1. Amuule Zyintu Camaano
1. Amuule Zyintu Camaano
CCITA kuti kamulilimina buya, zyakulya zyoonse nzyomulya muzijana kumusika naa kuzintoolo zipati. Ciindi nomuula zyakulya, mbuti mbomukonzya kusala alimwi akuula zyakulya zili kabotu?
● Kuzyiba nomweelede kuula zyakulya.
Ibacibeela ca Food Safety Information Council ku Australia bakulwaizya kuti: “Amusaangune kuula zyakulya zitafwambaani kubola. Zyakulya ziyandika kukkala mufiliji zyeelede kuulwa kumamanino.” Alimwi kuti muyanda kuula zyakulya zicikasaala, mweelede kuzibweza mwayanda kujoka kuŋanda.
● Kuula zyakulya zyatakabambwa amincini.
Kuti kacikonzyeka mweelede kuula zyakulya zyatakabambwa amincini. * Ba Ruth, bazyali baku Nigeria ibajisi bana bobilo, baamba kuti: “Kanji-kanji nduunka kumusika mafwumofwumo kapati zyakulya nzyondiyanda kuula nozicili kabotu.” Ba Elizabeth baku Mexico, abalo baula zyakulya kumisika. Baamba kuti: “Kumusika ndilakonzya kuula micelo azisyumani, alimwi akuzibweza ndemwini. Lyoonse nduula nyama yajaigwa buzuba mbubonya oobo. Kuti tandikooijika yoonse buzuba mbubonya oobo, iyacaala ndilaibikka mufiliji.”
● Amubone kuti naa nzyomuula zili kabotu.
Amulibuzye kuti: ‘Sena zilibonya kabotu atala? Sena nyama tiinunki? Kuti zyakulya kazili mumapepa, amubone kuti zivwungaidwe kabotu. Kuti kazitavwungaidwe kabotu kulakonzya kunjila tuzunda tuleta malwazi.
Ba Chung Fai, balo baula zyakulya muzintoolo zipati ku Hong Kong, baamba kuti: “Kujatikizya zyakulya zyamutugabba naa mumapepa, kulayandika kulanga deeti noceelede kubelesyegwa.” Nkaambo nzi? Basyaazibwene baamba kuti zyakulya zibelesyegwa kabwiindide kale buzuba nozyeelede kubelesyegwa, nokuba kuti zilibonya kabotu, kununkila kabotu alimwi akulweela, zilakonzya kumuletela malwazi.
● Amuzibambe kabotu zyakulya.
Kuti naa mubelesya zyakubikkila zyapulasitiki mweelede kunoozisanzya lyoonse kubelesya nsipa ameenda aapya. Nyama alimwi answi zyeelede kubikwa zilikke kutegwa zitanunsyi zyakulya zimbi.
Ba Enrico aba Loredana, banabukwetene bakkala ku Italy baula zyakulya kubusena nkukonya nkobakkala. Bapandulula kuti: “Munzila eeyo tatweelede kunyamuna zyakulya musinzo mulamfwu cakuti inga zyanyonyooka.” Kuti naa cilamutolela maminiti aainda ku 30 kujoka kuŋanda, zyakulya nzyomwaula kuzwa mufiliji amuzibikke mucipepa ncomukonzya kujala kabotu-kabotu naa kuzibamba kabotu kutegwa zizumanane kutontola.
Mucibalo citobela, amwiiye mbomukonzya kubamba kabotu zyakulya zyanu mwazileta aŋanda.
[Bupanduluzi buyungizidwe]
^ munc. 6 Amubone cibalo cakuti “Nzila 1-Kusala Zyakulya Zyeelede,” mumagazini ya Sinsimuka! ya April–June 2011.
[Kabbokesi kali apeeji 14]
AMUBAYIISYE BANA BANU: “Ndilabayiisya bana bangu kuti lyoonse kabatanaula zyakulya, beelede kulanga deeti iilembedwe amapepa naa atugabba tujisi zyakulya iitondezya nozyeelede kubelesyegwa.”—oobu mbubakaamba ba Ruth, baku Nigeria
