Bakubusi Balabuzya

Ino ndili muntu uuli buti?

Michael wamubona Brad kaboola kulinguwe, walibilika kujatikizya citiicitike. Brad waamba kuti: “Kwaamba Michael, nkooko!” Kumane Brad watambika janza kuti amutondezye cili mujanza, mpoonya Michael wacibona nciconya ncaali kuyeeyela—lubanje. Tayandi kutambula, pele alimwi tayandi kulibonya mbuli kuti ulazilaika. Kaambaula ajwi libombe, Michael wati: “Kutali lino, ndiza ciindi ciboola. . . . Wamvwa?”

Jessica wamubona Brad kaboola kulinguwe, ulilibambilide kujatikizya citiicitike. Brad waamba kuti: “Kwaamba Jess, nkooko!” Kumane Brad watambika janza kuti amutondezye cili mujanza, mpoonya Jessica wacibona nciconya ncaali kuyeeyela—lubanje. Jessica wamwaambila cakutainda mumbali kuti: “Peepe! Tandiyandi kufweba lubanje nkaambo taluli kabotu kubuumi bwamuntu. Alimwi kukwaambila masimpe Brad, . . . toeleli kufweba pe!”

MUBUKKALE ibwaambwa atala aawa, ino nkaambo nzi Jessica ncaatayungwa? Nkaambo ujisi cintu cimwi calo Michael ncatajisi. Sena ulicizyi cintu eeco? Ncitondezyo. Tacili citondezyo cilembedwe zyina alindinywe pe. Icitondezyo eeci, mbube bwamukati ibutuyeezya bwini mbotubede. Ikuti katujisi luzyibo luli boobu, tulakonzya kukaka kucita zyintu zibi—ikutalekela bantu bamwi kuti kabeendelezya buumi bwesu. Ino mbuti mbokonzya kukaka kuyungwa? Kwiingula mibuzyo eeyi iitobela kuyookugwasya kucita boobo.

1 INO NZYINTU NZI NZYONDICITA KABOTU?

Ncociyandika: Ikuzyiba zyintu nzyocita kabotu alimwi amumbazu mocita kabotu kuyookugwasya kuba sicamba.

Koyeeya kaambo aaka: Muntu uuli woonse ulijisi luzyibo lwakucita cintu cimwi. Mucikozyanyo, bantu bamwi balijisi luzyibo muzyakuzekaula naa kwiimba, kakuli bamwi balicibwene mukuzuzaana. Raquel ulicizyi kapati kubamba myootokala. * Wakaamba kuti: “Ciindi nindakajisi myaka iili 15, ndakali kuyandisya kuyooba muntu uubamba myootokala.”

Cikozyanyo camu Bbaibbele: Imwaapostolo Paulo wakalemba kuti: “Nokuba kuti tandicizyi kwaambaula, mubwini luzyibo lwalo ndilijisi.” (2 Bakolinto 11:6) Akaambo kakwaamvwisya kabotu Magwalo, Paulo wakacikonzya kuliyumya ciindi bamwi nobakali kumukazya. Kunyina naakalekela kuti kukazyigwa ooku kumutyompye.—2 Bakolinto 10:10; 11:5.

Kolilingula. Kolemba ansi aawa zyintu nzyokonzya kucita.

․․․․․

Kolemba ansi aawa bube bubotu mbojisi. (Mucikozyanyo, sena uli muntu uubikkila maano bamwi?  mwaabi? muntu uubikkila maano kucita zyintu? muntu uufwambaana kucita zyintu?)

․․․․․

“Ndilasoleka kubabikkila maano bantu. Ikuti naa muntu umwi ulaambaula andime ciindi nendijisi bubi, ndilaleka kucita nzyondicita kutegwa ndimvwe ncayanda kwaamba.”—Oobu mbwaakaamba Brianne.

Ikuti naa cakukatazya kuzyiba bube bubotu mbojisi, koyeeya cintu comwe citondezya kuti wakomena, mpoonya ucilembe ansi aawa.—Mucikozyanyo, kobona kabbokesi kakuti  “Nzyobaamba Beenzinyoko.”

․․․․․

2 INO MUUMBAZU NZI MONDILEZYA?

Ncociyandika: Mbubwenya mbuli nketani mboitakonzyi kuyuma kuti naa kabeela komwe kanjiyo kakatali kayumu, acalo citondezyo cako cilakonzya kucinca akubija kuti wasolozya kulezya kwako mubuumi.

Koyeeya kaambo aaka: Kunyina muntu uulondokede. (Baloma 3:23) Muntu uuli woonse kuli mwalezya mwayelede kucinca. Imusimbi wazyina lya Seija wakabuzya kuti: “Ino nkaambo nzi ncondinyema amutwaambo tutayi koomoonga? Notuba tuntu tusyoonto-syoonto tulandinyemya, alimwi ndilaalilwa kuliyumya kuti nditanyemi.”

Cikozyanyo camu Bbaibbele: Paulo wakalikuzyi kulezya kwakwe. Wakalemba kuti: “Mumoyo wangu ndilabotelwa kapati amulawo wa Leza, pele mumubili wangu ndibona mulawo uumbi uulwana mulawo uuli mumizeezo yangu, alimwi uundipa kuba mwaange wamulawo wacibi.”—Baloma 7:22, 23.

Kolilingula. Ino nkulezya nzi nkoyanda kuti ubambulule?

․․․․․

“Ndakajana kuti lyoonse ndamana kweebelela filimu iitondezya bantu bayandana, ndilausa akulimvwa kulendelelwa mpoonya ndilatalika kuyeeya kujana wakuyandana limwi. Aboobo, lino ndabona kuti ndeelede kucenjela kujatikizya mafilimu ngondeebelela.”—Oobu mbwaakaamba Bridget.

3 INO NDIJISI MBAAKANI NZI?

Ncociyandika: Ikuti kojisi mbaakani, buumi bwako bunoojisi mpindu kapati. Alimwi ciyookugwasya kutantamuka bantu babi akweeleba bukkale bukonzya kukusinkilila kuti uzuzikizye mbaakani zyako.

Koyeeya kaambo aaka: Sena inga watanta mumootokala akwaambila namutekenya kuti kakuzungulusya abusena bomwe mane kusikila mungwimba umane? Oobo inga bwaba bufwuba-fwuba—alimwi eeci ciladula kapati! Mbaakani zilakonzya kukugwasya kuti kotazinguluki abusena bomwe mubuumi. Ulijisi busena nkoelede kuunka alimwi ambokonzya kuyoosika.

Cikozyanyo camu Bbaibbele: Paulo wakalemba kuti: “Tandibaliki mbuli kuti tandikuzyi nkondiya pe.” (1 Bakolinto 9:26) Muciindi cakwiile kuzinguluka akwaalilwa kucita zyintu ziyandika kapati mubuumi, Paulo wakalibikkila mbaakani alimwi akupona kweelana ambaakani eezyo.—Bafilipi 3:12-14.

 Kolilingula. Kolemba mbaakani zyotatwe ansi aawa nzyoyanda kuyoozuzikizya mwaka uuboola.

1 ․․․․․

2 ․․․․․

3 ․․․․․

Lino kosala mbaakani atala aawa iiyandika kapati kuli nduwe, alimwi kolemba ansi aawa ncokonzya kucita kutegwa wiizuzikizye.

․․․․․

“Ikuti kanditajisi cakucita, inga ndiile kwiingaila buyo. Aboobo cili kabotu kuba ambaakani alimwi akuzizuzikizya.”—Oobu mbwaakaamba José.

4 INO NZYINTU NZI NZYONDISYOMA?

Ncociyandika: Ikuti kotazizyi nzyosyoma, ciyakukwaalila kulibikkila mbaakani zili kabotu. Mbubwenya mbuli naluntaambwe, unikucinca-cinca mubala kutegwa weelane abeenzinyoko—icitondezya kuti tojisi citondezyo cako omwini.

Koyeeya kaambo aaka: Ibbaibbele likulwaizya Banakristo kuti beelede ‘kuzyiba kuyanda kwa Leza, ikubotu, kutambulika alimwi kulondokede.’ (Baloma 12:2) Kuti micito yako kayeendelana anzyosyoma, uyoopona kweelana acitondezyo cako—kunyina makani azyintu nzyobacita bamwi.

Cikozyanyo camu Bbaibbele: Ciindi naakali mukubusi Daniele “wakalibeteka mumoyo wakwe” cakuti wakaitobela milawo ya Leza, nokuba kuti wakali kule amukwasyi wakwe alimwi abakombinyina. (Daniele 1:8) Kwiinda mukucita boobo, wakalizizyi nzyaakali kusyoma. Daniele wakali kupona kweelana azyintu nzyaakali kusyoma.

Kolilingula. Ino nzyintu nzi nzyosyoma? Mucikozyanyo:

● Sena ulasyoma muli Leza? Kuti naa mboobo, ino nkaambo nzi? Ino ncinzi cikupa kusyoma kuti nkwali?

● Sena ulasyoma kuti milawo ya Leza yakulilemeka igwasya nduwe? Kuti naa mboobo, ino nkaambo nzi? Mucikozyanyo, ino ncinzi cikupa kusyoma kuti kutobela milawo ya Leza mumakani aakoonana kulakonzya kupa kuti kokkomene, kwiinda kutobela bukkale bwabeenzinyoko bwakucita kufwumbwa ncobayanda?

Eeyi mibuzyo iyandika kukkalila ansi akuyeeya kotanaingula. Kokkala ansi akuyeeya twaambo tujatikizya nzyosyoma. Kucita boobo, kuyookugwasya kukwabilila nzyosyoma.—Tusimpi 14:15; 1 Petulo 3:15.

“Kucikolo, ikuti kotali masimpe kujatikizya zyintu nzyosyoma beenzinyoko balayanda kukufwubaazya, aboobo mebo tiindakali kuyanda kufwubaazigwa pe. Akaambo kaceeci, ndakasoleka kuti ndizyibe kaambo keni-keni kapa kuti kandizisyoma. Muciindi cakubaambila kuti, ‘Tandikonzyi kucita boobu akaambo kakuti tazyeendelani abukombi bwangu,’ ndakali kubaambila kuti, tandisyomi kuti eeci cililuzi.’ Oolu ndolwakali lusyomo lwangu.”—Oobu mbwaakaamba Danielle.

Lino mubuzyo ngwakuti, ino mbuti mboyanda kuba? Sena inga wayanda kuba mbuli tewu ilipepuluka kufwumbwa kawo kasyoonto kainda naa inga wayanda kuba mbuli cisamu citazungaani nokuba kuti kwaunga guwo pati? Kociyumya citondezyo cako, mpoonya uyooba mbuli cisamu eeco. Eeco ciyookugwasya kwiingula mubuzyo wakuti, Ino ndili muntu uuli buti?

Zibalo azimwi zyakuti “Bakubusi Balabuzya” izyamu Cingisi zilakonzya kujanwa a Intaneti akkeyala ya www.watchtower.org/ype

[Bupanduluzi buyungizidwe]

[Kabbokesi/Cifwanikiso icili apeeji 27]

 NZYOBAAMBA BEENZINYOKO

“Oobu mbundakomena, ndaiya kusaanguna kutulanga-langa twaambo ciindi nondisala cakucita, icipati naa ciniini, alimwi tandiyandi kucita zyintu zikonzya kumunyemya Leza.”

“Nindakacili mwana, ndakali kucibona kuti nceenzu kumuntu uumbi kuba amuzeezo wiindene awangu. Lino, ndazyiba kuti bantu baliindene, alimwi ndilaibikkila maano mizeezo yabo.”

[Zifwanikiso]

Jeremiah

Jennifer

Kabbokesi kali apeeji 28

WEELEDE KUBUZYA BAZYALI KUTI

Ino muyeeya kuti inga ndacikonzya kucita milimo iili buti? Ino mbube nzi mbondeelede kucinca? Ino mbuti mbomwakaba alusyomo lwakuti zyeelelo zya Leza zilagwasya?

[Citondezyo cili apeeji 26]

MONDICITA KABOTU

MONDILEZYA

MBAAKANI

NZYONDISYOMA

[Cifwanikiso icili apeeji 28]

Ikuti kojisi citondezyo ciyumu, uli mbuli cisamu ciyumu icitazungaani kuguwo pati