BA BOYLE bakazyalilwa ku Ireland mumwaka wa 1627 kubusena bwiitwa kuti Lismore Castle, mumukwasyi uukupukide kapati. Eeci cakali ciindi basyaazibwene mumakani aakaindi ncobakali kwiita kuti matalikilo aabasyaabusongo, iciindi basyaabusongo nobakali kusola kwaangulula bantu kuzwa mubuzike mobakabede kwamyaka minji. Aaya ngamakanze ngobakajisi abalo ba Boyle. Mumakani aajatikizya matalikilo abuumi bwabo, bakalipa zyina lyakuti Philaretus, lipandulula “Muntu Uuyanda Kuzyiba Masimpe.”

Luyandisisyo lwabo lwakuzyiba zyintu lwakali kweendelana amakanze aabo akwaambila bamwi zyintu zyoonse nzyobakaiya. Bakaba balembi bacibwene kapati, nkaambo makani ngobakali kulemba akabagwasya kapati bantu banji bakali kupona muciindi cabo, kubikkilizya abasyaazibwene musayaansi bazyibidwe kapati ba Sir Isaac Newton. Mu 1660, ba Robert Boyle bakaba umwi wabaabo ibakatalisya kabunga kasayaansi kategwa Royal Society kalo kaciliko asunu mu London, ku England.

Ba Boyle baambwa kuti mbebakatalisya ciiyo ca chemistry. Bakabelesya nzila iindene kapati ayeeyo njobakali kubelesya basyaazibwene musayaansi bakali kupona muciindi cabo. Nzyobakajana nobakali kuvwuntauzya basyaazibwene aaba, bakazisisa kubantu alimwi eezyo nzyobakalemba bakazilemba munzila njobatakonzyi kumvwa aabo batakali basayaansi. Mukwiimpana, ba Boyle bakatumwaya twaambo toonse tujatikizya mulimo wabo. Kuyungizya waawo, muciindi cakwiile kuzumina buyo twaambo tunyina bumboni, balo bakali  kuvwuntauzya kutegwa basinizye kuti twaambo ooto ntwamasimpe.

Buvwuntauzi bwaba Boyle bwakeendelana amuzeezo wakuti zyintu zipangidwe atubeela tusyoonto-syoonto tuswaangene twalo tupa kuti zyintu kazilibonya mbuli mbotuzibona.

Nzila nzyobakabelesya mubuvwuntauzi bwabo bwasayaansi zyoonse zilajanika mubbuku lizyibidwe kapati ndyobakalemba litegwa The Sceptical Chymist. Mubbuku oomu bakalemba kuti basyaabusongo musayaansi tabeelede kulidunda, pele beelede kuzumina kuti abalo balalubizya. Ba Boyle bakakankaizya kuti aabo bayeeya kuti zyintu nzyobazyi zilayandika, beelede kwiindanya akati kazyintu nzyobakazyi kuti nzyamasimpe alimwi azyeezyo nzyobakali kuyeeyela kuti zyakali zyamasimpe.

Ba Boyle bakali kusyoma muli Leza kujatikizya zyintu nzyobakazyi kuti nzyamasimpe. Zyintu nzyobakavwuntauzya kujatikizya bubumbo alimwi anzila zikkomanisya kujatikizya mbozyakalengwa zyintu zipona, zyakabapa kusyoma kuti kuli wakazilenga. Aboobo bakaikaka njiisyo yakuti kunyina Leza yalo yakadumide akati kabasyaabusongo bakali kupona muciindi cabo. Ba Boyle bakaamba kuti, kunyina muntu uyeeya kabotu uukonzya kwaalilwa kusyoma muli Leza.

Nokuba boobo, ba Boyle kunyina nibakayeeya kuti kuyeeya kwabantu yakali nenzila ilikke iikonzya kubapa busongo bwini-bwini. Bakabona kuti kwakali kuyandika lugwasyo kuzwa kuli Leza. Bakaamba kuti lugwasyo oolo, lyakali Jwi lya Leza, Ibbaibbele.

Ba Boyle bakali kupenga kapati mumoyo kubona kuti bantu banji tiibakazizyi njiisyo zyamu Bbaibbele alimwi akuti bakali kulibonya kuti lusyomo lwabo kunyina mpolwakayeeme. Bakali kulibuzya kuti, mbuti lusyomo lwamuntu mbolunga kaluyeeme buyo azyintu nzyobakali kusyoma bazyali bakwe naa kubusena nkwaakazyalilwa? Ba Boyle bakaba aaluyandisisyo lwakuti bagwasye bantu kuba aaluzyibo lwini-lwini lwamu Bbaibbele.

Aboobo, ba Boyle bakagwasilizya kwiinda mukupa mali kutegwa Bbaibbele lilembwe mumyaambo minji. Myaambo eeyi ibikkilizya amyaambo yabantu baku North America, alimwi a ci Arabic, ci Irish, ci Malay, aci Turkish. Kwiinda mukucita boobu, ba Robert Boyle bakatondezya kuti bakali aaluzyibo lunji, pesi bakali kulicesya alimwi bakajisi luyandisisyo lwakuzyiba masimpe muzyintu zyoonse akugwasya bantu kucita oobo.