3. Amujike Akuyobola Kabotu Zyakulya
3. Amujike Akuyobola Kabotu Zyakulya
MU ISRAYELI yansiku, mujiki muyamba wakacela misaansa yamusyokwe nokuba kuti ‘kunyina naakaizyi kabotu.’ Wakabikka micelo eeyo njaatakazyi kabotu mumusinza. Ibakali kulya bakayoowa kuti ambweni muli musamu mucakulya, aboobo bakakwiila kuti: ‘Muli lufwu mucilongo.’—2 Bami 4:38-41.
Mbubwenya mbocitondezya cikozyanyo cili atala aawa, tweelede kucenjela kutegwa tutalyi cakulya cajikwa cabuyamba nkaambo cilakonzya kuleta ntenda naa lufwu. Kutegwa mulikwabilile kumalwazi aajanika muzyakulya, mweelede kwiiya kujika alimwi akuyobola kabotu cakulya. Amulange-lange nzila zyone zitobela:
● Mutalekeli nyama kunyenguluka ilikke.
Ibacibeela ca U.S. Department of Agriculture baamba kuti: “Nokuba kuti nyama mpoili akati eeni inga kaicijisi caanda, cibeela cili anze inga kacitatontoli, calo cikonzya kupa kuti tuzunda tuzyalane cakufwambaana.” Muciindi caboobo, amwiileke kuti inyenguluke mufiliji naa mumeenda aatontola kaivwungaidwe kabotu mucintu citakonzyi kugusya meenda.
● Amujike cakulomya.
Kweelana a World Health Organization, “kuti zyakulya zyajikwa cakulomya, tuzunda tuletela malwazi tulafwa.” Ciindi nomujika zyakulya, ikapati musinza, amubone kuti wabila akupya kusika a 70°C. * Mbwaanga zyakulya zimwi zilakatazya kuzyiba naa zyajikwa cakulomya, basikujika bamwi babelesya kancini kapima nyama kubona naa yabizwa.
● Cakulya taceelede kumuka kuligwa.
Cakulya cajikwa kale taceelede kumuka kuligwa, aboobo ceelede kuligwa ndilyonya kutegwa citanyonyooki. Zyakulya izyeelede kuligwa kazitontola zyeelede kubikkwa mutontola alimwi eezyo izyeelede kuligwa kazipya zyeelede kuyobolwa kazipya. Mulakonzya kubamba nyama muoveni kaipya kusika a 93°C.
● Zyakulya zyacaala mweelede kuzibamba kabotu.
Ba Anita, ibazyali baku Poland, balabapa bantu zyakulya mbobamanina buyo kujika. Baamba kuti: “Kuti kakuli zyakulya zyacaala, ndamana buyo kuzibamba ndilazibikka mutubeela-beela tusyoonto akubikka mufiliji.” Kuti mwabikka zyakulya zyakacaala mufiliji, mweelede kuzilya kakutanainda mazuba otatwe naa one.
Mumasena musambalilwa akulida, amusale muntu umwi ngomusyoma kutegwa kamubambila zyakulya. Aboobo, mbuti mbomukonzya kukwabilila mukwasyi wanu kuti kamutalidi aŋanda?
[Bupanduluzi buyungizidwe]
^ munc. 7 Zyakulya zimwi, izili mbuli nkuku, zyeelede kujikwa kwaciindi cilamfwu.
[Kabbokesi kali apeeji 16]
AMUBAYIISYE BANA BANU: “Kuti bana bangu bajika cakulya, ndilabayeezya kubala alimwi akutobela malailile aali aacipepa cijisi cakulya.”—Oobu mbobakaamba ba Yuk Ling, baku Hong Kong
