbwalimvwa mweenzinyina. Boonse batalika kulimvwa mbuli kuti baangilidwe buya mulukwatano mutakwe luyando.

Amusole nzila eeyi. Amubone zifwoto zyenu nzyomuli antoomwe angomukwetene limwi ciindi nomwakali kweebana naa nomwakazwa akukwatana. Amusole kubukulusya luyando ndomwakajisi kamutanatalika kuzwangana. Amuyeeye cakamupa kuti mumuyande ngomukwetene limwi.

▪ Ino mbube nzi mbwajisi ibumukkomanisya kapati lino?

▪ Amuyeeye zyintu zibotu ibana benu nzyobakonzya kwiiya kulindinywe akaambo kakuba muntu uuyandisya kulekelela bamwi.

Amusale cakucita. Amuyeeye nzila yomwe naa zyobilo zikonzya kumugwasya kutabikkililana akutabusya twaambo twakaindi ikuti naa mwaimpana angomukwetene limwi.

Mulakonzya kumulumbaizya ngomukwetene limwi akaambo kabube bwakwe ibumukkomanisya?—Tusimpi 31:28, 29.

Amujane nzila mbomukonzya kutondezya kuti mulabalekelela bana benu.

Mulakonzya kubandika abana benu makani aajatikizya kulekelelana alimwi ampindu aumwi njakonzya kujana ikuti kamulekelelana mumukwasyi.

[Cifwanikiso icili apeeji 8]

Ikuti mwamulekelela muntu, nkokuti cikwelete camana. Tamutaliki kumusesa alimwi