Nzila Yasanu: Kuzilanga Kabotu Zyintu

“Butontozi bwanu abuzibwe.”—Ba-Filipi 4:5.

Ncocaamba eeci. Mumikwasyi iizwidilila, mulumi amukaintu balalekelelana. (Ba-Roma 3:23) Tababikkili bana babo milawo iikatazya kutobela alimwi tababalendekezyi pe. Tababikki milawo minji muŋanda. Ikuti bana kabayandika kululamikwa, bazyali balacita oobo “muciyanza ceelede buyo.”—Jeremiya 30:11.

Ino nkaambo nzi ncociyandika eeci? Ibbaibbele lyaamba kuti “busongo buzwa kujulu . . . bulatontola.” (Jakobo 3:17) Leza lwakwe kunyina nalangila bantu batalondokede kuti kabacita zyintu cakulondoka, aboobo abalo banabukwetene mbobeelede kuzilanga zyintu oobu. Masimpe, kujaninana tumpenda lyoonse kukonzya buyo kuleta mazwanga, kutali lukamantano. Cilainda kubota lyoonse kuyeeya kuti “toonse tulalubya muziyanza zinji.”—Jakobo 3:2.

Ibazyali bazwidilila bazilanga kabotu zyintu nobalanganya bana babo. Tabaciindilizyi kunyemena bana alimwi tabali “basikakomokomo.” (1 Petro 2:18) Balabazumizya bana bakubukide kucita zyintu zimwi nzyobayanda ikuti batondezya kuti basala kabotu muzyintu zimwi. Tabasoli kweendelezya bana babo muzyintu zyoonse. Ibbuku limwi lipandulula kuti, ikusola kweendelezya zyintu zyoonse zyamubuumi bwamukubusi “kuli mbuli kukambila mvwula. Maliminya buyo nkaambo mvwula tiikonzyi kuwa.”

Amusole nzila eeyi. Kwiinda mukubelesya mibuzyo iitobela, amulilingule kuti mubone naa muzilanga kubotu zyintu.

▪ Ino ndilili nomwakamulumbaizide ngomukwetene limwi?

▪ Ino ndilili nomwakamutongooka ngomukwetene limwi?

Amusale cakucita. Ikuti mwaalilwa kwiingula mubuzyo wakusaanguna, pele camuubila kwiingula wabili, amuyeeye mbaakani njomukonzya kulibikkila kutegwa kamuzilanga kabotu zyintu.

Mulakonzya kubandika angomukwetene limwi kujatikizya nzyomwasala kucita nyoonse nyobile.

Amuyeeye zyintu nzyomukonzya kuzumizya mwaneenu uukubukide kuti alisalile.

Mulakonzya kwaambaula cakukkazyika moyo amwaneenu kujatikizya ciindi ncaelede kusika aŋanda.

[Cifwanikiso icili apeeji 7]

Mbubwenya mbuli namutekenya uulemeka bamwi, muntu uuzilanga kabotu zyintu ulabazumizya banamukwasyi kucita nzyobayanda ikuti kazyeelela