Nzila Yane: Kulemekana

“Azizwe kulindinywe zintu ezi zyoonse . . . maambani, akutuka.”—Ba-Efeso 4:31.

Ncocaamba eeci. Mumikwasyi yoonse, iizwidilila aitazwidilili, banamukwasyi balaimpana. Nokuba boobo, mumikwasyi iizwiidilila, banamukwasyi balabandika kakunyina kutukilana, kusampaulana alimwi akubelesya majwi amwi aatali kabotu. Umwi aumwi mumukwasyi ucitila bamwi zyintu mbubwenya mbwayanda kuti kabamucitila.—Matayo 7:12.

Ino nkaambo nzi ncociyandika eeci? Majwi ngotwaamba alakonzya kubacisa bamwi mbubwenya mbuli cilwanyo mbocinyonyoona. Ikaambyo kamwi kamu Bbaibbele kaamba kuti: “Ncibotu kukala munyika yacimpayuma kwiinda kuba amwanakazi silubweko.” (Tusimpi 21:19) Majwi aaya alabeleka akumwaalumi uutacizyi kwaambaula. Caboola kumakani aakulela bana, Ibbaibbele lyaamba kuti: “Mutanoonyenukili bana banu, kuti batanoosululwi.” (Ba-Kolose 3:21) Ibana batongookwa lyoonse balakonzya kulimvwa kuti kunyina nobakonzya kubakkomanisya bazyali babo. Aboobo balakonzya kutyompwa.

Amusole nzila eeyi. Kwiinda mukwiingula mibuzyo iitobela, amulilingule kutegwa mubone naa mulalemekana mumukwasyi wenu.

▪ Ikuti naa kwaba kuteendelana mumukwasyi wangu, sena kanji-kanji tulabwesyanya cakuti umwi ulazwa muŋanda cabukali?

▪ Ciindi nondaambaula angotukwetene limwi naa abana, sena ndibelesya mabala mabi mbuli aakuti, “uli mufwuba-fwuba,” “uli ciyanga,” naa aamwi aakozyenye ayaaya?

▪ Sena ndakakomenena mumukwasyi bantu mobakali kubelesya majwi mabi?

Amusale cakucita. Amuyeeye mbaakani yomwe naa zyobile nzyomukonzya kulibikkila mukutondezya kuti mulijisi bulemu kwiinda mukubelesya majwi mabotu. (Muzeezo: Amukanze kubelesya majwi aakuti “mebo” kutali “yebo.” Mucikozyanyo, “mebo tacindikkomanisyi yebo no . . . ,” muciindi cakwaamba kuti “Lyoonse yebo ula . . .”)

Mulakonzya kumuzyibya ngomukwetene limwi kujatikizya mbaakani nzyomujisi. Kwainda myezi yotatwe, amumulombe kuti aambe naa kuli kucinca kuli koonse nkomwacita.

Amuyeeye ncomweelede kucita kutegwa mutani kubelesyi majwi mabi nomwaambaula abana benu.

Amulilekelele kubana benu akaambo kamajwi mabi ngomwakali kubelesya kulimbabo.

[Cifwanikiso icili apeeji 6]

Ikubelesya majwi mabi lyoonse mumukwasyi kulakonzya kunyonganya cilongwe cili akati kabanamukwasyi mbubonya mbuli mayuwe aamulwizi, mukuya kwaciindi, mbwaakonzya kukolomona bbwe ijumu