Bakubusi Balabuzya

Nkaambo nzi ncindeelede kuunka kumiswaangano ya Bunakristo?

Sena ilakukkomanisya miswaangano ya Bunakristo?

Inzya

Kozumanana kucita mbuli mbocita lyoonse

Peepe

Ncinzi ncokonzya kucita kujatikizya makani aaya?

IBBAIBBELE lilailila Banakristo kuti beelede kuswaangana antoomwe akukomba. (Bahebulayo 10:25) Pele ino kuti kotakukkomanini kuswaangana? Ino kuti ciindi camiswaangano uyeeya buyo zyintu zimbi nzyooli kunoocita kuti nooli kumbi buyo kutali kumiswaangano? Ulakonzya kucinca kwiinda mukubelesya nzila yomwe naa ziinda waawo aali zeezyi zitobela.

1. KOJANIKA LYOONSE

Lugwalo lugwasya: “Tutanooleki kuswaangana antoomwe, mbuli bamwi ibajisi ciyanza eeci.”—Bahebulayo 10:25.

Nkaambo nzi ncoyelede kujanika lyoonse kucintu ncotakkomanini? Mubufwaafwi inga twaamba kuti, nkaambo njenzila iikonzya kukugwasya kuti utalike kucikkomanina. Kociyeeyela munzila eeyi: Mbuti mbokonzya kunoocita kabotu mucisobano cimwi—kuti kotaunki-unki kuyoosobana? Oobo mboibede amiswaangano ya Banakristo. Kuti kojanika lyoonse, uyootalika kwiikkomanina. Mpoonya, eeci ciyoopa kuti koyanda kujanika lyoonse.—Matayo 5:3.

Nzila zigwasya: Yamana miswaangano kosola kubandika amwaambi omwe akumwaambila kaambo kakugwasya mumakani aakwe. Mukabbuku kako nkolembela makani aayandika, ulembe mpindu yomwe njoojana kwiinda mukujanika kumiswaangano. Akaambo kakuti bunji bwamakani aabandikwa kumiswaangano ajatikizya mulimo wa Bunakristo, koba amakanze aakwaambila bamwi kujatikizya nzyosyoma. Eeci ciyoopa kuti makani aabandikwa ciindi camiswaangano kaayandika kapati kulinduwe.

“Ndakaisyigwa kandicili mwana kuti tweelede kujanika kumiswaangano. Neciba ciindi nindakacili mwana, tiindakali kulovwa-lovwa kumiswaangano. Oobu mbondicita asunu.”—Oobu mbwaakaamba Kelsey.

Kaambo kayandika: Aabo bajanika lyoonse kumiswaangano balaikkomanina kapati alimwi balagwasyigwa kapati!

2. WEELEDE KUBIKKILA MAANO

Lugwalo lugwasya: “Amubikkile maano mbomumvwa.”—Luka 8:18.

 Basikuvwuntauzya baamba kuti kusika kumamanino aabuzuba, muntu iwali kuswiilila makani amwi, ulaluba 60 pesenti yazyintu nzyaamvwa. Kuti nooli kusweekelwa mali munzila iili boobo, nooli kubikkila maano kutegwa eeco citacitiki.

Nzila zigwasya: Weelede kukkala kuzyuuno zyakumbele antoomwe abazyali, kwalo nkotakonzyi kunyonganizyigwa kapati. Kolemba twaambo tupati-pati. Nekuba kuti tabali boonse baiya munzila iikozyenye, kulemba twaambo tupati-pati kulakonzya kukugwasya kubikkila maano kumwaambi alimwi kulakonzya kukugwasya noinduluka nzyooiya.

“Ndakali kupenga kapati kubikkila maano ciindi camiswaangano, pele lino ndilasoleka. Ndilasoleka kuyeeya kaambo ncondili kumiswaangano. Tacili kwiinzya buyo mulawo mbuli kuunka kucikombelo. Ncenduunkila kumiswaangano nkukomba alimwi akwiiya—kujana cimwi cintu ncendikonzya kubelesya mubuumi bwangu.”—Oobu mbwaakaamba Kathleen.

Kaambo kayandika: Kuunka kumiswaangano kotabikkili maano cili mbuli kujanika kupobwe pele kotalyi.

3. WEELEDE KUTOLA LUBAZU

Lugwalo lugwasya: “Lubulo lulanona lubulonyina, mbubonya obo muntu  ulanona busyu bwamweenzinyina.”—Tusimpi 27:17.

Mboli mukubusi, ulijisi lubazu luyandika kapati ciindi camiswaangano. Toelede kubona mbuli kuti kujanika kwako naa kutola lubazu kwiinda mukupa bwiinguzi ciindi camubandi wakubuzya akwiingula naa kuyanzana abasyominyoko takugwasyi.

Nzila zigwasya: Koba amakanze aakupa bwiinguzi andiza ciindi comwe buyo ciindi camubandi wakubuzya akwiingula. Kuti kakuyandika kusalazya naa milimo iimwi buyo kaitanatalika miswaangano, noili mukati naa niyamana inga walisungula kugwasya. Kobandika amuntu umwi ngomutabandiki-bandiki limwi.

“Nindakacili mukubusi, ndakalyaaba kunyamuna mamaikolofooni alimwi akwaabikka kabotu kucibumbili ciindi camiswaangano. Kuba amikuli eeyi cakandipa kulimvwa kuti ndilayandika alimwi cakandikulwaizya kunoojanika alimwi akusika aciindi ceelede. Eeci cakandigwasya kutalika kuyandisya zyintu zyakumuuya.”—Oobu mbwaakaamba Miles.

Kaambo kayandika: Utakkali buyo—pele kocita cimwi cintu! Kutola lubazu kulagwasya lyoonse kwiinda kulangilila buyo.

Zibalo azimwi zyakuti “Bakubusi Balabuzya” zilakonzya kujanwa a Web site ya www.watchtower.org/ype

[Kabbokesi/Cifwanikiso icili apeeji 11]

MWATAMBWA!

Sena inga mwayanda

● Kwiiya kasimpe kajatikizya Leza?

● Kuba muntu uuli kabotu?

● Kujana balongwe bali kabotu?

Miswaangano ya Bakamboni ba Jehova ilakonzya kumugwasya kucita zyintu eezyi alimwi azimbi. Ziindi zyobilo nsondo ansondo, Bakamboni ba Jehova balabungana antoomwe mu Maanda a Bwami kutegwa bakombe. Beenzu balaangulukide kusika alimwi kunyina mitiba iinzigwa kubwezelela mali.

Mutaindwi! Maanda aa Bwami taali mbuli zikombelo nkomwakabede. Kumiswaangano ya Bakamboni ba Jehova, babikkila kapati maano kunjiisyo zyamu Bbaibbele, alimwi muyakwiiya Jwi lya Leza mbolikonzya kumugwasya kuba abuumi buli kabotu.—Deuteronomo 31:12; Isaya 48:17.

Sai—Ciindi cakusaanguna nindakaunka ku Ŋanda ya Bwami, ndakagambwa kubona kuti kwakanyina zibumbwa, kwakanyina wakasamide zisani mbuli mupaizi, alimwi kunyina wakandaambila kuti ndibbadele mali. Bantu boonse bakanditambula, ndakalimvwa kwaanguluka. Makani aakabandikwa lyamiswaangano taakali kukatazya kumvwisya pe, alimwi akali kugwasya. Aaka, nkakasimpe nkondakali kulangaula!

Deyanira—Ciindi cakusaanguna nindakaunka kumiswaangano ya Bakamboni ba Jehova ndakajisi myaka iili 14 yakuzyalwa. Bantu boonse bakanditambula. Cakalibonya kuti eeci ncindakacita cakali kuyandika kapati kulimbabo, alimwi bakanditondezya luyando lwini-lwini. Akaambo kazyintu zyakandicitikila ciindi cakusaanguna, ndakalimvwa kwaanguluka kupilukila alimwi kumiswaangano yabo!

[Kabbokesi kali apeeji 12]

Amuzizyibe zibeela ziyoolangwa-langwa kumiswaangano iitobela. Amusale cibeela comwe camukkomanisya mpoonya . . .

AMUTENDE AKUYOBOLA

Mulembe ansi aawa kamutanaunka kumiswaangano

Zyina lyacibeela:

․․․․․

Ncendiyanda kuzyiba kujatikizya cibeela eeci:

․․․․․

Mulembe ansi aawa camana cibeela camakani ncimwasala.

Ncindaiya:

․․․․․

Ncendikonzya kwaambila mwaambi kuti candikkomanisya kumakani aakwe:

․․․․․