Nzila 3-Kamunyanyaasya Mubili

“Ikuti kunyanyaasya mubili kwiinda muzisobano nowali musamu, nkokuti nowali ngomusamu uubelesyegwa kapati munyika yoonse.”—Emory University School of Medicine. Kufwumbwa zyintu nzyotukonzya kucita kujatikizya buumi bwesu, nzisyoonto zikonzya kutugwasya kwiinda mbokutugwasya kunyanyaasya mubili kwiinda muzisobano.

◯ Kamubeleka canguzu. Kupona buumi bwakujintauka-jintauka alimwi akulya zyakulya zili kabotu, kulakonzya kutugwasya kukkomana, kuyeeya kabotu, kuba anguzu zinji, kubeleka kapati akuba amibili iili kabotu. Kutegwa mugwasyigwe, takuyandiki buya kuti mane mumvwe mubili kucisa naa kuciindilizya. Kunyanyaasya mubili cakutaciindilizya kwaziindi zili mbozibede munsondo yomwe kulakonzya kugwasya.

Kubalika-balika, kweendesya, kuccovwa ncinga, akutola lubazu mumisobano—zyoonse eezyi zipa kuti moyo kauduntaana kapati akupa kuti katuzwa nkasaalo—kulatuyumya akutukwabilila kubulwazi bwamoyo akukulebuka kwamubili. Kucita zisobano zili boobu alimwi azisobano zyuubauba kulatugwasya kuyumya mafwuwa, milambi alimwi azizo zimwi zyamubili. Zisobano nzyomunya eezyi zilagwasya kuti zyakulya kazigaigwa kabotu mumubili alimwi akutukwabilila kukutaneneya kapati.

◯ Kamweenda amaulu. Kunyanyaasya mubili kulagwasya kubantu bamisela yoonse, alimwi eeci tacipandululi kuti mweelede kuzulilwa mukabunga kabazisobano. Pele mulakonzya kweenda amaulu muciindi cakubelesya myootokala naa zimwi zyakweendela. Kuti nkomuunka kakuli kufwaafwi, inga cilainda kugwasya kweenda amaulu muciindi cakulindila zyakweendela. Nobazyali amugwasye bana banu kutola lubazu muzisobano zyakunyanyaasya mubili. Zisobano zili boobu ziyumya mibili alimwi zilagwasya kuba amibili iili kabotu muciindi cakusobana zisobano zyakukkala mbuli kusobana cisobano caavidiyo.

Kufwumbwa naa muli bapati buti nomutalika, mulakonzya kugwasyigwa kwiinda muzisobano zyakunyanyaasya mubili. Ikuti kamuli bapati naa kamuciswa-ciswa, mpoonya tiimwali kucita zisobano zyakunyanyaasya mubili, mweelede kubonana abasilisi akubuzya mbomukonzya kutalika. Pele mweelede kutalika. Kunyanyaasya mubili kucitwa cakutaciindilizya kulakonzya kubagwasya nobaba baabo bacembeede kuyumya milambi alimwi azifwuwa. Alimwi kulakonzya kubagwasya kuti batalicisi.

Zisobano zyakunyanyaasya mubili zyakabagwasya ba Rustam ibaambwa mucibalo cakusaanguna muzibalo eezyi zitobelana. Myaka iili ciloba yainda, bakatalika kubalika-balika asyoonto-syoonto buzuba abuzuba mafwumo-fwumo antoomwe abakaintu babo mazuba osanwe nsondo ansondo. Baamba kuti: “Kumatalikilo, twakali kulitamizya kuti tutabaliki. Pele akaambo kakuba tobilo, twakali kukulwaizyanya. Lino caba cilengwa cibotu alimwi cikkomanisya.”

[Cifwanikiso icili apeeji 6]

Zisobano zyakunyanyaasya mubili zilakonzya kukkomanisya