CIINDI Harriet naakafwa mu 2006, wakajisi myaka yakuzyalwa iili 175. Harriet tanaakali muntu pe. Yakali nondo yamusyobo wa Galapagos, yaku Australia, mubusena muvwubilwa banyama. Kwiindana andiswe tobantu, nondo eeyi yakapona myaka minji. Nokuba boobo, myaka eeyi taigambyi pe ikuti twayeezyanisya amyaka njozipona zilenge zimwi. Amulange-lange zikozyanyo eezi zitobela.

• Basikuvwuntauzya baku Finland baamba kuti inswi yiitwa kuti freshwater pearl mussel, ilakonzya kupona myaka iili 200.

• Kanyama kaitwa kuti ocean quahog kanji-kanji kalapona myaka yiinda ku 100 alimwi kwakajanwa kuti tumwi tulapona myaka yiinda ku 400.

• Masamu aasiyene-siyene, mbuli bristlecone pine, giant sequoia, cypress alimwi a spruce alakonzya kupona myaka minji kapati.

Nokuba boobo, bantu balo ibabonwa kuti bapona buumi busumpukide kwiinda zilenge zimbi, bapona buyo myaka iili 80 naa 90 nokuba kuti zimwi ziindi balasolekesya kukwabilila buumi bwabo kutegwa bapone myaka minji.

Sena muyeeya kuti kupona myaka iili 80 naa kwiinda waawo ncecintu ncotulombozya? Sena kuli nzila iikonzya kutupa kupona kwaciindi cilamfwu?  Bantu banji basyoma kuti sayaansi alimwi akusumpuka mubusilisi kulagwasya.

Sayaansi yagwasya kapati kusumpula busilisi alimwi anzila zibelesyegwa mubusilisi. Magazini yiitwa kuti Scientific American yaamba kuti: “Ku United States, mbasyoonto bantu bafwa amalwazi aayambukila naa akaambo kabuyumuyumu bwakutumbuka. Kuzwa mu 1960, mweelwe wabana bafwa wayaansi a 75 pesenti. Pele sayaansi tiiyazwidilila kupa bantu kupona kwaciindi cilamfwu.” Magazini iimbi ya Scientific American yaamba kuti: “Nokuba kuti bali kuvwuntauzya kwamyaka minji, cabaalila kubumana bucembele. Bumboni oobu butondezya kuti muntu ulacembaala ciindi bubambe bwakupanga maseelo mumubili nobuleka kubeleka.” Cibalo eeci cilazumanana kwaamba kuti: “Ikuti kucembaala mbubambe bujatikizya maseelo, nkokuti bumwi buzuba kuyoomana.”

Mubuvwuntauzi bwabo kujatikizya cipa kuti bantu kabacembaala, amalwazi aaboola akaambo kakucembaala, basayaansi kwiinda mukubelesya zibelesyo zyamazuba aano bacivwuntauzya ma genes calo ncobaamba kuti epigenetics. Ino epigenetics ncinzi?

Maseelo aapona alijisi makani aayandika kapati mukupangwa kwamaseelo mapya. Bunji bwamakani aaya alajanika mucibeela citegwa genome, ibbala lipandulula ma DNA woonse aali mukaseelo. Nokuba boobo, mazuba aano basayaansi bazizyiba kapati zyintu zicitika museelo, zyalo ziitwa kuti epigenome. Aboobo, Epigenetics nkwiiya zyintu eezyi zigambya zicitika museelo.

Tubeela-beela tupanga epigenome tuliindene kapati a DNA. Kwiindana ooku nkwakuti DNA ilakozyanya amanela aapilingene, kakuli epigenome makani aalembedwe aa DNA. Ino epigenome ijisi mulimo nzi? Mbubwenya mbuli sikwiimbya nyimbo mbwasololela baimbi, epigenome ayalo njiyeendelezya mboibeleka DNA. Ootu tubeela-beela ntotupa kuti maseelo kaabeleka naa kaatabeleki kweelana azyintu ziyandika museelo alimwi azicitika mumubili, mbuli musyobo wazyakulya nzyotweelede kulya, kukatala, alimwi amisamu imwi iijaya. Ibuvwuntauzi bwakacitwa caino-ino kujatikizya epigenome bwakapa kuti basayaansi kabazibona munzila imbi zyintu, kwaambisya eeco ciswaanganya bubambe bwa epigenetics kumalwazi amwi alimwi nokuba kucembaala.

Sikuvwuntauzya bubambe bwa epigenetics wazyina lya Nessa Carey wakaamba kuti: “Bubambe oobu mbobutalisya malwazi mbuli bulwazi bwamumizeezo bwiitwa kuti schizophrenia, bulwazi bwamanungo bwiitwa kuti rheumatoid arthritis, alimwi akkansa. Masimpe oobu bubambe abwalo kuli ncobucita mukupa kuti muntu acembaale.” Aboobo, kuvwuntauzya kujatikizya bubambe bwa epigenetics kulakonzya kugwasya mukujana misamu yakusilisya malwazi mbuli bulwazi bwakkansa alimwi akupa bantu kupona kwaciindi cilamfwu. Nokuba boobo, cino ciindi kunyina bulangizi bwakuti bantu balakonzya kujana nzila zigwasya. Carey wakaamba kuti: “Tulazumanana kucita zyintu nzitwali kucita lyoonse notusola kulwana penzi lyakucembaala, mbuli kulya zisyu mani, alimwi akunyanyaasya mubili lyoonse.”

Nokuba boobo, nkaambo nzi bantu ncobalipenzya kuyanda kupona kwaciindi cilamfwu? Nkaambo nzi ncotuyandila kupona kukabe kutamani? Mbubwenya muteende waku Britain wa The Times mbowakabuzya kuti: “Nkaambo nzi bantu banji ncobayandisya kuzumanana kupona, kwiinda munjiisyo yakutafwa, yabubuke, ayakuzumanana kuba muumi muntu afwa naa kusanduka kuba cintu cimwi cipona?” Mbubwenya mbotutiibone lino, bwiinguzi kumibuzyo eeyi bulakasalazya kaambo kapa kucembaala.

Kwamyaka minji, bantu bali kusolekesya kujana bwiinguzi kumubuzyo ooyu. Sena kuli bwiinguzi bulimvwisya alimwi bukkazyika moyo bukonzya kweendelana ambotupangidwe alimwi  akuyanda kwesu kwakupona kukabe kutamani? Bantu banji inga baingula kakunyina kuwayawaya kuti, inzya! Nkaambo nzi? Nkaambo bakabujana bwiinguzi bukkazyika moyo mu Bbaibbele kujatikizya mbobakalengwa bantu.

Kuzwa kumatalikilo, Bbaibbele lilaamba cakusalazya kuti bantu, nokuba kuti kuli mbobakozyenye azilenge zimwi, baliindene kapati. Mucikozyanyo, mulugwalo lwa Matalikilo 1:27, tubala kuti muntu wakalengwa mucinkozya ca Leza. Munzila nzi? Wakatulenga kuti katucikonzya kutondezya bube bwakwe mbuli luyando, bululami, alimwi abusongo. Alimwi akaambo kakuti Leza ulapona lyoonse, wakatulenga katujisi bube bwakuyandisya kupona kukabe kutamani. Lugwalo lwa Mukambausi 3:11 lwaamba kuti: “Wabika bulangizi bwabuumi buteeli mumyoyo yabo.”

Bumboni ibutondezya kuti bantu ikuzwa kumatalikilo bakalengwa kuti kabapona kwaciindi cilamfwu, bulakonzya kubonwa kwiinda mukulanga-langa nguzu zyabongo, kwaambisya nguzu nzyobujisi zyakwiiya. Bbuku lyakuti The Encyclopedia of the Brain and Brain Disorders lyaamba kuti nguzu zyabongo zyakucikonzya kuyobola makani kwaciindi cilamfwu “tazigoli.” Nkaambo nzi bongo ncobujisi nguzu zili boobu, ikuti naa tiibwakeelede kubelesyegwa? Masimpe, munzila zinji, bantu batondezya buyo makanze ngaakajisi Leza kumatalikilo kujatikizya bantu. Pele, nkaambo nzi ncotucembaalila, kupenga, alimwi akufwa?

Bantu bakusaanguna bakajisi mibili iilondokede alimwi bakalaangulukide kucita kufwumbwa ncobakali kuyanda. Cuusisya ncakuti, tiibakalubelesya kabotu lwaanguluko oolo, akaambo kakuti bakazangila Mulengi wabo. * (Matalikilo 2:16, 17; 3:6-11) Kuzanga naa kubisya kwabo kwakabapa kulimvwa kuba amulandu alimwi akuusa kapati. Alimwi kwakaleta mapenzi kumibili yabo, bakatalika kucembaala, mpoonya bakafwa. Lugwalo lwa 1 Bakolinto 15:56 lwaamba kuti: “Lumoola lwalufu nzibi.” (BIT)

Kweelana amulawo ooyu ngotwakakona, bana ba Adamu a Eva boonse bakakukona kutalondoka akuyanda kucita cibi. Lugwalo lwa Baloma 5:12 lwaamba kuti: “Mbubonya cibi mbocakanjila munyika kwiinda mumuntu omwe alufwu kwiinda mucibi, eelyo lufwu lwakasikila bantu boonse nkaambo boonse bakabisya.”

Ncinzi ncotukonzya kwaamba kweelana amakani aabandikwa atala aawa? Ncotukonzya kwaamba ncakuti: Kaambo kakonzya kutupa kupona lyoonse takakonzyi kujanwa mubuvwuntauzi bwabasayaansi. Leza alikke nguukonzya kumana bubi buboola akaambo kacibi. Pele sena uyoocita oobo? Cakukkazyika moyo, Bbaibbele lilaingula kuti, inzya!

Leza wakabweza kale ntaamu iiyandika yakugwisya cibi alimwi alufwu. Wakatuma Jesu Kristo kuti aabe buumi bwakwe akaambo kandiswe. Ino lufwu lwa Jesu inga lwatugwasya buti? Jesu wakazyalwa kalondokede alimwi “tanaakacita cibi.” (1 Petulo 2:22) Aboobo, wakeelede kupona buumi butamani alimwi bulondokede kali muntu. Ino wakacita buti abuumi bwakwe bulondokede? Wakalyaaba kufwa kutegwa abbadelele zibi zyesu. Masimpe, Jesu wakaaba “buumi bwakwe ikuba cinunuzyo cabanji.” (Matayo 20:28) Ino-ino, cinunuzyo eeco ciyoobelesyegwa kulindiswe cakumaninina. Ino eeco inga caamba nzi kulindinywe? Amulange-lange magwalo aaya aatobela:

• “Leza wakaiyanda kapati nyika cakuti wakapa Mwanaakwe simuzyalwaalikke, kutegwa muntu uuli woonse uumusyoma atakanyonyoonwi pele akabe abuumi butamani.”—Johane 3:16.

• “Lufu walumenenena mane kukabe kutamani, mwami Jehova uyoosindula misozi kumasyu oonse.”—Isaya 25:8.

• “Sinkondo wamamanino uuyoonyonyoonwa, ndufwu.”—1 Bakolinto 15:26.

• “Tente lya Leza lili aabantu . . . Eelyo uyoosindula misozi yoonse kumeso aabo, alimwi lufwu talukooyoobako limbi.”—Ciyubunuzyo 21:3, 4.

Ino inga mwapona kwaciindi cilamfwu buti? Bwiinguzi bwamu Bbaibbele bulisalede kuti: Bantu balakonzya kuba abulangizi bwakuyoopona kukabe kutamani, ibulangizi mbwayoozuzikizya Leza aakumana kugwisya bubi boonse buli munyika. (Intembauzyo 37:28, 29) Jesu wakalibujisi bulangizi oobu mumizeezo ciindi naakaambila mwaalumi ngobakaanzikidwe limwi acisamu kuti: “Uyooba andime mu Paladaiso.”—Luka 23:43.

Masimpe, luyandisisyo ndobajisi bantu lwakupona kukabe kutamani ndwakuzyalwa andulo alimwi lulakonzya kuzuzikizyigwa. Oobu mbwaakatulenga Leza alimwi uyooluzuzikizya luyandisisyo oolo. (Intembauzyo 145:16) Nokuba boobo, tweelede kucita lubazu lwesu. Mucikozyanyo, tweelede kuba alusyomo muli Leza. Lugwalo lwa Bahebulayo 11:6 lwaamba kuti: “Ikuti kakunyina lusyomo tacikonzyeki pe kumukkomanisya Leza, nkaambo ooyo uuswena afwaafwi kulinguwe weelede kusyoma kuti nkwali ncobeni akuti uba sikupa bulumbu kuli baabo bamuyandaula cabusungu.” Lusyomo oolu takuli kuzyiba buyo kuti Leza nkwali, pele nkuba aluzyibo luyeeme akasimpe keni-keni kamu Bbaibbele. (Bahebulayo 11:1) Ikuti kamuyanda kuba alusyomo luli boobu, amubandike a Bakamboni ba Jehova naa kubona Website ya www.mr1310.com.