Kuyandisya Nkondo

BANTU munyika mazubaano balaiyandisya nkondo. Kwaamba masimpe, kulwana kwali kutondezyegwa lyoonse muzisobano. Nokuba boobo, bamukabunga kaitwa kuti Media Awareness Network, bakaamba kuti “mumyaka misyoonto yainda, kuli kucinca kupati kwacitika kujatikizya nkondo zitondezyegwa muzisobano zyaa TV alimwi aa Intaneti. Cakusaanguna, zisobano zyankondo zyavwula kapati. Cabili, bunji bwazisobano eezyi zitondezya bantu balwana calunya alimwi zilabikkilizya abwaamu akujata bamakaintu.” Amulange-lange twaambo ootu tutobela:

Nyimbo: Ibamukabunga kaambwa atala aawa bakaamba kuti inyimbo zyaamba makani aakulwana “zyavwula kapati.” Kwiinda mukubelesya majwi aakutukila, inyimbo eezyi zikulwaizya bujayi, kujata bamakaintu, kubikkilizya abamakaintu babo alimwi abazyali.

Zisobano Zyaavidiyo: Magazini imwi yaku Britain iyaamba kujatikizya zisobano zyaavidiyo yakati: “Cuusisya ncakuti zisobano zyaavidiyo zijatikizya kujayana.” Yakazumanana akwaamba kuti: “Muntu uuyanda zisobano zyaavidiyo ulaiyanda nkondo.” Mucikozyanyo, cisobano cimwi  cizyibidwe kapati ncakuuma bamakaintu calufwu. Bantu bamwi basyoma kuti zisobano zyaavidiyo zilakonzya kupa bana mizeezo mibyaabi kwiinda mboikonzya kucita TV.

Zisobano Zyaa TV: Buvwuntauzi butondezya kuti kulwana, koonana, alimwi akutukila zyaduma kapati muzisobano zyamazubaano, ayalo myaka njobalemba iitondezya ziimo zyabantu beelede kweebelela filimu eeyo taicisyomeki pe. Kuyungizya waawo, nobaba baabo babonwa kuti “bali kabotu” mucisobano abalo mbaasilunya. Buvwuntauzi bumwi butondezya kuti cisela cankondo zitondezyegwa a TV, mumafilimu, alimwi amunyimbo zyaavidyo, zicitwa aabantu babonwa kuti “bali kabotu.”

Makani Aamulisikapepele: Basikulemba makani aa TV baamba kuti bantu beebelela TV balavwula ikuti makani kaabikkilizya ankondo. Makani aamulisikapepele makwebo, alimwi basimubweza twaambo balizyi kuti nkondo ipa kuti bantu banji kabeebelela TV, akuti akaambo kakuti basikweebelela mbanji, eeci cikwelelezya basimakwebo kutola makwebo aabo mulisikapepele.

Ma Web Site: Zifwanikiso zilibonya mbuli kuti nzyancobeni zijatikizya kupenzya bantu, kutenda mubili wamuntu mutubeela-beela, alimwi akujaya, zyoonse zilajanika aa Intaneti. Bana banji baleebelela zyintu zili boobu aa Intaneti.

Sena Nkondo Zitondezyegwa Muli Sikapepele Zilakonzya Kumujatikizya?

Sena nkondo zibonwa mucipekupeku, mumafilimu, munyimbo zyaavidiyo, zijanika mumabbuku, alimwi amuzyakulikondelezya zilabajatikizya bantu? Kanji-kanji aabo ibajana mpindu kwiinda mukutondezya mafilimu aankondo muli sikapepele balakaka kuti mafilimu ngobapanga taakonzyi kubanyonganya bantu. Pele amukayeeyele buyo kaambo aaka: Kutegwa bacikonzye kuyunga bantu, basimakwebo balabelesya mali manji kwaambilizya makwebo aabo, alo ambweni aakonzya kutola buyo tuvwaluvwalu tuli 30. Aboobo, sena cilikabotu kuyeeya kuti vidiyo iitola maminiti aali 90, imuli basicisobano batalilemeki alimwi basinkondo, taikonzyi kubajatikizya naaceya bantu beebelela, kwaambisya bana?

Mulengi wesu Jehova Leza, ulituzyi kabotu mbotwakalengwa kwiinda mbotulizyi. Ncinzi ncaakatwaambila kujatikizya kuyanzana abantu basinkondo—kubikkilizya abaabo bajanika muli sikapepele? Amulange-lange Magwalo aatobela:

● “Jehova ulalingula baluleme abasizibi. Moyo wakwe ulisulide basikufumpa.”—Intembauzyo 11:5.

● “Utatangi buzwalani amuntu mukali, nekuba kweenda amuntu silunyemo, kuti utaiyi inzila zyakwe, akulyaanga mukakole.”—Tusimpi 22:24, 25.

Masimpe ngakuti, tulakonzya kuyungwa munzila zisiyene-siyene. Pele tulakonzya kulisalila zyakulikondelezya alimwi abantu mbotuyanzanalimwi. Aboobo m weelede kulibuzya kuti: ‘Ino ndiyanda kuba muntu uuli buti?’ Mwamana kulibuzya boobu, amuyanzane abantu aabo bajisi bube alimwi ambaakani mbuli nzyomujisi.—Tusimpi 13:20.

Mbokunga zyakulikondelezya nzyotusala abantu mbotuyanzanalimwi zilakonzya kutuyunga kuyanda nkondo, kuli zyintu azimwi zikonzya kutuyunga. Ino eezyi inga zyaba zyintu nzi?

[Cifwanikiso icili apeeji 5]

Zyakulikondelezya nzyotusala zilakonzya kutuyunga kuyanda nkondo.